ಸೌದಿ ಅರೇಬಿಯಾದಲ್ಲಿ ಒಂಟೆಗೆ ಢಿಕ್ಕಿ ಹೊಡೆದ ಕಾರು- ಮಂಗಳೂರಿನ 3 ಮಂದಿ ಸಾವು
Saturday, February 4, 2023
ಮಂಗಳೂರು: ಸೌದಿ ಅರೇಬಿಯಾದಲ್ಲಿ ರಿಯಾದ್ ನಲ್ಲಿ ರಸ್ತೆಯಲ್ಲಿದ್ದ ಒಂಟೆಗೆ ಕಾರು ಢಿಕ್ಕಿ ಹೊಡೆದು ನಡೆದ ಭೀಕರ ರಸ್ತೆ ಅಪಘಾತದಲ್ಲಿ ಮಂಗಳೂರಿನ ಮೂವರು ಮೃತಪಟ್ಟಿರುವ ದಾರುಣ ಘಟನೆ ನಡೆದಿದೆ.
ಈ ಘಟನೆ ರಿಯಾದ್ ನ ಖುರೈಸ್ ರಸ್ತೆಯ ಬಳಿ ನಡೆದಿದೆ. ಘಟನೆಯಲ್ಲಿ ಹಳೆಯಂಗಡಿ ಕದಿಕೆ ನಿವಾಸಿ ರಿಝ್ವಾನ್, ಸುರತ್ಕಲ್ ಕೃಷ್ಣಾಪುರದ ಅಕೀಲ್, ಮಂಗಳೂರಿನ ನಾಸಿರ್ ಸಾವನ್ನಪ್ಪಿದ್ದಾರೆ.
ಇವರ ಜೊತೆಗೆ ಪ್ರಯಾಣಿಸುತ್ತಿದ್ದ ಬಾಂಗ್ಲಾ ದೇಶದ ಪ್ರಜೆ ಶಿಹಾಬ್ ಎಂಬಾತನು ಮೃತಪಟ್ಟಿದ್ದಾನೆ.
ಈ ನಾಲ್ಕು ಮಂದಿ ನಾಲ್ಕು ತಿಂಗಳ ಹಿಂದೆಯಷ್ಟೆ ರಿಯಾದ್ ಗೆ ತೆರಳಿದ್ದರು. ರಿಯಾದ್ ನಲ್ಲಿ ರೆಸಿಡೆನ್ಸಿಯಲ್ ಪ್ರಮಾಣ ಪತ್ರ ಪಡೆಯಲು ಇಕಾಮ್ ಎಂಬ ಪ್ರಕ್ರಿಯೆಗಾಗಿ ಕಾರಿನಲ್ಲಿ ತೆರಳುತ್ತಿದ್ದರು. ನಾಲ್ವರು ಕಾರಿನಲ್ಲಿ ಹೋಗುತ್ತಿದ್ದಾಗ ಖುರೈಸ್ ರಸ್ತೆಯ ಬಳಿ ಒಂಟೆಗೆ ಡಿಕ್ಕಿಯಾಗಿ ಈ ದುರ್ಘಟನೆ ಸಂಭವಿಸಿದೆ .
ಕಾರಿನಲ್ಲಿದ್ದವರು SAQCO ಎಂಬ ಕಂಪೆನಿಯಲ್ಲಿ ಉದ್ಯೋಗ ಮಾಡುತ್ತಿದ್ದರು. ಅಕೀಲ್ ಅವರು ಮಂಗಳೂರಿನ ಸುರತ್ಕಲ್ ಕೃಷ್ಣಾಪುರ ನಿವಾಸಿಯಾಗಿದ್ದು, ರಿಝ್ವಾನ್ ಹಳೆಯಂಗಡಿ ಕದಿಕೆ ನಿವಾಸಿ ಮತ್ತು ನಾಸಿರ್ ದ.ಕ ಜಿಲ್ಲೆಯ ನಿವಾಸಿಯಾಗಿದ್ದಾರೆ.
ಮೃತದೇಹಗಳನ್ನು ರಿಯಾದ್ ನ ಅಲ್ ಹಸ್ಸಾ ಆಸ್ಪತ್ರೆಗೆ ಸಾಗಿಸಲಾಗಿದ್ದು, ಸಂತ್ರಸ್ತ ಕುಟುಂಬವನ್ನು ಸಂಪರ್ಕಿಸಿ ಮಾಹಿತಿಯನ್ನು ನೀಡಲಾಗಿದೆ.
