ಸಿನಿಮಾ ಅವಕಾಶಕ್ಕಾಗಿ ಹೋದಾಗ ಕೈ ಹಿಡಿದು ಎಳೆದ ನಿರ್ದೇಶಕ; ದಕ್ಷಿಣದ ಫಿಲ್ಮ್ ಮೇಕರ್ ಬಗ್ಗೆ ಶಾಕಿಂಗ್ ವಿಚಾರ ಬಿಚ್ಚಿಟ್ಟ ನಟಿ ಡೈಸಿ ಶಾ!

ಬಾಲಿವುಡ್ ನಟಿ ಡೈಸಿ ಶಾ, ಚಿತ್ರರಂಗದ ಆರಂಭಿಕ ದಿನಗಳಲ್ಲಿ ತಮಗಾದ ಕಹಿ ಅನುಭವವೊಂದನ್ನು ಹಂಚಿಕೊಂಡಿದ್ದಾರೆ. ದಕ್ಷಿಣ ಭಾರತದ ಖ್ಯಾತ ಚಿತ್ರನಿರ್ಮಾಪಕರೊಬ್ಬರು ತಮಗೆ ಕಿರುಕುಳ ನೀಡಲು ಯತ್ನಿಸಿದ ಘಟನೆಯನ್ನು ನೆನಪಿಸಿಕೊಂಡಿರುವ ಅವರು, ಸಿನಿಮಾ ರಂಗದ ಕರಾಳ ಮುಖವನ್ನು ಅನಾವರಣ ಮಾಡಿದ್ದಾರೆ.

ನಡೆದಿದ್ದೇನು?

ಇತ್ತೀಚಿನ ಸಂದರ್ಶನವೊಂದರಲ್ಲಿ ಮಾತನಾಡಿದ ಡೈಸಿ ಶಾ, "ಸಿನಿಮಾ ಪಾತ್ರವೊಂದರ ಆಯ್ಕೆಗಾಗಿ ದಕ್ಷಿಣದ ಖ್ಯಾತ ನಿರ್ದೇಶಕರೊಬ್ಬರನ್ನು ಭೇಟಿಯಾಗಲು ಹೋಗಿದ್ದೆ. ಆ ನಿರ್ದೇಶಕರು ಮುಂಬೈಗೆ ಬಂದಿದ್ದರು. ನಮ್ಮೊಂದಿಗೆ ಸುಮಾರು 6-7 ಹುಡುಗಿಯರಿದ್ದರು. ಅವರು ಪ್ರತಿಯೊಬ್ಬರನ್ನು ವೈಯಕ್ತಿಕವಾಗಿ (individually) ಭೇಟಿಯಾಗುತ್ತಿದ್ದರು. ಆದರೆ ನಾನು ಅವರನ್ನು ಭೇಟಿಯಾದಾಗ ಅವರು ನನ್ನ ಕೈ ಹಿಡಿದು ಅನುಚಿತವಾಗಿ ವರ್ತಿಸಿದರು. ಆ ಕ್ಷಣವೇ ನನಗೆ ತುಂಬಾ ಅಸಹನೀಯ ಎನಿಸಿತು," ಎಂದು ಹೇಳಿದ್ದಾರೆ.

"ಸ್ಪರ್ಶ ಅಂದ್ರೆ ನನಗೆ ಇಷ್ಟವಿಲ್ಲ"

ತಮ್ಮ ವೈಯಕ್ತಿಕ ಸ್ವಭಾವದ ಬಗ್ಗೆಯೂ ಹೇಳಿಕೊಂಡಿರುವ ಅವರು, "ನನಗೆ ಯಾರೇ ಆಗಲಿ ಮುಟ್ಟುವುದು ಇಷ್ಟವಾಗುವುದಿಲ್ಲ. ಮಹಿಳೆಯರೇ ಮಸಾಜ್ ಮಾಡುವುದೂ ನನಗೆ ಇಷ್ಟವಿಲ್ಲ, ಇನ್ನು ಪುರುಷರು ಮುಟ್ಟುವುದೆಂದರೆ ಅದು ಬೇರೆಯದೇ ವಿಚಾರ. ಆ ನಿರ್ದೇಶಕರು ಕೈ ಹಿಡಿದ ಕೂಡಲೇ ನಾನು ಅಲ್ಲಿಂದ ಹೊರಬರಲು ನಿರ್ಧರಿಸಿದೆ. 'ನಾನು ನಿಮಗೆ ನಂತರ ತಿಳಿಸುತ್ತೇನೆ' ಎಂದು ಹೇಳಿ ಬಂದವಳು ಮತ್ತೆಂದೂ ಅವರತ್ತ ಮುಖ ಮಾಡಲಿಲ್ಲ," ಎಂದು ಕಹಿ ಘಟನೆಯನ್ನು ವಿವರಿಸಿದ್ದಾರೆ.

ಹೊಸ ನಟಿಯರಿಗೆ ಡೈಸಿ ಶಾ ಕಿವಿಮಾತು

ಈ ಘಟನೆಯಿಂದ ತಾವು ಒಂದು ದೊಡ್ಡ ಪಾಠ ಕಲಿತಿದ್ದಾಗಿ ಡೈಸಿ ಹೇಳಿದ್ದಾರೆ. "ಯಾವುದೇ ಕಾರಣಕ್ಕೂ ಅಪರಿಚಿತರನ್ನು ಒಂಟಿಯಾಗಿ ಭೇಟಿಯಾಗಬಾರದು ಎಂಬುದು ನನಗೆ ಅಂದು ಅರ್ಥವಾಯಿತು," ಎಂದು ಅವರು ಹೊಸದಾಗಿ ಸಿನಿಮಾ ರಂಗಕ್ಕೆ ಬರುವವರಿಗೆ ಎಚ್ಚರಿಕೆ ನೀಡಿದ್ದಾರೆ.

ಸಲ್ಮಾನ್ ಖಾನ್ ನೆರವು ಮತ್ತು ವೃತ್ತಿಜೀವನ

ಸಲ್ಮಾನ್ ಖಾನ್ ಅವರ 'ಜೈ ಹೋ' ಸಿನಿಮಾ ಮೂಲಕ ಬಾಲಿವುಡ್‌ಗೆ ಪಾದಾರ್ಪಣೆ ಮಾಡಿದ ಡೈಸಿ ಶಾ, 'ರೇಸ್ 3' ಮತ್ತು 'ಹೇಟ್ ಸ್ಟೋರಿ 3' ಅಂತಹ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಕೇವಲ ಸಲ್ಮಾನ್ ಖಾನ್ ಬೆಂಬಲದಿಂದಲೇ ಅವರ ಕೆರಿಯರ್ ನಡೆಯುತ್ತಿದೆ ಎಂಬ ಟೀಕೆಗಳಿಗೂ ಅವರು ಉತ್ತರಿಸಿದ್ದಾರೆ. "ಯಾರಾದರೂ ಬೆಳೆಸುತ್ತಿದ್ದಾರೆ ಎಂದರೆ ಅದರಲ್ಲಿ ತಪ್ಪೇನಿಲ್ಲ. ಇಂದು ನಾನು ಯಾರಿಗಾದರೂ ಸಹಾಯ ಮಾಡಿದರೆ, ಅದು ಹಿಂದೆ ಯಾರೋ ನನಗೆ ಸಹಾಯ ಮಾಡಿದ್ದರಿಂದ ಬಂದ ಚಕ್ರವಷ್ಟೇ. ಈಗ ಇಂತಹ ಟೀಕೆಗಳಿಗೆ ನಾನು ತಲೆಕೆಡಿಸಿಕೊಳ್ಳುವುದಿಲ್ಲ," ಎಂದು ಅವರು ಖಡಕ್ ಆಗಿ ಹೇಳಿದ್ದಾರೆ.

ಸದ್ಯ ಡೈಸಿ ಶಾ ಅವರು ಶ್ರೇಯಸ್ ತಲ್ಪಾಡೆ ಅವರೊಂದಿಗೆ ಮುಂಬೈ ಮೂಲದ ಥ್ರಿಲ್ಲರ್ ಸಿನಿಮಾವೊಂದರಲ್ಲಿ ನಟಿಸುತ್ತಿದ್ದಾರೆ.