ಚಲಿಸುತ್ತಿದ್ದ ಫ್ಲೈಟ್ ನಿಂದಲೇ ಹಾರಿ ಬೆಚ್ಚಿಬೀಳಿಸಿದ ಪ್ರಯಾಣಿಕ!
Sunday, June 27, 2021
ಲಾಸ್ ಏಂಜಲೀಸ್: ಚಲಿಸುತ್ತಿರುವ ಫ್ಲೈಟ್ ನಿಂದಲೇ ಪ್ರಯಾಣಿಕನೊಬ್ಬ ಕೆಳಗೆ ಹಾರಿ ಎಲ್ಲರನ್ನೂ ಬೆಚ್ಚಿಬೀಳಿಸಿದ ವಿಚಿತ್ರ ಘಟನೆಯೊಂದು ಅಮೆರಿಕದ ಲಾಸ್ ಏಂಜಲೀಸ್ ವಿಮಾನ ನಿಲ್ದಾಣದಲ್ಲಿ ನಡೆದಿದೆ.
ಸಾಲ್ಟ್ ಲೇಕ್ ಸಿಟಿಗೆ ಹೊರಟಿದ್ದ ಸ್ಕೈವೆಸ್ಟ್ ಕಂಪೆನಿಯ ಯುನೈಟೆಡ್ ಎಕ್ಸ್ಪ್ರೆಸ್ ವಿಮಾನವು ರಾತ್ರಿ 7 ಗಂಟೆಗೆ ಟೇಕ್ ಆಫ್ಗೆ ಸಿದ್ಧವಾಗುತ್ತಿತ್ತು. ಆದರೆ ಅಷ್ಟರಲ್ಲಾಗಲೇ ಪ್ರಯಾಣಿಕನೋರ್ವ ವಿಮಾನದಿಂದ ಹೊರಹೋಗಲು ಹಾರುವ ಪ್ರಯತ್ನ ಮಾಡಿದ್ದಾನೆ ಎನ್ನಲಾಗಿದೆ.
ಮೊದಲಿಗೆ ಕಾಕ್ಪಿಟ್ನೊಳಗೆ ಪ್ರವೇಶಿಸಲು ಪ್ರಯತ್ನಿಸಿದ ಈ ಪ್ರಯಾಣಿಕ ಬಳಿಕ ಸರ್ವೀಸ್ ಡೋರನ್ನು ತೆಗೆಯಲು ಸಫಲನಾಗಿ, ಎಮರ್ಜೆನ್ಸಿ ಸ್ಲೈಡ್ನ ಮೂಲಕ ಟರ್ಮಾಕ್ಗೆ ಹಾರಿದ್ದಾನೆ. ಟ್ಯಾಕ್ಸಿವೇ ತಲುಪಿದ ಈ ಪ್ರಯಾಣಿಕನನ್ನು ಬಂಧಿಸಿ, ತದನಂತರ ಆಸ್ಪತ್ರೆಗೆ ಕರೆದೊಯ್ಯಲಾಗಿದೆ. ಆದರೆ ಆತನ ಜೀವಕ್ಕೆ ಅಪಾಯವಾಗುವಂಥ ಯಾವುದೇ ಏಟು ದೇಹಕ್ಕಾಗಿಲ್ಲ ಎಂದು ವಿಮಾನ ನಿಲ್ದಾಣದ ಅಧಿಕಾರಿಗಳು ತಿಳಿಸಿದ್ದಾರೆ.
