ಪೇಜಾವರ ಶ್ರೀಗಳಿಗೆ ಬಿಎಸ್‌ಪಿ ಹಾಕಿದ ಸವಾಲುಗಳು

ಶ್ರೀಕೃಷ್ಣ ಮಠದ ಪೇಜಾವರ ಸ್ವಾಮಿಗಳಿಗೆ ದಲಿತರ ಬಗ್ಗೆ ನಿಜವಾದ ಕಾಳಜಿ ಇದ್ದಲ್ಲಿ ತಮ್ಮ ಮೂರು ಪ್ರಶ್ನೆಗಳನ್ನು ಈಡೇರಿಸಲು ಮುಂದಾಗಲಿ ಎಂದು ಬಿಎಸ್‌ಪಿ ರಾಜ್ಯ ಪ್ರಧಾನ ಕಾರ್ಯದರ್ಶಿ ಎನ್. ಮಹೇಶ್ ಸವಾಲು ಹಾಕಿದರು.

ಹಿಂದುಧರ್ಮದ ಆಧಾರ ಮನುಧರ್ಮ ಶಾಸ್ತ್ರ. ಹಾಗಾಗಿ ಜಾತಿಯ ಆಧಾರದ ಮೇಲೆ ನಿಂತಿ ರುವ ಮನುಸ್ಮತಿಯನ್ನು ಬಹಿರಂಗವಾಗಿ ಸುಟ್ಟುಹಾಕಲಿ ಎಂದವರು ಸಲಹೆ ನೀಡಿದರು.

ಜನಿವಾರ ಹಾಕುವುದು ಅಸಮಾನತೆಯ ಸಂಕೇತ.  ಉಡುಪಿ ಮಠ, ರಾಘವೇಂದ್ರ ಮಠ ಗಳಲ್ಲಿ ಜನಿವಾರ ಯಾರು ಹಾಕಿದ್ದಾರೆ ಎಂದು ನೋಡಿ ಗರ್ಭಗುಡಿಯೊಳಗೆ ಬಿಡಲಿಕ್ಕಾಗಿ ಮೈಮೇಲಿನ ಬಟ್ಟೆಯನ್ನು ಕಳಚಿಸುತ್ತಾರೆ. ಇದು ಅಸಮಾನತೆಯ ಸಂಕೇತವಲ್ಲವೇ? ಈ ಹಿನ್ನೆಲೆಯಲ್ಲಿ ಬ್ರಾಹ್ಮಣರು ಜನಿವಾರ ಹಾಕೋದನ್ನು ನಿಲ್ಲಿಸಿ ಬಿಡಲಿ ಎಂದು ಸೂಚಿಸಿದರು.

ಅಸ್ಪಶತೆ ಸಂಪೂರ್ಣವಾಗಿ ಹೋಗಬೇಕಾದರೆ ಅಷ್ಟಮಠಗಳಲ್ಲಿ ಒಂದೊಂದು ಮಠಕ್ಕೂ ಒಬ್ಬೊಬ್ಬ ಜಾತಿಯವರನ್ನು ಉತ್ತರಾಧಿಕಾರಿಯಾಗಿ ನೇಮಕಮಾಡಬೇಕು. ಮಾದಿಗ, ಹೊಲೆಯ, ಭಂಗಿ, ಜೋಗಯ್ಯ, ಸೇರಿದಂತೆ ಎಲ್ಲಾ ಅಸ್ಪಶ ಜಾತಿಗಳಿಗೆ ಸೇರಿದವರನ್ನು ಒಂದೊಂದು ಮಠದ ಮಠಾಧಿಪತಿಗಳನ್ನಾಗಿ ನೇಮಕ ಮಾಡುವ ಮೂಲಕ ನೈಜ ಕಾಳಜಿ ತೋರಿಸಲಿ. ಇಲ್ಲವಾದಲ್ಲಿ ಈ ರೀತಿಯ ಬೂಟಾಟಿಕೆಯ ಪಾದಯಾತ್ರೆಯನ್ನು ದಲಿತರು ಧಿಕ್ಕರಿಸಬೇಕು. ಯಾವುದೇ ಕಾರಣಕ್ಕೂ ಮೂರ್ಖರಾಗದಿರುವಂತೆ ಸಲಹೆ ಸಲಹೆ ನೀಡಿದರು

ಚಾಮರಾಜನಗರ, ಸೆ. 2: ದಲಿತರ ಕೇರಿಯಲ್ಲಿ ಪಾದಯಾತ್ರೆ ಮಾಡುತ್ತಿರುವ ಉಡುಪಿ ಶ್ರೀ ಕೃಷ್ಣ ಮಠಾಧಿಪತಿ ಪೇಜಾವರ ಶ್ರೀಗಳು ಗೋಹತ್ಯೆ ನಿಷೇಧ ಕಾಯ್ದೆ ವಿರೋಧಿಸಿ ಚಳವಳಿ ಮಾಡಲಿ ಎಂದು ಬಹುಜನ ಸಮಾಜ ಪಕ್ಷದ ರಾಜ್ಯ ಪ್ರಧಾನ ಕಾರ್ಯದರ್ಶಿ ಎನ್. ಮಹೇಶ್ ಹೇಳಿದ್ದಾರೆ.

ಅವರು ನಗರದಲ್ಲಿ ಸುದ್ದಿಗೋಷ್ಠಿಯನ್ನು ಉದ್ದೇಶಿಸಿ ಮಾತನಾಡಿ, ಪೇಜಾವರ ಶ್ರೀಗಳು ಸಾಂಸ್ಕೃತಿಕ ನಗರಿ ಮೈಸೂರಿನಲ್ಲಿರುವ ದಲಿತರ ಕೇರಿಗೆ ಪಾದಯಾತ್ರೆ ಮೂಲಕ ಬಂದು ಅಲ್ಲಿ ಪೂಜೆ ಮಾಡಿ ಸಮಾನತೆಯ ಬಗ್ಗೆ ಕ್ರಾಂತಿ ಮೂಡಿಸುತ್ತಿರುವುದಾಗಿ ಹೇಳುತ್ತಿರುವುದು ಅವರ ಡೋಂಗಿತನವನ್ನು ಪ್ರದರ್ಶಿಸಿದಂತಾಗಿದೆ ಎಂದು ದೂರಿದರು.

ದಲಿತರು ಮನೆಯಲ್ಲಿ ಮಾಂಸಾಹಾರ ಸ್ವೀಕರಿಸಿದರೆ ತಪ್ಪೇನಿಲ್ಲ ಆದರೆ ಮಧ್ಯಪಾನವನ್ನು ಸಂಪೂರ್ಣ ವಾಗಿ ಬಿಡಬೇಕೆಂದು ಹೇಳಿರುವ ಪೇಜಾವರ ಶ್ರೀಗಳ ಹೇಳಿಕೆಯನ್ನು ಪ್ರಶ್ನೆ ಮಾಡಿದ ಮಹೇಶ್, ರಾಜ್ಯ ಸರಕಾರವು ರಾಜ್ಯದಲ್ಲಿ ಗೋಹತ್ಯೆ ನಿಷೇಧ ಕಾಯ್ದೆಯನ್ನು ಜಾರಿಗೆ ತರಲು ಸಾಹಸ ಮಾಡು ತ್ತಿದೆ ಇದರ ವಿರುದ್ಧ ಪೇಜಾವರ ಶ್ರೀಗಳು ಹೋರಾಟ ನಡೆಸಿದರೆ ತಮ್ಮ ಪಕ್ಷದ ಬೆಂಬಲ ನೀಡುವು ದಾಗಿ ಪ್ರಕಟಿಸಿದರು.

ವಯೋವೃದ್ಧರಾದ ಪೇಜಾವರ ಶ್ರೀಗಳು ದಲಿತರಲ್ಲಿ ಧಾರ್ಮಿಕತೆಯ ಮಂಕುಬೂದಿ ಎರಚಲು ಪ್ರಯ ತ್ನ ಮಾಡುತ್ತಿದ್ದಾರೆ ಎಂದು ಆರೋಪಿಸಿರುವ ಅವರು, ರಾಜ್ಯದಲ್ಲಿರುವ ಬಹುತೇಕ ಗ್ರಾಮಾಂತರ ಪ್ರದೇಶದಲ್ಲಿ ಇಂದಿಗೂ ಶೇ. 70ರಷ್ಟು ಅಸ್ಪಶತೆ ಕಾಡುತ್ತಿದೆ ಇದು ಶ್ರೀಗಳಿಗೆ ತಿಳಿದಿಲ್ಲವೇ ಎಂದು ಹಲವು ಘಟನೆಯನ್ನು ವಿವರಿಸಿದರು.

ರಾಜ್ಯದಲ್ಲಿ ದಲಿತರ ಮೇಲೆ ನಿರಂತರ ದೌರ್ಜನ್ಯ ನಡೆಯುತ್ತಿದ್ದರೂ ಸರಕಾರವಾಗಲೀ ಇಂತಹ ಶ್ರೀಗಳಾಗಲೀ ಗಮನಹರಿಸದೆ ಇರುವುದು ಅವರ ಮೌಢ್ಯತನವನ್ನು ತೋರಿಸುತ್ತದೆ ಎಂದು ಗೇಲಿ ಮಾಡಿದರು.

ಇದು ಅಮಾನುಷ ಕೃತ್ಯವಲ್ಲವೇ..?: ಚಿತ್ರದುರ್ಗ ತಾಲೂಕು ಲಕ್ಷೀಪುರ ಗ್ರಾಮದಲ್ಲಿ ಪ್ರೇಮ ಪ್ರಕ ರಣಕ್ಕೆ ಸಂಬಂಧಿಸಿದಂತೆ ಭಾಗ್ಯಮ್ಮ ಎಂಬಾಕೆಯನ್ನು ಊರಿನಲ್ಲಿ ಬೆತ್ತಲೆ ಮೆರವಣಿಗೆ ಮಾಡಿರುವು ದು, ಚೆಳ್ಳಕೆರೆ ತಾಲೂಕು ಬೂದಿಹಳ್ಳ ಗ್ರಾಮದಲ್ಲಿ ದಲಿತರು ಸರಕಾರಿ ಗೋಮಾಳದಲ್ಲಿ ಉಳುಮೆ ಮಾಡಿದರು ಎಂಬ ಕಾರಣಕ್ಕಾಗಿ ಅವರ ಮೇಲೆ ದೌರ್ಜನ್ಯ ನಡೆಸಿ ಊರಿಂದ ಹೊರಹಾಕಿರುವುದು,

ತುಮಕೂರು ತಾಲೂಕು ಗೋಪಾಲಪುರ ಗ್ರಾಮದಲ್ಲಿ ಹೊನ್ನಮ್ಮ ಎಂಬ ಮಹಿಳೆಯನ್ನು ಬರ್ಬರವಾಗಿ ಹತ್ಯೆ ಮಾಡಿರುವುದು, ಮಂಡ್ಯ ಜಿಲ್ಲೆ ಮದ್ದೂರು ತಾಲೂಕು ಎಸ್.ಐ ಹೊನ್ನೆಗೆರೆಯಲ್ಲಿ ದೇವಾಲಯದ ಮೆಟ್ಟಿಲು ಹತ್ತಿದರು ಎಂಬ ಕಾರಣಕ್ಕಾಗಿ ಹಾಗೂ ಎಲ್ಲಹಳ್ಳಿಯಲ್ಲಿ ತಮಟೆ ಹೊಡೆಯಲಿಲ್ಲ ಎಂದು ಆರೋಪಿಸಿ ಇಡೀ ಗ್ರಾಮದ ಜನರಿಗೆ ಬಹಿಷ್ಕಾರ ಹಾಕಿರುವುದು ಈ ಎಲ್ಲ ನೈಜಘಟನೆಗಳು ಪೇಜಾ ವರ ಸ್ವಾಮಿಗಳಿಗೆ ತಿಳಿದಿಲ್ಲವೇ ಎಂದು ಪ್ರಶ್ನಿಸಿದರು.

ಕಣ್ಣೊರೆಸುವ ತಂತ್ರ: ಪೇಜಾವರ ಸ್ವಾಮಿಗಳು ದಲಿತ ಕೇರಿಗಳಲ್ಲಿ ಪಾದಯಾತ್ರೆ ನಡೆಸುವಾಗ ಮೈಲಿಗೆಯಾಗುತ್ತದೆ ಎಂಬ ಕಾರಣಕ್ಕಾಗಿ ಜನಿವಾರವನ್ನು ತೆಗದುಹೋಗಿದ್ದಾರೆ. ಚಾರ್ತುಮಾಸ ಆಚರಣೆಯಾದ್ದರಿಂದ ಉಪವಾಸವಿದ್ದೇನೆ. ಏನು ಕೊಟ್ಟರೂ ತಿನ್ನೋದಿಲ್ಲ ಎಂದು ಹೇಳಿರುವುದು ಆಷಾಢಭೂತತನವಲ್ಲವೇ ಎಂದು ಛೇಡಿಸಿದರು.

ಸುದ್ದಿಗೋಷ್ಠಿಯಲ್ಲಿ ಬಿ.ಎಸ್.ಪಿ ಮುಖಂಡರಾದ ಮುಳ್ಳೂರು ಶಿವಮಲ್ಲು, ಅರಕಲವಾಡಿನಾಗೇಂದ್ರ, ನಗರಸಭಾ ಸದಸ್ಯ ನಂಜುಂಡಸ್ವಾಮಿ, ಭಾ.ಮ.ಕೃಷ್ಣಮೂರ್ತಿ, ಬಸವಣ್ಣ, ನಾಗರಾಜ ಉಪ್ಪಾರ್, ಮಲ್ಲಿಕಾರ್ಜುನ್ ಶಾಂತರಾಜು, ಮಹದೇವಪ್ಪ ಹಾಗೂ ಇತರರು ಉಪಸ್ಥಿತರಿದ್ದರು.

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ಕೃಪೆ : ವಾಭಾ ವರದಿಗಾರರು : ಸೀತಾ ಎ ಉಡುಪಿ ಪ್ರಕಟಿಸಿದ ದಿನಾಂಕ : 2010-09-03 00:00:00