ಮೈಸೂರಿನ ಕೈಲಾಸಪುರಂ ಬಡಾವಣೆಯ ದಲಿತ ಕಾಲನಿಗಳಿಗೆ ಪ್ರವೇಶಗೈದಿರುವ ಪೇಜಾವರ ಶ್ರೀಗಳು ಅಲ್ಲಿನ ದಲಿತರನ್ನು ರೋಮಾಂಚನಗೊಳಿಸಿದ್ದರು. ಅಲ್ಲಿನ ಮಾದಿಗರೊಂದಿಗೆ ಬೆರೆತ ಸ್ವಾಮೀಜಿ ಗಳು ಕೆಲವು ದಲಿತರ ಮನೆಗಳಿಗೂ ಭೇಟಿ ನೀಡಿ, ತಮ್ಮ ಹೃದಯವೈಶಾಲ್ಯತೆ ಯನ್ನು ಮೆರೆದರು. ಸ್ವಾಮೀಜಿಯ ಭೇಟಿಗಾಗಿ ದಲಿತರು ತಮ್ಮ ಕಾಲನಿಯನ್ನು ಶೃಂಗಾರಗೊಳಿಸಿ ದ್ದರು. ಮನೆ- ಅಂಗಳ ವನ್ನು ಶುಚಿಗೊಳಿಸಿದ್ದರಂತೆ. ಎಲ್ಲಕ್ಕಿಂತ ವಿಶೇಷವೆಂದರೆ, ದಲಿತ ಕಾಲನಿಗೆ ಭೇಟಿ ನೀಡಿದ ಪೇಜಾ ವರಶ್ರೀಗಳು ಒಂದು ಪ್ಯಾಕೇಜನ್ನು ದಲಿತರಿಗಾಗಿ ಘೋಷಿಸಿದ್ದರು.

‘ದಲಿತರು ಮದ್ಯ, ಮಾಂಸವನ್ನು ತ್ಯಜಿಸಿದರೆ ಅವರನ್ನು ತಾನು ವೈಷ್ಣವರಾಗಿಸುತ್ತೇನೆ’ ಎನ್ನುವುದೇ ಈ ದಲಿತ ಪ್ಯಾಕೇಜ್. ದಲಿತರು ಇಸ್ಲಾಂ ಧರ್ಮಕ್ಕೆ, ಕ್ರೈಸ್ತ ಧರ್ಮಕ್ಕೆ ಮತಾಂತರ ವಾಗುವ ಅಗತ್ಯ ವಿಲ್ಲ, ನನ್ನಲ್ಲೂ ಮತಾಂತರದ ಪ್ಯಾಕೇಜ್ ಇದೆ ಎನ್ನುವುದನ್ನು ಅವರು ದಲಿತರಿಗೆ ತಿಳಿಸಿದ್ದಾರೆ.

ದಲಿತ ಕಾಲನಿಗೆ ಪೇಜಾವರರು ನೀಡಿರುವ ಭೇಟಿ ಶ್ಲಾಘನೀಯವಾಗಿದೆ. ಆದರೆ ಅವರು ವ್ರತಧಾರಿಯಾಗಿ ದಲಿತರ ಕಾಲನಿಗೆ ಭೇಟಿ ನೀಡಿದ್ದರು. ದಲಿತರ ಮನೆಯಲ್ಲಿ ಅವರ ಮನೆ ದೇವರಿಗೆ ಪೂಜೆ ಯನ್ನೇನೋ ಸಲ್ಲಿಸಿದರು. ಆದರೆ ದಲಿತರ ಮನೆಯಲ್ಲಿ ಏನಾದರೂ ಉಂಡರೇ, ತಿಂದರೆ? ಎನ್ನುವು ದರ ಕುರಿತಂತೆ ಯಾವ ಪತ್ರಿಕೆಗಳಲ್ಲೂ ಮಾಹಿತಿಯಿರಲಿಲ್ಲ.

ಬಹುಶಃ ದಲಿತರ ಮನೆಯಲ್ಲಿ ಅವರು ಕೊಟ್ಟ ಒಂದು ಹಿಡಿ ಅವಲಕ್ಕಿಯನ್ನು ‘ಕೃಷ್ಣಾರ್ಪಣ’ ಎಂದು ಬಾಯಿಗೆ ಹಾಕಿಕೊಂಡಿದ್ದರೆ, ಅದು ರಾಜ್ಯ ಮಟ್ಟದಲ್ಲಿ ಕ್ರಾಂತಿ ಕಾರಕ ಸುದ್ದಿಯಾಗುತ್ತಿತ್ತು.

ಆದರೆ ಅಂತಹದೇನೂ ನಡೆಯಲಿಲ್ಲ. ಪೇಜಾವರರನ್ನು ಬೆರಳತುದಿಯಿಂದ ದಲಿತರು ಸ್ಪರ್ಶಿಸುತ್ತಿರು ವುದನ್ನೇ ಪತ್ರಿಕೆಗಳು ಮಹಾಕ್ರಾಂತಿ ಯೆಂಬಂತೆ ಛಾಪಿಸಿದ್ದವು. ಪೇಜಾವರರ ಪಾಲಿಗೆ ಅದೊಂದು ಮಹಾನ್ ಸಾಧನೆ ಮತ್ತು ಕ್ರಾಂತಿಯೇ ಆಗಿರಬಹುದು. ಆದರೆ ಶತಶತಮಾನ ಗಳಿಂದ ಅಸ್ಪಶತೆಯ ಅವಮಾನವನ್ನು ಅನುಭವಿಸಿಕೊಂಡು ಬಂದಿರುವ ದಲಿತರಿಗೆ ಅದರಿಂದ ಏನು ಪ್ರಯೋಜನವಾದಂ ತಾಯಿತು. ಪೇಜಾವರರು ದಲಿತ ಕಾಲನಿಯಲ್ಲಿ ದಲಿತರೊಂದಿಗೆ ಸಾಮೂಹಿಕ ಭೋಜನವನ್ನು ಮಾಡಿದ್ದರೆ ಆ ದಿನ ದಲಿತರ ಪಾಲಿಗೆ ಆಶಾದಾಯಕ ದಿನವಾಗುತ್ತಿತ್ತು. ಆದರೆ ಇದಕ್ಕೆ ಪೇಜಾವರರು ಸಿದ್ಧರಿರಲಿಲ್ಲ.

ವಿಪರ್ಯಾಸವೆಂದರೆ, ಕ್ರೆಸ್ತ, ಇಸ್ಲಾಂ ಧರ್ಮಕ್ಕೆ ದಲಿತರು ಮತಾಂತರವಾಗುವುದನ್ನು ತಡೆಯಲು ಪೇಜಾವರರು ಘೋಷಿಸಿದ ಪ್ಯಾಕೇಜ್. ದಲಿತರು ಮಾಂಸಾಹಾರವನ್ನು ತ್ಯಜಿಸುವುದಾದರೆ ಅವರನ್ನು ವೈಷ್ಣವ ಧರ್ಮಕ್ಕೆ ಮತಾಂತರ ಗೊಳಿಸಲು ತಾನು ಸಿದ್ಧ ಎಂದಿದ್ದಾರೆ ಅವರು. ಪೇಜಾವರ ಶ್ರೀಗಳು ಒಂದನ್ನು ಸ್ಪಷ್ಟಪಡಿ ಬೇಕು.

ಈಗ ಇರುವ ದಲಿತರು ಹಿಂದೂ ಧರ್ಮಕ್ಕೆ ಸೇರಿದವರಲ್ಲವೆ? ಅವರನ್ನು ಹಿಂದೂಗಳೆಂದು ನೀವು ಒಪ್ಪುತ್ತೀರಾದರೆ, ಅವರು ಮತ್ತೊಮ್ಮೆ ಮತಾಂತರವಾಗುವ ಆವಶ್ಯಕತೆ ಇದೆಯೆ? ಉಳಿದೆಲ್ಲ ಜಾತಿ ಗಳಿಗೆ ಈ ಮತಾಂತರದ ಅಗತ್ಯವಿಲ್ಲದೇ ಇರುವಾಗ ದಲಿತರನ್ನು ನೀವು ಒಪ್ಪಬೇಕಾದರೆ, ಸ್ವೀಕರಿಸಬೇಕಾದರೆ ಯಾಕೆ ಈ ಮತಾಂತರ ಅಗತ್ಯ ವಾಗುತ್ತದೆ? ಮಾಂಸಾಹಾರ ಉಳಿದೆಲ್ಲ ಜಾತಿಗಳ ಆಹಾರವಾಗಿರುವಂತೆಯೇ ದಲಿತ ರದ್ದೂ ಆಹಾರವಾಗಿದೆ.

ದಲಿತರಿಗೆ ಅವರದೇ ಆದ ಸಂಸ್ಕೃತಿಯಿದೆ. ದೈವ ದೇವರುಗಳಿವೆ. ಆಚರಣೆಗಳಿವೆ. ಅವರನ್ನು ನೀವು ಹಿಂದೂಗಳೆಂದು ಒಪ್ಪುವುದಾದರೆ, ಅವರೇಕೆ ಮತ್ತೊಮ್ಮೆ ವೈಷ್ಣವ ಧರ್ಮಕ್ಕೆ ಮತಾಂತರ ವಾಗಬೇಕು? ನಿಮ್ಮಂತೆಯೇ ಅವರೂ ಹಿಂದೂಗಳು ಎನ್ನುವುದು ನಿಜವೇ ಆಗಿದ್ದರೆ ನೀವೇಕೆ ಅವರ ಮನೆಯಲ್ಲಿ ಸಾಮೂಹಿಕವಾಗಿ ಸಸ್ಯಾಹಾರ ಊಟವನ್ನು ಮಾಡಬಾರದು? ಹಿಂದೂಗಳೆಲ್ಲ ಒಂದು ಎನ್ನುವುದನ್ನು ಎಲ್ಲಾ ವೇದಿಕೆಗಳಲ್ಲಿ, ಸಂಘ ಪರಿವಾರ ಹಮ್ಮಿಕೊಳ್ಳುವ ಹಿಂದೂ ಸಮಾ ವೇಶಗಳಲ್ಲಿ ಸಾರಿ ಸಾರಿ ಹೇಳುತ್ತಿರುವವರು ನೀವು. ಆದರೆ ಅನುಷ್ಠಾನದ ಸಮಯದಲ್ಲಿ ಮಾತ್ರ ದಲಿತರು ಬೇರೆಯಾಗುವುದು ಹೇಗೆ?

ಮತಾಂತರ ದಲಿತರ ಪಾಲಿಗೆ ಬಿಡುಗಡೆಯ ದಾರಿಯೂ ಕೂಡ. ಈ ದೇಶದಲ್ಲಿ ಲಕ್ಷಾಂತರ ದಲಿತರು, ಶೂದ್ರರು ಮತಾಂತರದ ಮೂಲಕ ಸಮಾನತೆಯ ಬದುಕನ್ನು ಕಂಡುಕೊಂಡಿದ್ದಾರೆ. ದಲಿತರ ಪಾಲಿಗೆ ಮತಾಂತರವೆನ್ನುವುದು ಆಧ್ಯಾತ್ಮಿಕ ಆವಶ್ಯಕತೆಯಷ್ಟೇ ಅಲ್ಲ, ಅದು ಅವರ ಪಾಲಿಗೆ ರಾಜಕೀಯ, ಸಾಮಾಜಿಕ, ಆರ್ಥಿಕ ಆವಶ್ಯಕತೆಯೂ ಕೂಡ. ಯಾವ ವೈಷ್ಣವ ಧರ್ಮ ತಮ್ಮನ್ನು ಚಂಡಾಲ, ನೀಚ ಎಂಬಿತ್ಯಾದಿಯಾಗಿ ಭಾವಿಸುತ್ತದೆಯೋ ಆ ಧರ್ಮವನ್ನು ದಲಿತರು ಯಾಕಾಗಿ ಗೌರವಿಸಬೇಕು.

ತಮ್ಮ ಸಂಸ್ಕೃತಿ, ಆಹಾರ ಪದ್ಧತಿ ಎಲ್ಲವನ್ನು ಬದಿಗಿಟ್ಟು ನೀವು ನೀಡುವ ವೈಷ್ಣವ ಧರ್ಮವನ್ನು ಆಚರಿ ಸಿದರೆ ಅದು ಅವರಿಗೆ ರಾಜಕೀಯ, ಸಾಮಾಜಿಕ ಬಿಡುಗಡೆಯನ್ನು ಕೊಡಬಹುದೆ? ಅಥವಾ ದಲಿತ ವೈಷ್ಣವರಾಗಿ ಮತ್ತೆ ತಮ್ಮ ಕಾಲನಿಯಲ್ಲಿ ದಿನನೂಕಬೇಕಾದೀತೋ?

ದಲಿತರು ಮನುಷ್ಯರು. ಇದನ್ನು ಪೇಜಾವರರು ಮೊದಲು ಪರಿಗಣಿಸಬೇಕಾಗಿದೆ. ಅವರಿಗೆ ಮನಸ್ಸು ಎನ್ನುವುದಿದೆ. ಅವರು ಹಿಂದೂಗಳು ಎನ್ನುವುದನ್ನು ಪೇಜಾವರರು ಒಪ್ಪುತ್ತಾರಾದರೆ, ಹಿಂದೂಗಳು ಎಂದು ಸಮಾನತೆಯಿಂದ ಕಂಡು ಗೌರವಿಸುತ್ತಾರಾದರೆ ಮತ್ತೆ ವೈಷ್ಣವರಾಗುವ ಅಗತ್ಯವೇನಿದೆ? ದಲಿತರನ್ನು ಹೀನಾಯವಾಗಿ ಕಾಣುತ್ತಿರುವುದರ ವಿರುದ್ಧ ಪೇಜಾವರರು ನೋವಿನಿಂದ ಮಾತನಾಡಿ ದ್ದಾರೆ.

ತನ್ನ ಸಮಾಜದ ಮುಖ್ಯವಾಹಿನಿಯಲ್ಲಿ ದಲಿತರನ್ನು ಕೊಂಡೊ ಯ್ಯುವ ಉದ್ದೇಶ ಪೇಜಾವರರಿ ಗಿದ್ದರೆ ಅದಕ್ಕೊಂದೇ ಮಾರ್ಗ. ದಲಿತರೊಂದಿಗೆ ಸಾಮೂಹಿಕ ಭೋಜನವನ್ನು ಮಾಡುವುದು. ಪೇಜಾವರರು ಇದಕ್ಕೆ ಸಿದ್ಧರಿದ್ದಾರೆಯೆ? ಈ ಪ್ರಶ್ನೆಗೆ ಪೇಜಾವರರು ನೀಡುವ ಉತ್ತರದಿಂದ, ದಲಿತರು ಹಿಂದೂಗಳು ಹೌದೋ, ಅಲ್ಲವೋ ಎನ್ನುವುದು ಸಾಬೀತಾಗಿ ಬಿಡುತ್ತದೆ.

ದಲಿತರನ್ನು ಹಿಂದೂಗಳೆಂದು ನಂಬಿಸಿ, ವಂಚಿಸಿ ಅವರನ್ನು ಮುಸ್ಲಿಮರ, ಕ್ರೈಸ್ತರ ವಿರುದ್ಧ ಎತ್ತಿ ಕಟ್ಟುವ ಕೆಲಸ ಹಿರಿಯರಾದ ಪೇಜಾವರಶ್ರೀಗಳಿಗೆ ಶೋಭಿಸು ವುದಿಲ್ಲ. ದಲಿತರಿಗೆ ಯಾವುದೇ ನ್ಯಾಯವನ್ನು ಕೊಡದೆ, ಅವರನ್ನು ಸಂಘಪರಿವಾರದ ಕುಕೃತ್ಯಗಳಿಗೆ ಬಲಿಕೊಡುವ ಉದ್ದೇಶದಿಂದ ಪೇಜಾವರರು ದಲಿತಕಾಲನಿಗೆ ಕಾಲಿಟ್ಟಿದಿದ್ದರೆ ಅದಕ್ಕಿಂತ ಅನ್ಯಾಯ, ಮೋಸ ಇನ್ನೊಂದಿಲ್ಲ.

ದಲಿತರನ್ನು ಪೇಜಾವರರು ವೈಷ್ಣವಧರ್ಮಕ್ಕೆ ಸೇರಿಸದಿದ್ದರೂ ಚಿಂತಿಲ್ಲ, ಹಿಂದೂಗಳೆಂದು ಒಪ್ಪದಿದ್ದರೆ ಚಿಂತಿಲ್ಲ. ದಲಿತರನ್ನು ದಲಿತರಷ್ಟಕ್ಕೇ ಬಿಡಲಿ. ದಲಿತರು ಇಂಗ್ಲಿಷ್ ಕಲಿಯಲಿ. ಕಂಪ್ಯೂಟರ್ ಕಲಿಯಲಿ. ವಿದ್ಯಾವಂತರಾಗಲಿ. ಶೋಷಿತ ಬದುಕಿನಿಂದ ಹೊರ ಬರುವ ದಾರಿ ಅವರಿಗೆ ಆ ಮೂಲಕವೇ ತೆರೆದುಕೊಳ್ಳುತ್ತದೆ. ಪೇಜಾವರರಂತಹ ಹಿರಿಯ ಸ್ವಾಮೀಜಿಗಳು ದಲಿತರ ಆ ದಾರಿಗೆ ಯಾವ ಕಾರಣಕ್ಕೂ ತಡೆಯಾಗದಿರಲಿ.

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ಕೃಪೆ : ಸಂಪಾದಕೀಯ; ವಾರ್ತಾ ಭಾರತಿ ವರದಿಗಾರರು : ಸೀತಾ ಎ ಉಡುಪಿ ಪ್ರಕಟಿಸಿದ ದಿನಾಂಕ : 2010-09-01 00:00:00