ಡಿಸ್ಕವರಿ ಚಾನೆಲ್ ಬಿತ್ತರಿಸುವ ಕಾರ್ಯಕ್ರಮಗಳನ್ನು ವಿರೋಧಿಸಿ ಪರಿಸರವಾದಿಯೊಬ್ಬ ಬುಧವಾರ ಇಲ್ಲಿಯ ಚಾನೆಲ್ ಕೇಂದ್ರ ಕಚೇರಿಯಲ್ಲಿ ಮೂವರನ್ನು ಒತ್ತೆಯಾಳುಗಳನ್ನಾಗಿ ಹಿಡಿದಿಟ್ಟುಕೊಂಡಿದ್ದ ಪ್ರಕರಣ ಕೊನೆಗೂ ಸುಖಾಂತ್ಯ ಕಂಡಿದೆ.   

ವಾಷಿಂಗ್ಟನ್, (ಐಎಎನ್‌ಎಸ್/ಪಿಟಿಐ): ಒತ್ತೆಯಾಳುಗಳನ್ನು ಹಿಡಿದಿಟ್ಟುಕೊಂಡಿದ್ದ 43 ವರ್ಷದ ಪರಿಸರವಾದಿ ಜೇಮ್ಸ್ ಲೀಯನ್ನು ಪೊಲೀಸರು ಸತತ ನಾಲ್ಕು ತಾಸುಗಳ ಕಾರ್ಯಾಚರಣೆಯಲ್ಲಿ ಗುಂಡಿಟ್ಟು ಕೊಂದು ಮೂವರನ್ನು ಸುರಕ್ಷಿತವಾಗಿ ಪಾರು ಮಾಡಿದರು.

ಒತ್ತೆಯಾಳುಗಳನ್ನು ಬಿಡುಗಡೆ ಮಾಡುವಂತೆ ಆತನ ಮನವೊಲಿಸಲು ಪೊಲೀಸರು ಹಲವು ಗಂಟೆಗಳ ಕಾಲ ಮಾತುಕತೆ ನಡೆಸಿದ್ದರು.

ಕಾರ್ಯಾಚರಣೆ ನಡೆಸಿ ಆತನ ಮೇಲೆ ಗುಂಡು ಹಾರಿಸಿದಾಗ ಆತ ದೇಹದಲ್ಲಿ ಕಟ್ಟಿಕೊಂಡಿದ್ದ ಸ್ಫೋಟಕವೊಂದು ಸಿಡಿಯಿತು. ಆತನ ಬಳಿಯಿದ್ದ ಎರಡು ಪೆಟ್ಟಿಗೆಗಳು ಮತ್ತು ಚೀಲಗಳಲ್ಲಿ ಸ್ಫೋಟಕಗಳಿದ್ದವು. ಮೂವರು ಒತ್ತೆಯಾಳುಗಳು      ಸೇರಿದಂತೆ ಕಟ್ಟಡದಲ್ಲಿದ್ದ 1,900 ಜನರು ಸುರಕ್ಷಿತವಾಗಿದ್ದಾರೆ ಎಂದು ಪೊಲೀಸ್ ಮುಖ್ಯಸ್ಥ ಥಾಮಸ್ ಮಾಂಗರ್ ತಿಳಿಸಿದರು.

ಈ ಮುನ್ನ ಎನ್‌ಬಿಸಿ ಚಾನೆಲ್‌ನ ನಿರ್ಮಾಪಕ ಕಟ್ಟಡಕ್ಕೆ ದೂರವಾಣಿ ಕರೆ ಮಾಡಿದಾಗ ಜೇಮ್ಸ್ ಲೀ ತನ್ನ ಬಳಿ ಬಾಂಬ್ ಹಾಗೂ ಬಂದೂಕು ಇದೆ. ದೇಹದಲ್ಲಿ ಹಲವು ಬಾಂಬ್‌ಗಳನ್ನು ಕಟ್ಟಿಕೊಂಡಿದ್ದು, ಅವುಗಳನ್ನು ಸಿಡಿಸಲು ಸಿದ್ಧನಾಗಿರುವುದಾಗಿ ತಿಳಿಸಿದ್ದನು. ಪರಿಸ್ಥಿತಿ ಹತೋಟಿಗೆ ಬರುವವರೆಗೂ ಈ ಸಂಭಾಷಣೆಯನ್ನು ಎನ್‌ಬಿಸಿ ಬಹಿರಂಗಪಡಿಸಿರಲಿಲ್ಲ.

 ಸಂಧಾನ ಪ್ರಕ್ರಿಯೆ ನಡೆಯುವ ವೇಳೆ ಆತ ವಿವಿಧ ರೀತಿಯ ಭಾವನೆಗಳನ್ನು ವ್ಯಕ್ತಪಡಿಸುತ್ತಿದ್ದ. ಕೆಲವೊಮ್ಮೆ ಕೆರಳುತ್ತಿದ್ದರೆ, ಸ್ವಲ್ಪಹೊತ್ತಿನಲ್ಲಿ   ಶಾಂತನಾಗಿರುತ್ತಿದ್ದ. ಆದರೆ ಡಿಸ್ಕವರಿ ವಿರುದ್ಧದ ಅಸಮಾಧಾನದಿಂದ ಆತ ಹೊರಬಂದಿರಲಿಲ್ಲ.

ಲೀ ಡಿಸ್ಕವರಿಯ ಅಧಿಕಾರಿಗಳಿಗೆ ಪರಿಚಿತನಾಗಿದ್ದನು. 2008ರಲ್ಲಿ ನೆಟ್‌ವರ್ಕ್ ವಿರುದ್ಧ ಪ್ರತಿಭಟನೆ ನಡೆಸಿದ್ದ. ಆದರೆ ಆತನ ಬೇಡಿಕೆ ಮತ್ತು ಬೆದರಿಕೆಗಳನ್ನು    ಗಂಭೀರವಾಗಿ ಪರಿಗಣಿಸಿರಲಿಲ್ಲ ಎಂದು ಚಾನೆಲ್ ವಕ್ತಾರ ಡೇವಿಡ್ ತಿಳಿಸಿದ್ದಾರೆ.

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ವರದಿಗಾರರು : ಗಲ್ಫ್ ಕನ್ನಡಿಗ ವರದಿಗಾರರು ಪ್ರಕಟಿಸಿದ ದಿನಾಂಕ : 2010-09-03 00:00:00