ತೆಲಂಗಾಣದಲ್ಲಿ ಭೀಕರ ಹತ್ಯೆ: ಖಾಸಗಿ ಶಾಲೆಯ ಲೇಡಿ ಪ್ರಿನ್ಸಿಪಾಲ್ ಚಾಕುವಿನಿಂದ 27 ಬಾರಿ ಇರಿದು ಕೊಲೆ! Telangana school principal found dead at home with 27 stab wounds

 

ಮನೆಯಲ್ಲಿ ಯಾರೂ ಇಲ್ಲದ ವೇಳೆ ನುಗ್ಗಿ ಖದೀಮರ ಕೃತ್ಯ; ಹೈದರಾಬಾದ್‌ನಿಂದ ಬಂದ ಮರುದಿನವೇ ದುರಂತ!

ನಲ್ಗೊಂಡ (ತೆಲಂಗಾಣ):

ಖಾಸಗಿ ಶಾಲೆಯೊಂದರ ಮಹಿಳಾ ಪ್ರಿನ್ಸಿಪಾಲ್ ಹಾಗೂ ಡೈರೆಕ್ಟರ್ ಆಗಿದ್ದ 48 ವರ್ಷದ ಮಹಿಳೆಯೊಬ್ಬರನ್ನು ಅವರ ನಿವಾಸದಲ್ಲೇ ದುಷ್ಕರ್ಮಿಗಳು ಅತಿ ಭೀಕರವಾಗಿ ಚಾಕುವಿನಿಂದ 27 ಬಾರಿ ಇರಿದು ಕೊಲೆ ಮಾಡಿರುವ ಘಟನೆ ತೆಲಂಗಾಣದ ನಲ್ಗೊಂಡ ಜಿಲ್ಲೆಯ ಕೊಂಡಮಲ್ಲೇಪಲ್ಲಿಯ ಜೆಬಿ ಕಾಲೋನಿಯಲ್ಲಿ ಗುರುವಾರ ಬೆಳಕಿಗೆ ಬಂದಿದೆ.

ಕಲ್ಲು ರೂಪಾ ರೆಡ್ಡಿ (48) ಭೀಕರವಾಗಿ ಕೊಲೆಯಾದ ದುರ್ದೈವಿ. ಈಕೆ ಕೊಂಡಮಲ್ಲೇಪಲ್ಲಿಯ ನಾಗಾರ್ಜುನ ಪಬ್ಲಿಕ್ ಶಾಲೆಯ ಪ್ರಿನ್ಸಿಪಾಲ್ ಹಾಗೂ ನಿರ್ದೇಶಕಿಯಾಗಿ ಸೇವೆ ಸಲ್ಲಿಸುತ್ತಿದ್ದರು.

ಮನೆಯಲ್ಲಿ ಒಬ್ಬರೇ ಇದ್ದಾಗ ನಡೆದ ಕೃತ್ಯ:

ಪೋಲಿಸ್ ಮೂಲಗಳ ಪ್ರಕಾರ, ರೂಪಾ ರೆಡ್ಡಿ ಹಾಗೂ ಅವರ ಪತಿ ರಾಜೇಂದರ್ ರೆಡ್ಡಿ ಅವರಿಗೆ ಹೈದರಾಬಾದ್‌ನಲ್ಲೂ ಸ್ವಂತ ಮನೆಯಿದ್ದು, ಅವರ ಮಗ ಅಭಿನವ್ ರೆಡ್ಡಿ ಹೈದರಾಬಾದ್‌ನಲ್ಲಿ ಎಂಜಿನಿಯರಿಂಗ್ ವ್ಯಾಸಂಗ ಮಾಡುತ್ತಿದ್ದಾನೆ. ಇತ್ತೀಚಿನ ಮೂರು ದಿನಗಳ ಸತತ ರಜೆಯ ಹಿನ್ನೆಲೆಯಲ್ಲಿ ರೂಪಾ ರೆಡ್ಡಿ ತಮ್ಮ ಪತಿಯೊಂದಿಗೆ ಹೈದರಾಬಾದ್‌ಗೆ ತೆರಳಿದ್ದರು.

ಮಂಗಳವಾರ ಅಷ್ಟೇ ರೂಪಾ ರೆಡ್ಡಿ ಒಬ್ಬರೇ ಕೊಂಡಮಲ್ಲೇಪಲ್ಲಿಗೆ ಮರಳಿದ್ದರು. ದಿನವಿಡೀ ಶಾಲೆಯಲ್ಲಿದ್ದು ಸಂಜೆ 6:30ರ ಸುಮಾರಿಗೆ ಮನೆಗೆ ಬಂದಿದ್ದರು. ಪತಿ ರಾಜೇಂದರ್ ರೆಡ್ಡಿ ಕೆಲಸದ ನಿಮಿತ್ತ ಹೈದರಾಬಾದ್‌ನಲ್ಲೇ ಉಳಿದುಕೊಂಡಿದ್ದರು.

ಪತಿಯ ಕರೆಗೆ ಸಿಗದಿದ್ದಾಗ ಬೆಳಕಿಗೆ ಬಂದ ಘಟನೆ:

ಬುಧವಾರ ಬೆಳಿಗ್ಗೆ ಪತಿ ರಾಜೇಂದರ್ ರೆಡ್ಡಿ ತಮ್ಮ ಪತ್ನಿ ರೂಪಾ ಅವರಿಗೆ ಸತತವಾಗಿ ಕರೆ ಮಾಡಿದ್ದಾರೆ. ಆದರೆ ಮೊಬೈಲ್ ಫೋನ್ ಸ್ವಿಚ್ ಆಫ್ ಬಂದಿದ್ದರಿಂದ ಅನುಮಾನಗೊಂಡು, ಅದೇ ಕಟ್ಟಡದಲ್ಲಿ ಬಾಡಿಗೆಗಿದ್ದವರ ಬಳಿ ವಿಷಯ ತಿಳಿಸಿ ವಿಚಾರಿಸಲು ಕೋರಿದ್ದಾರೆ. ಬಾಡಿಗೆದಾರರು ಹೋಗಿ ಬಾಗಿಲು ತಟ್ಟಿದರೂ ಯಾವುದೇ ಸ್ಪಂದನೆ ಸಿಗಲಿಲ್ಲ.

ಕೂಡಲೇ ಪತಿ ರಾಜೇಂದರ್ ತಮ್ಮ ಮನೆಯ ಸಮೀಪವೇ ವಾಸವಿದ್ದ ಚಿಂತಪಲ್ಲಿ ಸಬ್-ಇನ್ಸ್‌ಪೆಕ್ಟರ್ ರಾಮಮೂರ್ತಿ ಅವರಿಗೆ ಕರೆ ಮಾಡಿ ವಿಷಯ ತಿಳಿಸಿದ್ದಾರೆ. ಪೊಲೀಸರು ಹಾಗೂ ಸ್ಥಳೀಯರು ಸ್ಥಳಕ್ಕೆ ಧಾವಿಸಿ ಮನೆ ಪ್ರವೇಶಿಸಿದಾಗ ರೂಪಾ ರೆಡ್ಡಿ ರಕ್ತದ ಮಡುವಿನಲ್ಲಿ ಶವವಾಗಿ ಬಿದ್ದಿರುವುದು ಕಂಡುಬಂದಿದೆ.

ದೇಹದಾದ್ಯಂತ 27 ಚಾಕು ಇರಿತದ ಗಾಯಗಳು!

ಪೊಲೀಸ್ ಕಮಿಷನರೇಟ್‌ನ ತನಿಖಾ ತಂಡಗಳು ತಕ್ಷಣವೇ ಸ್ಥಳಕ್ಕೆ ಆಗಮಿಸಿ ಪರಿಶೀಲನೆ ನಡೆಸಿದ್ದು, ಪ್ರಾಥಮಿಕ ಮಾಹಿತಿಯಂತೆ ಆರೋಪಿಗಳು ರೂಪಾ ಅವರ ದೇಹದಾದ್ಯಂತ ಬರೋಬ್ಬರಿ 27 ಬಾರಿ ಚಾಕುವಿನಿಂದ ಇರಿದು ಕೊಲೆ ಮಾಡಿರುವುದು ದೃಢಪಟ್ಟಿದೆ.

ಕೊಲೆಗೆ ನಿಖರವಾದ ಕಾರಣ ತಿಳಿದುಬಂದಿಲ್ಲ. ಹಂತಕರು ಪರಿಚಿತರೇ ಅಥವಾ ಕಳ್ಳತನಕ್ಕೆ ಬಂದವರೇ ಎಂಬುದರ ಕುರಿತು ಸಿಸಿಟಿವಿ ಫೂಟೇಜ್, ಕಾಲ್ ಡಿಟೇಲ್ಸ್ (CDR) ಹಾಗೂ ತಾಂತ್ರಿಕ ಸಾಕ್ಷ್ಯಗಳ ಆಧಾರದಲ್ಲಿ ಪೊಲೀಸರು ತನಿಖೆ ಚುರುಕುಗೊಳಿಸಿದ್ದಾರೆ.