ಕೊಲಂಬೊ, ಗುರುವಾರ, 29 ಜುಲೈ 2010 

ಸಿಡಿಲಮರಿ ಸಚಿನ್ ತೆಂಡೂಲ್ಕರ್ (203) ಬಾರಿಸಿದ ಅಮೋಘ ದ್ವಿಶತಕ ಮತ್ತು ಚೊಚ್ಚಲ ಪಂದ್ಯದಲ್ಲಿಯೇ ಆಕರ್ಷಕ ಶತಕ ದಾಖಲಿಸಿದ ಎಡಗೈ ಬ್ಯಾಟ್ಸ್‌ಮನ್ ಸುರೇಶ್ ರೈನಾ (120) ನೆರವಿನಿಂದ ಭಾರತ ತಂಡವು ಶ್ರೀಲಂಕಾ ಒಡ್ಡಿದ 642 ರನ್ನುಗಳ ಬೃಹತ್ ಮೊತ್ತಕ್ಕೆ ಉತ್ತರವಾಗಿ ನಾಲ್ಕನೇ ದಿನದಂತ್ಯಕ್ಕೆ 198 ಓವರುಗಳಲ್ಲಿ ಒಂಬತ್ತು ವಿಕೆಟ್ ನಷ್ಟಕ್ಕೆ 669 ರನ್ ಗಳಿಸಿದ್ದು, 27 ರನ್ನುಗಳ ಮೊದಲ ಇನ್ನಿಂಗ್ಸ್ ಮುನ್ನಡೆ ದಾಖಲಿಸಿದೆ.

ಇಲ್ಲಿನ ನಿರ್ಜೀವ ಪಿಚ್‌ನಲ್ಲಿ ಮೊದಲೆರಡು ದಿನದಾಟದಲ್ಲಿ ಆತಿಥೇಯ ಲಂಕಾ ತಂಡ ಪ್ರಾಬಲ್ಯ ಮೆರೆದಿತ್ತು. ನಂತರ ಸೆಹ್ವಾಗ್-ವಿಜಯ್ ಬಿರುಸಿನ ಬ್ಯಾಟಿಂಗ್‌ನಿಂದಾಗಿ ಭಾರತ ಉತ್ತಮ ಆರಂಭ ಪಡೆದಿತ್ತು. ನಂತರ ಪಟಪಟನೆ ನಾಲ್ಕು ವಿಕೆಟ್ ಕಳೆದುಕೊಂಡ ಭಾರತ ಸಂಕಷ್ಟಕ್ಕೆ ಸಿಲುಕಿತ್ತು.

ಆದರೆ ಐದನೇ ವಿಕೆಟ್‌ಗೆ 256 ರನ್ನುಗಳ ಬೃಹತ್ ಜತೆಯಾಟ ನೀಡಿದ ಸಚಿನ್-ರೈನಾ ಜೋಡಿ ಪ್ರವಾಸಿ ತಂಡವನ್ನು ಫಾಲೋಆನ್ ಭೀತಿಯಿಂದ ಪಾರು ಮಾಡಿದರು.

347 ಎಸೆತಗಳನ್ನು ಯಶಸ್ವಿಯಾಗಿ ಎದುರಿಸಿದ ಸಚಿನ್ 23 ಬೌಂಡರಿ ಹಾಗೂ ಒಂದು ಭರ್ಜರಿ ಸಿಕ್ಸರ್ ನೆರವಿನಿಂದ 203 ರನ್ ಗಳಿಸಿದರು. ಆ ಮೂಲಕ ಭಾರತದ 'ವಾಲ್' ರಾಹುಲ್ ದ್ರಾವಿಡ್ ಅವರ ಐದು ದ್ವಿಶತಕಗಳ ದಾಖಲೆಯನ್ನು ಸರಿಗಟ್ಟಿದರು. ಭಾರತೀಯರ ಪೈಕಿ ಅಗ್ರಸ್ಥಾನದಲ್ಲಿರುವ ಸೆಹ್ವಾಗ್ ಒಟ್ಟು ಆರು ಬಾರಿ ದ್ವಿಶತಕ ಬಾರಿಸಿದ್ದಾರೆ.

ಹಾಗೆಯೇ ಆಸ್ಟ್ರೇಲಿಯಾದ ಡಾನ್ ಬ್ರಾಡ್ಮನ್ ದಾಖಲೆಯನ್ನು ಮೀರಿನಿಂತ ಸಚಿನ್, ಟೆಸ್ಟ್‌ನಲ್ಲಿ 19ನೇ ಬಾರಿ 150ರ ಗಡಿ ದಾಟಿದರು. ಆ ಮೂಲಕ ವೆಸ್ಟ್‌ಇಂಡೀಸ್‌ನ ಬ್ರ್ಯಾನ್ ಲಾರಾ ದಾಖಲೆಯನ್ನು ಸರಿಗಟ್ಟಿದರು.

ಅದೇ ರೀತಿ ಪದಾರ್ಪಣಾ ಪಂದ್ಯದಲ್ಲೇ ಟೆಸ್ಟ್ ಶತಕ ಬಾರಿಸಿದ ರೈನಾ ಈ ಸಾಧನೆ ಮಾಡಿದ 12ನೇ ಭಾರತೀಯ ಬ್ಯಾಟ್ಸ್‌ಮನ್ ಎಂದೆನಿಸಿಕೊಂಡರು. 228 ಎಸೆತಗಳನ್ನು ಯಶಸ್ವಿಯಾಗಿ ಎದುರಿಸಿದ ರೈನಾ 12 ಬೌಂಡರಿ ಎರಡು ಭರ್ಜರಿ ಸಿಕ್ಸರುಗಳ ನೆರವಿನಿಂದ 120 ರನ್ ಗಳಿಸಿ ಔಟಾದರು.

ಕಳೆದ ಐದು ವರ್ಷಗಳಿಂದ ಏಕದಿನ, ಟ್ವೆಂಟಿ-20 ಕ್ರಿಕೆಟ್‌ನಲ್ಲಿ ಮಿಂಚಿದ್ದ ರೈನಾ ತನ್ನ 98 ಏಕದಿನ ಪಂದ್ಯಗಳ ನಂತರ ಟೆಸ್ಟ್‌ನಲ್ಲಿ ಆಡಲು ಅವಕಾಶ ಪಡೆದಿದ್ದರು. ಆ ಮೂಲಕ ಟೆಸ್ಟ್‌ನಲ್ಲಿಯೂ ತಮ್ಮ ಸಾಮರ್ಥ್ಯವನ್ನು ಮೆರೆದರು.

ಸಚಿನ್ ಸೆಂಚುರಿ; ಡೆಬ್ಯುಟ್ ರೈನಾಗೂ ಶತಕದ ಸಂಭ್ರಮ!

ನಾಯಕ ಮಹೇಂದ್ರ ಸಿಂಗ್ ಧೋನಿ ಕೂಡಾ ಸಚಿನ್‌ಗೆ ಉತ್ತಮ ಸಾಥ್ ನೀಡಿದರು. 138 ಎಸೆತಗಳನ್ನು ಎದುರಿಸಿದ ಅವರು ಏಳು ಬೌಂಡರಿಗಳ ನೆರವನಿಂದ 76 ರನ್ ಗಳಿಸಿದರು. ನಂತರ ಕ್ರೀಸಿಗಿಳಿದ ವೇಗಿ ಅಭಿಮನ್ಯು ಮಿಥುನ್ ಕೂಡಾ ತಾನೇನು ಕಡಿಮೆಯೇನಲ್ಲ ಎಂಬ ರೀತಿಯಲ್ಲಿ ಮುನ್ನುಗ್ಗಿ ಬ್ಯಾಟ್ ಬೀಸಿದರು. 97 ಎಸೆತಗಳನ್ನು ಯಶಸ್ವಿಯಾಗಿ ಎದುರಿಸಿದ ಮಿಥುನ್ ಅರ್ಧಶತಕ (41) ವಂಚಿತರಾದರೂ ಭರವಸೆಯ ಬ್ಯಾಟಿಂಗ್ ಪ್ರದರ್ಶಿಸಿದರು.

ಲಂಕಾ ಪರ ಅಜಂತಾ ಮೆಂಡೀಸ್ ಯಶಸ್ವಿ ಬೌಲರ್‌ರೆನಿಸಿಕೊಂಡಿದ್ದು, ನಾಲ್ಕು ವಿಕೆಟ್ ಕಿತ್ತರು. ಉಳಿದಂತೆ ತಿಲಕರತ್ನೆ ದಿಲ್‌ಶಾನ್ ಮೂರು ಹಾಗೂ ಚೊಚ್ಚಲ ಪಂದ್ಯವನ್ನಾಡುತ್ತಿರುವ ಸುರಾಜ್ ರಣಧೀವ್ ಎರಡು ವಿಕೆಟ್ ಕಿತ್ತರು.

ಒಟ್ಟಿನಲ್ಲಿ ಈ ಪಂದ್ಯ ಡ್ರಾದತ್ತ ಮುಖ ಮಾಡಿದ್ದು, ಭಾರತಕ್ಕೆ ಈ ಪಂದ್ಯವನ್ನು ಗೆಲ್ಲಲು ಪವಾಡವೇ ನಡೆಯಬೇಕಾಗಿದೆ.

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ವರದಿಗಾರರು : ಗಲ್ಫ್ ಕನ್ನಡಿಗ ವರದಿಗಾರರು ಪ್ರಕಟಿಸಿದ ದಿನಾಂಕ : 2010-07-29 00:00:00