ಆಸ್ಟ್ರೇಲಿಯ: ಸರಕಾರ ರಚನೆಗೆ ಗಿಲ್ಲಾರ್ಡ್ ಸಿದ್ಧತೆ |
ಪ್ರಕಟಿಸಿದ ದಿನಾಂಕ : 2010-09-08
ಆಸ್ಟ್ರೇಲಿಯನ್ ಪ್ರಧಾನಿ ಜೂಲಿಯಾ ಗಿಲ್ಲಾರ್ಡ್
ಮೆಲ್ಬರ್ನ್ : ಇಬ್ಬರು ಪಕ್ಷೇತರ ಸದಸ್ಯರು ಲೇಬರ್ ಪಕ್ಷಕ್ಕೆ ಬೆಂಬಲ ನೀಡುವ ಭರವಸೆ ನೀಡಿದ ಹಿನ್ನೆಲೆಯಲ್ಲಿ ಕಳೆದ 70 ವರ್ಷಗಳ ಬಳಿಕ ಇದೇ ಮೊದಲ ಬಾರಿಗೆ ದೇಶದ ಪ್ರಥಮ ಅಲ್ಪಸಂಖ್ಯಾತ ಸರಕಾರದ ನೇತೃತ್ವ ವಹಿಸಲು ಆಸ್ಟ್ರೇಲಿಯನ್ ಪ್ರಧಾನಿ ಜೂಲಿಯಾ ಗಿಲ್ಲಾರ್ಡ್ ಎಲ್ಲ ಸಿದ್ಧತೆ ಕೈಗೊಂಡಿದ್ದಾರೆ. ಆಗಸ್ಟ್ 21 ರಂದು ನಡೆದಿದ್ದ ಚುನಾವಣೆಯಲ್ಲಿ ಗಿಲ್ಲಾರ್ಡ್ ಅವರ ಲೇಬರ್ ಪಕ್ಷ ಸೇರಿದಂತೆ ಯಾವುದೇ ಪಕ್ಷಕ್ಕೆ ಬಹುಮತ ಪ್ರಾಪ್ತವಾಗಿರಲಿಲ್ಲ.
ಗ್ರಾಮೀಣ ಪ್ರದೇಶದ ಇಬ್ಬರು ಪಕ್ಷೇತರ ಸದಸ್ಯರಾದ ಟೋನಿ ವಿಂಡ್ಸರ್ ಹಾಗೂ ರಾಬ್ಓಕೆಶಾಟ್ ಅವರು ಲೇಬರ್ ಪಕ್ಷವನ್ನು ಬೆಂಬಲಿಸುವ ಭರವಸೆ ನೀಡಿದ್ದು, ನೂತನ ಸರಕಾರ ರಚನೆಗೆ ಪಕ್ಷ ಸಿದ್ಧತೆ ನಡೆಸಿದೆ. ಇದರೊಂದಿಗೆ 1943 ರ ಬಳಿಕ ಇದೇ ಮೊದಲ ಬಾರಿಗೆ ತ್ರಿಶಂಕು ಸಂಸತ್ ರಚನೆಯಾದ ಹಿನ್ನೆಲೆಯಲ್ಲಿ ಕಳೆದೆರಡು ವಾರಗಳಿಂದ ಏರ್ಪಟ್ಟಿದ್ದ ರಾಜಕೀಯ ಬಿಕ್ಕಟ್ಟು ಕೊನೆಗೊಂಡಿದೆ ಎಂದು ಗಿಲ್ಲಾರ್ಡ್ ಹೇಳಿದ್ದಾರೆ.
ಆಸ್ಟ್ರೇಲಿಯನ್ ಜನತೆ ತ್ರಿಶಂಕು ಸಂಸತ್ ಪರ ಮತಚಲಾಯಿಸಿದ ಹಿನ್ನೆಲೆಯಲ್ಲಿ ರಾಷ್ಟ್ರದ ಹಿತದೃಷ್ಟಿಯಿಂದ ಪಕ್ಷೇತರರ ಜೊತೆ ಸೇರಿ ಸರಕಾರ ರಚಿಸಬೇಕಿದೆ ಎಂದು ಅವರು ಹೇಳಿದರು. 150 ಸದಸ್ಯ ಬಲದ ಸಂಸತ್ನಲ್ಲಿ ಲೇಬರ್ ಪಕ್ಷಕ್ಕೆ ಪ್ರಸ್ತುತ 76 ಸ್ಥಾನಗಳು ಲಭಿಸಿವೆ. ವಿಪಕ್ಷ ಲಿಬರಲ್ ಮೈತ್ರಿಕೂಟವು 74 ಸದಸ್ಯ ಬಲವನ್ನು ಹೊಂದಿದೆ.
ಪಕ್ಷದಲ್ಲಿನ ಬಂಡಾಯದ ಹಿನ್ನೆಲೆಯಲ್ಲಿ ಹತ್ತು ವಾರಗಳ ಹಿಂದೆಯಷ್ಟೇ ಆಸ್ಟ್ರೇಲಿಯದ ಪ್ರಥಮ ಮಹಿಳಾ ಪ್ರಧಾನಿಯಾಗಿ ಅಧಿ ಕಾರ ವಹಿಸಿಕೊಂಡಿದ್ದ ಗಿಲ್ಲಾರ್ಡ್ ಅವರು ಮುಂದಿನ ವಾರ ನೂತನ ಸರಕಾರ ರಚಿಸುವ ಸಾಧ್ಯತೆಗಳಿವೆ.
ವರದಿಯ ವಿವರಗಳು |
 |
ವರದಿಗಾರರು : ಗಲ್ಫ್ ಕನ್ನಡಿಗ ವರದಿಗಾರರು
ಪ್ರಕಟಿಸಿದ ದಿನಾಂಕ : 2010-09-08 00:00:00
|
|
|
