ಸಿಬಿಐ ಮುಂದೆ ವಿಚಾರಣೆಗೆ ಹಾಜರಾಗಲು ಹೆಚ್ಚಿನ ಕಾಲಾವಕಾಶ ನೀಡುವಂತೆ ನರೇಂದ್ರ ಮೋದಿ ಅವರ ನಿಕಟವರ್ತಿ, ಗುಜರಾತಿನ ಗೃಹ ಸಚಿವ ಅಮಿತ್ ಶಾ ಅವರು ಶುಕ್ರವಾರ ಸಿಬಿಐ ಮುಂದೆ ಕೋರಿಕೆ ಮಂಡಿಸಿ ದ್ದಾರೆ. ಆದರೆ ಸಿಬಿಐ ಅವರ ಕೋರಿಕೆಯನ್ನು ತಳ್ಳಿ ಹಾಕಿದೆ.   

ಗಾಂಧಿನಗರ (ಪಿಟಿಐ): ಸೊಹ್ರಾಬುದ್ದೀನ್ ಶೇಕ್ ನಕಲಿ ಎನ್ ಕೌಂಟರ್ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಿಬಿಐ ಮುಂದೆ ವಿಚಾರಣೆಗೆ ಹಾಜರಾಗಲು ಹೆಚ್ಚಿನ ಕಾಲಾವಕಾಶ ನೀಡುವಂತೆ ನರೇಂದ್ರ ಮೋದಿ ಅವರ ನಿಕಟವರ್ತಿ, ಗುಜರಾತಿನ  ಗೃಹ ಸಚಿವ ಅಮಿತ್ ಶಾ ಅವರು ಶುಕ್ರವಾರ ಸಿಬಿಐ ಮುಂದೆ ಕೋರಿಕೆ ಮಂಡಿಸಿದ್ದಾರೆ. ಆದರೆ ಸಿಬಿಐ ಅವರ ಕೋರಿಕೆಯನ್ನು ತಳ್ಳಿ ಹಾಕಿದೆ.

ಶಾ ಅವರಿಗೆ ಸಿಬಿಐ ಮುಂದೆ ಹಾಜರಾಗಲು ಶುಕ್ರವಾರ ಮಧ್ಯಾಹ್ನ ಒಂದು ಗಂಟೆಯವರೆಗೆ ಕಾಲಾವಕಾಶ ನೀಡಲಾಗಿತ್ತು. ಮೊದಲ ಸಮನ್ಸ್ ಪ್ರಕಾರ ಗುರುವಾರ ಸಿಬಿಐ ಮುಂದೆ ಹಾಜರಾಗಲು ಶಾ ಅವರು ವಿಫಲರಾದ ಬಳಿಕ ಎರಡನೇ ಸಮನ್ಸ್ ಕಳುಹಿಸಿ ಶುಕ್ರವಾರ ಮಧ್ಯಾಹ್ನದವರೆಗೆ ಕಾಲಾವಕಾಶ ನೀಡಲಾಗಿತ್ತು.

ಸಿಬಿಐ ಕಚೇರಿಗೆ ಭೇಟಿ ನೀಡಿದ್ದ ಶಾ ಅವರ ವಕೀಲ ಮಿತಿಶ್ ಅಮಿನ್ ಅವರು 'ಹೆಚ್ಚಿನ ಕಾಲಾವಕಾಶ ನೀಡುವಂತೆ ಮತ್ತು ಉತ್ತರಿಸಲು ಅನುಕೂಲವಾಗುವಂತೆ ಸಚಿವರಿಗೆ ಪ್ರಶ್ನಾವಳಿಯನ್ನು ಕೊಡುವಂತೆ ಸಿಬಿಐಗೆ ಮನವಿ ಮಾಡಲಾಯಿತು' ಎಂದು ಹೇಳಿದರು.

ಆದರೆ ಪ್ರಶ್ನಾವಳಿ ನೀಡಬೇಕೆಂಬ ಮನವಿಯನ್ನು ಸಿಬಿಐ ತಳ್ಳಿ ಹಾಕಿತು. 'ನಮಗೆ ಪ್ರಶ್ನಾವಳಿ ನೀಡುವ ಅಗತ್ಯ ಇದೆ ಎಂದು ಅವರಿಗೆ ಅನ್ನಿಸಿದಂತಿಲ್ಲ' ಎಂದು ಅಮಿನ್ ಸಿಬಿಐ ಕಚೇರಿಯಿಂದ ಹೊರಬರುತ್ತಾ ಪತ್ರಕರ್ತರಿಗೆ ತಿಳಿಸಿದರು.

'ಈಗ ನಾನು ಈ ವಿಷಯವನ್ನು ಅವರೊಂದಿಗೆ (ಶಾ) ಚರ್ಚಿಸುವೆ' ಎಂದು ಅಮಿನ್ ಹೇಳಿದರು.

ಈಗ ನಿಮ್ಮ ಮುಂದೆ ಕಾನೂನುಬದ್ಧ ಆಯ್ಕೆಗಳು ಏನಿವೆ ಎಂಬ ಪ್ರಶ್ನೆಗೆ ಹಲವಾರು ಆಯ್ಕೆಗಳಿವೆ. ನಿರೀಕ್ಷಣಾ ಜಾಮೀನು ಪಡೆಯುವುದು ಅವುಗಳಲ್ಲಿ ಒಂದು. ಏನಿದ್ದರೂ ಮೊದಲು ನಾನು ನನ್ನ ಕಕ್ಷಿದಾರರ ಜೊತೆಗೆ ಚರ್ಚಿಸಬೇಕು' ಎಂದು ಅವರು ನುಡಿದರು

‘ಇದು ರಾಜಕೀಯ ಹಗೆತನ’  
 
ಗುಜರಾತ್ ಗೃಹ ಸಚಿವ ಅಮಿತ್ ಷಾ ಅವರಿಗೆ ಸಿಬಿಐ ಸಮನ್ಸ್ ಜಾರಿ ಮಾಡಿರುವುದು ಕೇಂದ್ರ ಸರ್ಕಾರದ ರಾಜಕೀಯ ಹಗೆತನದ ಕ್ರಮವೇ ಹೊರತು ಬೇರೇನೂ ಅಲ್ಲ ಎಂದು ಬಿಜೆಪಿ ಟೀಕಿಸಿದೆ.   

ನವದೆಹಲಿ: ಸೊಹ್ರಾಬುದ್ದೀನ್ ಶೇಖ್ ಶೂಟೌಟ್ ಪ್ರಕರಣದಲ್ಲಿ ಗುಜರಾತ್ ಗೃಹ ಸಚಿವ ಅಮಿತ್ ಷಾ ಅವರಿಗೆ ಸಿಬಿಐ ಸಮನ್ಸ್ ಜಾರಿ ಮಾಡಿರುವುದು ಕೇಂದ್ರ ಸರ್ಕಾರದ ರಾಜಕೀಯ ಹಗೆತನದ ಕ್ರಮವೇ ಹೊರತು ಬೇರೇನೂ ಅಲ್ಲ ಎಂದು ಬಿಜೆಪಿ ಟೀಕಿಸಿದೆ.

ಸಂಸತ್ತಿನ ಮುಂಗಾರು ಅಧಿವೇಶನಕ್ಕೆ ಪೂರ್ವಭಾವಿಯಾಗಿ ವಿರೋಧ ಪಕ್ಷಗಳಿಗೆ ಪ್ರಧಾನಿ ಏರ್ಪಡಿಸಿದ್ದ ಔತಣಕೂಟವನ್ನು ಬಹಿಷ್ಕರಿಸಿದ ಬಳಿಕ, ಲೋಕಸಭೆಯಲ್ಲಿನ ವಿರೋಧ ಪಕ್ಷದ ನಾಯಕಿ ಸುಷ್ಮಾ ಸ್ವರಾಜ್ ಹಾಗೂ ರಾಜ್ಯಸಭೆಯಲ್ಲಿನ ವಿರೋಧ ಪಕ್ಷದ ನಾಯಕ ಅರುಣ್ ಜೇಟ್ಲಿ ಶುಕ್ರವಾರ ಜಂಟಿ ಪತ್ರಿಕಾಗೋಷ್ಠಿ ನಡೆಸಿ ಕಾಂಗ್ರೆಸ್ ವಿರುದ್ಧ ಹರಿಹಾಯ್ದರು.

ಆಡಳಿತಾರೂಢ ಪಕ್ಷವು ಅನುಕೂಲಕ್ಕೆ ತಕ್ಕ ಅಸ್ತ್ರದಂತೆ ಸಿಬಿಐ ಅನ್ನು ಬಳಸಿಕೊಳ್ಳುತ್ತಿದೆ. ಇದೊಂದು ನಾಚಿಕೆಗೇಡಿನ ದುರ್ಬಳಕೆ. ಈ ವಿಷಯ ವನ್ನು ಪಕ್ಷದ ಹಿರಿಯ ನಾಯಕ ಅಡ್ವಾಣಿ ಅವರು ಹಣಕಾಸು ಸಚಿವ ಪ್ರಣವ್ ಮುಖರ್ಜಿ ಅವರ ಗಮನಕ್ಕೆ ತಂದಿದ್ದರೂ ಪ್ರಯೋಜನವಾಗಿಲ್ಲ ಎಂದು ಜೇಟ್ಲಿ ದೂರಿದರು.

 
ಪರಿಸ್ಥಿತಿ ಅತ್ಯಂತ ಕಹಿಯಾಗಿ ರುವುದರಿಂದ ಪ್ರಧಾನಿ ಅವರೊಂದಿಗೆ  ಔತಣ ಕೂಟದಲ್ಲಿ ಪಾಲ್ಗೊಳ್ಳಲು ನಮಗೆ ಮನಸ್ಸಾಗುತ್ತಿಲ್ಲ ಎಂದು ಸುಷ್ಮಾ ಸಮರ್ಥಿಸಿಕೊಂಡರು.

ದುರದೃಷ್ಟಕರ- ಕಾಂಗ್ರೆಸ್  
 
‘ಸಂಸತ್ತಿನ ಪ್ರತಿ ಅಧಿವೇಶನದ ಸಂದರ್ಭದಲ್ಲೂ ಪ್ರಧಾನಿ ಔತಣಕೂಟ ಏರ್ಪಡಿಸುತ್ತಾರೆ. ಇದನ್ನು ಬಹಿಷ್ಕರಿಸುವ ಮೂಲಕ ಬಿಜೆಪಿ ತನ್ನ ನಿಜವಾದ ನಡವಳಿಕೆಯನ್ನು ಪ್ರದರ್ಶಿಸಿದೆ’ ಎಂದು ಎಐಸಿಸಿ ಪ್ರಧಾನ ಕಾರ್ಯದರ್ಶಿ ಬಿ.ಕೆ.ಹರಿಪ್ರಸಾದ್ ಶುಕ್ರವಾರ ಸುದ್ದಿಗಾರರೊಂದಿಗೆ ದೂರಿದ್ದಾರೆ.   

ನವದೆಹಲಿ (ಪಿಟಿಐ): ‘ಪ್ರಧಾನಿ ಅವರು ಏರ್ಪಡಿಸಿದ್ದ ಔತಣಕೂಟವನ್ನು ಬಹಿಷ್ಕರಿಸಿದ ಬಿಜೆಪಿ ನಿಲುವು ಜವಾಬ್ದಾರಿಯುತ ರಾಜಕೀಯ ಪಕ್ಷವೊಂದರ ಅತ್ಯಂತ ದುರದೃಷ್ಟಕರ ಮತ್ತು ಅನುಚಿತ ವರ್ತನೆ’ ಎಂದು ಕಾಂಗ್ರೆಸ್ ಬಣ್ಣಿಸಿದೆ.

‘ಸಂಸತ್ತಿನ ಪ್ರತಿ ಅಧಿವೇಶನದ ಸಂದರ್ಭದಲ್ಲೂ ಪ್ರಧಾನಿ ಔತಣಕೂಟ ಏರ್ಪಡಿಸುತ್ತಾರೆ. ಇದನ್ನು ಬಹಿಷ್ಕರಿಸುವ ಮೂಲಕ ಬಿಜೆಪಿ ತನ್ನ ನಿಜವಾದ ನಡವಳಿಕೆಯನ್ನು ಪ್ರದರ್ಶಿಸಿದೆ’ ಎಂದು ಎಐಸಿಸಿ ಪ್ರಧಾನ ಕಾರ್ಯದರ್ಶಿ ಬಿ.ಕೆ.ಹರಿಪ್ರಸಾದ್ ಶುಕ್ರವಾರ ಸುದ್ದಿಗಾರರೊಂದಿಗೆ ದೂರಿದ್ದಾರೆ.

ಕೇಂದ್ರ ಸರ್ಕಾರ ಸಿಬಿಐನ ದುರ್ಬಳಕೆ ಮಾಡಿಕೊಳ್ಳುತ್ತಿದೆ ಎಂಬ ವಿರೋಧ ಪಕ್ಷದ ಆರೋಪವನ್ನು ಅವರು ತಳ್ಳಿಹಾಕಿದರು. ಸುಪ್ರೀಂಕೋರ್ಟ್ ನಿರ್ದೇಶನದ ಮೇರೆಗೆ ಸಿಬಿಐ ಪ್ರಕರಣದ ತನಿಖೆ ನಡೆಸುತ್ತಿದೆ ಎಂಬ ವಿಷಯ ಇಡೀ ಪ್ರಪಂಚಕ್ಕೇ ತಿಳಿದಿದೆ. ಕಾನೂನು ಅವರನ್ನು ಸುತ್ತುವರಿಯುತ್ತಿದೆ, ಅದಕ್ಕೇ ಅವರು ಈ ರೀತಿ ಪ್ರತಿಕ್ರಿಯಿಸುತ್ತಿದ್ದಾರೆ ಎಂದು ಹೇಳಿದ್ದಾರೆ.

ಅಮಿತ್ ಷಾ ಸಿಬಿಐ ಎದುರು ಹಾಜರಾಗದಿರುವ ಬಗ್ಗೆ ಕೇಳಿದ ಪ್ರಶ್ನೆಗೆ, ಕಾನೂನು ತನ್ನದೇ ಕ್ರಮ ಕೈಗೊಳ್ಳುತ್ತದೆ ಎಂದ ಪ್ರಸಾದ್, ಸೂಕ್ತ ರೀತಿಯಲ್ಲಿ ತನಿಖೆ ನಡೆದರೆ ಬಹಳಷ್ಟು ರಹಸ್ಯ ವಿಷಯಗಳು ಹೊರಬೀಳಲಿವೆ ಎಂದಿದ್ದಾರೆ.