ಲಂಡನ್, ಸೆ.8: ‘‘ಯುರೋಪ್‌ನಲ್ಲಿ ಕ್ರೈಸ್ತರು ಹೆಚ್ಚಿನ ಸಂಖ್ಯೆಯ ಮಕ್ಕಳನ್ನು ಹೊಂದಬೇಕು. ಇಲ್ಲವಾದಲ್ಲಿ ಸಂಪೂರ್ಣವಾಗಿ ಈ ಖಂಡವು ಇಸ್ಲಾಮೀ ಕರಣಗೊಳ್ಳಲಿದೆ’’ ಎಂದು ವ್ಯಾಟಿಕನ್‌ನ ಅಧಿಕಾರಿಯೊಬ್ಬರು ಅಭಿಪ್ರಾಯಿಸಿದ್ದಾರೆ. ಇಸ್ಲಾಂ ಧರ್ಮವು ಹೆಚ್ಚು ಅವಧಿಯನ್ನು ತೆಗೆದುಕೊಳ್ಳದೆ ಅತಿ ಶೀಘ್ರದಲ್ಲೇ ಯುರೋಪ್‌ನ ಬಹುತೇಕ ಜನರ ಮನಸ್ಸನ್ನು ಗೆಲ್ಲಲಿದೆ’’ ಎಂದೂ ಅವರು ಭವಿಷ್ಯ ನುಡಿದಿದ್ದಾರೆ.

ಯುರೋಪಿಯನ್ನರಲ್ಲಿರುವ ಕಡಿಮೆ ಜನನ ಪ್ರಮಾಣ ಹಾಗೂ ಮುಸ್ಲಿಂ ವಲಸೆಗಾರರ ಆಗಮನವು ಯುರೋಪ್ ಸದ್ಯದಲ್ಲೇ ಇಸ್ಲಾಂ ಪ್ರಾಬಲ್ಯಕ್ಕೆ ಈಡು ಮಾಡಲಿದೆ ಎಂದು ಇಟಲಿಯ ಪಾದ್ರಿ ಪಿಯೆರೊ ಡ್ಡೊ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ‘‘ಈ ಸವಾಲನ್ನು ಗಂಭೀರವಾಗಿ ಪರಿಗಣಿಸಬೇಕಾಗಿದೆ’’ ಎಂದು ವ್ಯಾಟಿಕನ್‌ನ ಪಾಂಟಿಫಿಕಲ್ ಇನ್‌ಸ್ಟಿಟ್ಯೂಟ್ ಫಾರ್ ಫಾರಿನ್ ಮಿಶನ್ಸ್‌ನ ಪಾದ ಡ್ಡೊರನ್ನು ಉಲ್ಲೇಖಿಸಿ ‘ಡೈಲಿ ಟೆಲಿಗ್ರಾಫ್’ ವರದಿ ಮಾಡಿದೆ.

‘‘ಜನಸಂಖ್ಯಾ ನಕ್ಷೆಯನ್ನು ಪರಿಗಣಿಸಿ ಹೇಳುವುದಾದಲ್ಲಿ, ಗರ್ಭಪಾತ ಹಾಗೂ ಕುಟುಂಬಗಳ ನಡುವಿನ ಒಡಕಿನಿಂದಾಗಿ ಪ್ರತಿವರ್ಷ ಇಟಲಿಯನ್ ಜನಸಂಖ್ಯೆಯಲ್ಲಿ 1,20,000 ಅಥವಾ 1,30,000 ಗಳಷ್ಟು ಇಳಿಮುಖ ಕಾಣುತ್ತಿದೆ. ಇದೇ ವೇಳೆ ಪ್ರತಿವರ್ಷ ಇಟಲಿಗೆ ಸುಮಾರು 2 ಲಕ್ಷಕ್ಕಿಂತಲೂ ಅಧಿಕ ಕಾನೂನು ಬದ್ಧ ವಲಸೆಗಾರರು ಆಗಮಿಸುತ್ತಿದ್ದು, ಅವರಲ್ಲಿ ಅರ್ಧಕ್ಕಿಂತಲೂ ಅಧಿಕ ಮಂದಿ ಮುಸ್ಲಿಮರಾಗಿದ್ದಾರೆ. ಇದು ಹೆಚ್ಚಿನ ಏರಿಕೆ ಪ್ರಮಾಣವನ್ನು ಹೊಂದಿದೆ’’ ಎಂದು ಅವರು ವಿವರಿಸಿದ್ದಾರೆ.

‘‘ಸುದ್ದಿಪತ್ರಿಕೆಗಳು ಅಥವಾ ದೂರದರ್ಶನ ಕಾರ್ಯಕ್ರಮಗಳು ಈ ಬಗ್ಗೆ ವಿವರ ನೀಡುವುದಿಲ್ಲ. ಆದರೂ ಧಾರ್ಮಿಕ, ಸಾಂಸ್ಕೃತಿಕ ವಲಯ ಹಾಗೂ ಅಸ್ತಿತ್ವದ ದೃಷ್ಟಿಯಿಂದ ಇದಕ್ಕೊಂದು ಉತ್ತರ ನೀಡುವ ಅಗತ್ಯವಿದೆ’’ ಎಂದು ಅವರು ಅಭಿಪ್ರಾಯಿಸಿದ್ದಾರೆ. ‘‘ತಮ್ಮ ನಂಬಿಕೆಗಳಿಗೆ ಬದ್ಧರಾಗಿ ನಡೆದುಕೊಳ್ಳುವಲ್ಲಿ ವಿಫಲರಾಗಿರುವುದಕ್ಕೆ ಕ್ರೈಸ್ತರೇ ಸ್ವಯಂ ಹೊಣೆಗಾರರಾಗಿದ್ದಾರೆ ಹಾಗೂ ಇದು ಒಂದು ‘ಧಾರ್ಮಿಕ ನಿರ್ವಾತ ಪ್ರದೇಶ’ವನ್ನು ಸೃಷ್ಟಿಸಿ ಅದನ್ನು ಇಸ್ಲಾಂ ತುಂಬುವಂತೆ ಮಾಡಿದೆ’’ ಎಂದು ಅವರು ತಿಳಿಸಿ ದ್ದಾರೆ.

‘‘ಯುರೋಪ್‌ನ ಬಹುತೇಕ ಭಾಗವನ್ನು ಇಸ್ಲಾಂ ಅತಿ ಶೀಘ್ರದಲ್ಲೇ ವ್ಯಾಪಿಸಲಿದೆ’’ ಎಂದೂ ಅವರು ಹೇಳಿದ್ದಾರೆ. ‘‘ನಾವು ಇದನ್ನೊಂದು ಕ್ರೈಸ್ತ ರಾಷ್ಟ್ರವಾಗಿ ಪರಿಗಣಿಸುವುದಾದಲ್ಲಿ ನಾವು ಆ ಜೀವನ ಪದ್ಧತಿಯನ್ನು ಅನುಸರಿಸುವ ಕಡೆಗೆ ಗಮನ ಹರಿಸಬೇಕಾಗುತ್ತದೆ. ಇದರಿಂದ ಸಮಸ್ಯೆಯನ್ನು ಬಗೆಹರಿಸಬಹುದಾಗಿದೆ’’ ಎಂದೂ ಅವರು ಅಭಿಪ್ರಾಯಿಸಿದ್ದಾರೆ.

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ಕೃಪೆ : ವಾರ್ತಾ ಭಾರತಿ ವರದಿಗಾರರು : ಗಲ್ಫ್ ಕನ್ನಡಿಗ ವರದಿಗಾರರು ಪ್ರಕಟಿಸಿದ ದಿನಾಂಕ : 2010-09-09 00:00:00