ಅಮೆರಿಕದ ವಾಷಿಂಗ್ಟನ್ ಡಿಸಿಯಲ್ಲಿ ನಡೆಯಲಿರುವ ಜಾಗತಿಕ ಯುವ ನಾಯಕರ ಸಂಕಿರಣ (ಗ್ಲೋಬಲ್ ಯೂತ್ ಲೀಡರ್ಸ್ ಕಾನ್ಫರೆನ್ಸ್)ಗೆ ಬೆಳ್ತಂಗಡಿಯ ಬಾಲಕಿಯೊಬ್ಬಳು ಆಯ್ಕೆಯಾಗಿ ದ್ದಾಳೆ.

ಅರಸಿ ಬಂದ ಅರ್ಹತೆ: ಪ್ರಸ್ತುತ ಮಸ್ಕತ್‌ನ ಇಂಡಿಯನ್ ಸ್ಕೂಲ್ ನಲ್ಲಿ ೧೧ನೇ ತರಗತಿ ವಿದ್ಯಾರ್ಥಿನಿಯಾಗಿರುವ ತೇಜಸ್ವಿನಿ ಹೆಗ್ಡೆ ಒಮನ್ ನಿಂದ ಸಂಕಿರಣಕ್ಕೆ ಆಯ್ಕೆಯಾದ ಏಕೈಕ ಬಾಲಕಿ. ಬೆಳ್ತಂಗಡಿಯ ತೆಂಕಕಾರಂದೂರಿನ ಪೆರಾಲ್ದರಕಟ್ಟೆಯ ಕೊಡ್ಯಡ್ಕ ರವಿರಾಜ ಹೆಗ್ಡೆ ವನಿಲಾ ಹೆಗ್ಡೆ ದಂಪತಿಯ ಮಗಳಾದ ಈಕೆ ನೃತ್ಯ ಪ್ರವೀಣೆಯಾದ ಈಕೆ ವಾಷಿಂಗ್ಟನ್‌ನ ಶೆರಟಾನ್ ನ್ಯಾಷನಲ್ ಹೊಟೇಲ್ ನಲ್ಲಿ ಜು. ೧೧ರಂದು ನಡೆಯುವ ಸಮಾರಂಭದಲ್ಲಿ ಒಮನ್‌ನ ಭಾರತೀಯ ಪ್ರತಿನಿಧಿಯಾಗಿ ಭಾಗವಹಿಸಲಿದ್ದಾರೆ.

೧೦೦ ರಾಷ್ಟ್ರಗಳ ಪ್ರತಿನಿಧಿಗಳು, ಜಾಗತಿಕ ನಾಯಕರು ಈ ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳಲಿ ದ್ದಾರೆ. ತಮ್ಮ ಕಲ್ಪನೆ, ವಿಚಾರಗಳನ್ನು ಹಂಚಿಕೊಳ್ಳಲು ತೇಜಸ್ವಿನಿಗೆ ಅವಕಾಶ ನೀಡಲಾಗಿದೆ. ೧೫ರಿಂದ೧೮ ವಯಸ್ಸಿನ ಕಾನೂನು, ಸಂವಹನ, ಮಾನವ ಹಕ್ಕು, ಶಾಂತಿ, ಭದ್ರತೆ, ಆರ್ಥಿಕತೆ, ಸಂಯುಕ್ತ ರಾಷ್ಟ್ರಗಳ ಪಾತ್ರವನ್ನು ಅರ್ಥ ಮಾಡಿಕೊಳ್ಳಬಲ್ಲವರನ್ನು ಈ ಸಂಕಿರಣಕ್ಕೆ ಆಯ್ಕೆ ಮಾಡಲಾಗುತ್ತದೆ. ನ್ಯೂಯಾರ್ಕ್‌ನ ಜಾರ್ಜ್ ಮಾಸನ್ ವಿವಿ ತೇಜಸ್ವಿನಿಯ ಮೂರು ಪ್ರತಿಭಾಂಶ ಗಳನ್ನು ಪರಿಗಣಿಸಿ ಅವಕಾಶ ನೀಡಿದೆ.

ಒಡಿಸ್ಸಿ ಪರಿಣತೆ: ಒಡಿಸ್ಸಿ ನೃತ್ಯ ಪಟುವಾದ ತೇಜಸ್ವಿನಿ ೧೦೦ಕ್ಕೂ ಅಧಿಕ ಕಾರ್ಯಕ್ರಮಗಳನ್ನು ನೀಡಿದ್ದಾರೆ. ಭಾರತದ ರಾಯಭಾರ ಕಚೇರಿ ಸೇರಿದಂತೆ ಹಲವಾರು ಗಣ್ಯ, ಮಹನೀಯರ ಕಾರ್ಯಕ್ರಮದಲ್ಲಿ ಈಕೆಯ ನೃತ್ಯ ಪ್ರದರ್ಶನ ಮೆಚ್ಚುಗೆಗೆ ಪಾತ್ರವಾಗಿದೆ.

ಚರ್ಚಾ ಸ್ಪರ್ಧೆ, ಭಾಷಣಗಳಲ್ಲೂ ಅರಸಿ ಬಂದ ಬಹುಮಾನಗಳು ಹತ್ತು ಹಲವು. ಇಂತಹ ಬಹುಶ್ರುತ ಪ್ರತಿಭೆಯಾದ ಈಕೆಯನ್ನು ಇತ್ತೀಚೆಗೆ ‘ಇಂಡಿಯನ್ ಸ್ಕೂಲ್ ಆಫ್ ಮಸ್ಕತ್‌ನ ಹೆಮ್ಮೆ’ ಎಂಬ ಬಿರುದು ನೀಡಿ ಸಮ್ಮಾನಿಸಲಾಗಿತ್ತು. ಮಾರ್ಚ್ ನಲ್ಲಿ ನಡೆದ ಸಿಬಿ ಎಸ್‌ಇ ೧೦ನೇ ತರಗತಿ ಪರೀಕ್ಷೆಯಲ್ಲಿ ೫ ಎ೧ ಗ್ರೇಡ್ ಜತೆಗೆ ೧೦ ಗ್ರೇಡ್ ಗಳಿಸಿ ಅತ್ಯಧಿಕ ಅಂಕ ದಾಖಲಿಸಿದ್ದಾರೆ.

‘ಐಎಸ್ಎಂನ ತಾರೆ’: ಐ‌ಎಸ್‌ಎಂ (ಇಂಡಿಯನ್ ಸ್ಕೂಲ್ ಆಫ್ ಮಸ್ಕತ್) ನ ತಾರೆ ಎಂದೇ ಈಕೆಯನ್ನು ಕರೆಯಲಾಗುತ್ತದೆ. ಹಿಂದೂಸ್ಥಾನಿ ಸಂಗೀತ ಮತ್ತು ಲಘು ಶಾಸ್ತ್ರೀಯ ಸಂಗೀತವನ್ನು ಅಭ್ಯಸಿಸಿದ ತೇಜುಗೆ ಆಗ ಬರೀ ೫ ವರ್ಷ. ಮಸ್ಕತ್‌ನ ರಾಗದರ್ಶನ ಕಾರ್ಯಕ್ರಮದ ಖಾಯಂ ಕಲಾವಿದೆಯಾಗಿದ್ದರು. ದೀಪಕ್ ರಾಯ್ ಅವರಿಂದ ಒಡಿಸ್ಸಿ ಕಲೆಯನ್ನು ಒಲಿಸಿಕೊಂಡ ಈಕೆ ಅದಕ್ಕೆ ಅವಶ್ಯವಿರುವ ಭಂಗಿ, ಭಾವನೆಗಳನ್ನು ನೀಡುವ ಮೂಲಕ ಕಲೆಗೆ ನ್ಯಾಯ ಒದಗಿಸಿ ಕಲಾರಸಿಕರ ಮನಸೂರೆಗೊಂಡಿದ್ದಾರೆ. ಪಾಶ್ಚಾತ್ಯ, ಆಧುನಿಕ, ಸಿನಿಮಾ ನೃತ್ಯಗಳ ತರಬೇತಿ ಯನ್ನು ಪಡೆದಿದ್ದಾರೆ. ೨೦೦೫ರಲ್ಲಿ ಈಕೆ ಒಬ್ಬಾಕೆಯೇ ೫೪ರಷ್ಟು ಕಾರ್ಯಕ್ರಮ ನೀಡಿದ್ದಾರೆ.

ಪುರಸ್ಕಾರಗಳು: ೨೦೦೪ರಲ್ಲಿ ೨೦೦ ಸ್ಪರ್ಧಿಗಳಿದ್ದ ಕಾರ್ಯಕ್ರಮದಲ್ಲಿ ಮಸ್ಕತ್‌ನ ‘ಡ್ಯಾನ್ ಮೇನಿಯಾ’ ಕಾರ್ಯಕ್ರಮದ ವಿಜೇತೆ.

ಗೋಕುಲ್ ದಾಸ್ ಖಿಮ್ಜಿ ಮ್ಯೂಸಿಕ್ ಟ್ರೋಫಿ (೨ಬಾರಿ).

ಮಸ್ಕತ್‌ನ ಅಂತರ್ಶಾಲಾ ಸ್ಪರ್ಧೆಗಳಲ್ಲಿ ಪ್ರತೀಬಾರಿ ಬಹುಮಾನ.

ಬಹ್ರೈನ್ ನಲ್ಲಿ ನಡೆದ ಅಂತರ್ಶಾಲಾ ಪ್ರತಿಭಾ ವವಿಧ್ಯ ಕಾರ್ಯಕ್ರಮಕ್ಕೆ ಆಯ್ಕೆಯಾದ ಅತಿ ಕಿರಿಯ ವಯಸ್ಸಿನ (೧೦ನೇ ವರ್ಷದಲ್ಲಿ) ಬಾಲಿಕೆ.

೨೦೦೫ರಲ್ಲಿ ಅಲ್ ಬುಸ್ತಾನಾದಲ್ಲಿ ಶಬಾನಾ ಅಜ್ಮಿ, ಜಾವೇದ್ ಅಖ್ತರ್, ಜಸ್ವಿಂದರ್ ಮೊದಲಾದ ಗಾಯಕರ ಜತೆ ಹಾಡುವ ಅವಕಾಶ.

ಮಸ್ಕತ್ ಫೆಸ್ಟಿವಲ್, ಹೋಪ್ ಕಾರ್ನಿವಲ್, ಮಸ್ಕತ್ ಸ್ಕೂಲ್ ಚಾರಿಟಿ ಕ್ಲಬ್, ಹಾರ್ಮೊನಿ ಮ್ಯೂಸಿಕಲ್ ಗ್ರೂಪ್, ಇಂಡಿಯನ್ ಏರ್ ಲೈನ್ಸ್ ಪ್ರಶಸ್ತಿ ಪ್ರದಾನ ಸಮಾರಂಭ, ಭೋಜ್ ಪುರಿ ನೈಟ್ ಮೊದಲಾದ ಅನೇಕ ಕಾರ್ಯಕ್ರಮಗಳಲ್ಲಿ ಈಕೆಯ ನೃತ್ಯ ಪ್ರದರ್ಶನ ಮೆಚ್ಚುಗೆ ಗಳಿಸಿದೆ.

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ವರದಿಗಾರರು : ಸೀತಾ ಎ ಉಡುಪಿ ಪ್ರಕಟಿಸಿದ ದಿನಾಂಕ : 2010-06-22 00:00:00