ಬಂಗೀ ಜಂಪಿಂಗ್ ವೇಳೆ ಬಾಯ್ಫ್ರೆಂಡ್ ನೀಡಿದ ರಾಂಗ್ ಸಿಗ್ನಲ್ ನಿಂದಾಗಿ ಯುವತಿ ಸಾವು..!!
Sunday, July 25, 2021
ಬೊಗತಾ: ಬಂಗೀ ಜಂಪಿಂಗ್ ವೇಳೆ ರೋಪ್ ಅಳವಡಿಸುವುದಕ್ಕೂ ಮುನ್ನ ತಪ್ಪಾದ ಸಿಗ್ನಲ್ನಿಂದಾಗಿ ಯುವತಿಯೊಬ್ಬಳು ದುರಂತ ಸಾವಿಗೀಡಾಗಿರುವ ಘಟನೆ ಉತ್ತರ ಕೊಲಂಬಿಯಾದಲ್ಲಿ ನಡೆದಿದೆ.
ಯೆಸಿನಿಯಾ ಮೊರಾಲೆಸ್ (25) ಮೃತ ದುರ್ದೈವಿ. ಉತ್ತರ ಕೊಲಂಬಿಯಾದಲ್ಲಿರುವ 40 ಮೀಟರ್ ಎತ್ತರದ ಸೇತುವೆಯಿಂದ ಕೆಳಗೆ ಬಿದ್ದು ದಾರುಣವಾಗಿ ಮೃತಪಟ್ಟಿದ್ದಾಳೆ. ಬಾಯ್ಫ್ರೆಂಡ್ ನೀಡಿದ “ಗೋ” ಸಿಗ್ನಲ್ನಿಂದ ಬಂಗೀ ಜಿಗಿತ ಮಾಡಿದ ಯುವತಿ ಸಾವನ್ನಪ್ಪಿದ್ದಾಳೆ.
ಬಂಗೀ ಜಂಪಿಂಗ್ ವೇಳೆ ತಮ್ಮ ಸರದಿ ಬಂದಾಗ ಮೊದಲು ಯೆಸಿನಿಯಾ ತೆರಳಿದಳು. ಅವಳ ಹಿಂದೆಯೇ ಬಾಯ್ಫ್ರೆಂಡ್ ಇದ್ದ. ಬಂಗೀ ರೋಪ್ ಅನ್ನು ಆಕೆಯ ಕಾಲುಗಳಿಗೆ ಇನ್ನು ಅಳವಡಿಸಿಯೇ ಇರಲಿಲ್ಲ. ಇದೇ ವೇಳೆ ಆಕೆಯ ಬಾಯ್ಫ್ರೆಂಡ್ “ಗೋ” ಎಂದು ಸಿಗ್ನಲ್ ನೀಡಿದ್ದನ್ನು ತಪ್ಪಾಗಿ ಅರ್ಥೈಸಿಕೊಂಡ ಯೆಸಿನಿಯಾ ಸೇತುವೆಯಿಂದ ಕೆಳಗೆ ಜಿಗಿದಿದ್ದಾಳೆ. ಕೆಳಗೆ ಬೀಳುವಾಗ ಶಾಕ್ನಿಂದ ಗಾಳಿಯಲ್ಲೇ ಆಕೆಗೆ ತೀವ್ರ ಹೃದಯಾಘಾತವಾಗಿದೆ. ತುರ್ತುಸೇವೆ ಆಗಮಿಸುವಷ್ಟರಲ್ಲಿ ಆಕೆ ಸಾವನ್ನಪ್ಪಿದ್ದಾಳೆ.
