Gulf Kannadiga - a reflection of Karnataka in the Gulf

ಕಾರವಾರ, ಮಾ. ೨೦ : ಜಗತ್ತಿನ ವಿವಿಧ ದೇಶಗಳ ಅಪರೂಪದ ಪುಸ್ತಕಗಳನ್ನು ಹೊಂದಿ ಇದೀಗ ದುಸ್ಥಿತಿಯಲ್ಲಿರುವ ಗೋಕರ್ಣದ ಸ್ಟಡಿ ಸರ್ಕಲ್ ವಾಚನಾಲಯ ಇನ್ನು ಮುಂದೆ ಅಂತಾರಾಷ್ಟ್ರೀಯ ಲೈಬ್ರರಿ ಹಾಗೂ ಇಂಡೋಫ್ರಾನ್ಸ್ ಸಾಂಸ್ಕೃತಿಕ ಕೇಂದ್ರವಾಗಿ ಪರಿವರ್ತಿತವಾಗಲಿದೆ. ಫ್ರಾನ್ಸ್ ದೇಶದ ಸಂಸ್ಥೆಯೊಂದು ಇದರ ಸಂಪೂರ್ಣ ಉಸ್ತುವಾರಿ ಹೊತ್ತಿದೆ.

ಎಂಡ್ರೆಟಾ ಸರ್ಕಲ್ ಎಂಬ ಫ್ರೆಂಚ್ ಸಂಸ್ಥೆ ಈ ಬಗ್ಗೆ ೬೦ ಲಕ್ಷ ರು.ಗಳ ಯೋಜನೆಯನ್ನು ಸಿದ್ಧಪಡಿ ಸಿದೆ. ಈ ಯೋಜನೆಗೆ ಫ್ರಾನ್ಸ್ ದೇಶದ ಮೂರು ಕಂಪನಿಗಳು, ಫ್ರಾನ್ಸ್‌ನ ಒಂದು ಸ್ಥಳೀಯ ಆಡಳಿತ ಹಣ ಒದಗಿಸಲಿದೆ ಎಂದು ಸ್ಟಡಿ ಸರ್ಕಲ್ ಯೋಜನೆಯ ಸಂಸ್ಥಾಪಕ ಸದಸ್ಯ ಫ್ರಾನ್ಸ್‌ನ ಟೆಬೆಟ್ ಎಲಿಯಾಸ್ 'ಕನ್ನಡಪ್ರಭ'ಕ್ಕೆ ವಿವರವಾದ ಮಾಹಿತಿ ಒದಗಿಸಿದರು.

- ರಕ್ಷಣೆಗೆ ಬಂದ ಫ್ರೆಂಚ್ ಸಂಸ್ಥೆ:

ಗೋಕರ್ಣದಲ್ಲಿ ಗಣಪತಿ ವೇದೇಶ್ವರ ಅವರಿಗೆ ಸದ್ಯ ೮೦ರ ಹರೆಯ. ಇವರಿಗೆ ಎಳವೆಯಿಂದಲೆ ಪುಸ್ತಕಗಳ ಗೀಳು. ದೇಶ ವಿದೇಶಗಳ ಅಮೂಲ್ಯ ಪುಸ್ತಕ, ಪತ್ರಿಕೆಗಳನ್ನು ಸಂಗ್ರಹಿಸಿ ಸ್ಟಡಿ ಸರ್ಕಲ್ ಎಂಬ ವಾಚನಾಲಯವನ್ನು ಬಹುಕಾಲದ ಹಿಂದೆಯೇ ಆರಂಭಿಸಿದ್ದರು. ಭವಿಷ್ಯದಲ್ಲಿ ಈ ವಾಚ ನಾಲಯವನ್ನು ನೋಡಿಕೊಳ್ಳುವವರಿಲ್ಲದೆ ಇತಿಹಾಸದ ಪುಟಗಳಲ್ಲಿ ಸೇರಿಹೋಗುವ ಅಪಾಯ ವಿತ್ತು. ಇದನ್ನು ಮನಗಂಡ ಫ್ರೆಂಚ್ ಸಂಸ್ಥೆ ಈ ಶ್ಲಾಘನೀಯ ಕಾರ್ಯಕ್ಕೆ ಮುಂದಾಗಿದೆ.

ಗಣಪತಿ ವೇದೇಶ್ವರ ಅವರಿಗೆ ಸೇರಿದ ರಾಮತೀರ್ಥ ಬಳಿಯ ೨ ಸಾವಿರ ಚದರ ಮೀಟರ್ ಜಾಗದಲ್ಲಿ ಇದರ ಕಟ್ಟಡ ನಿರ್ಮಾಣವಾಗಲಿದೆ. ನೆಲ ಅಂತಸ್ತಿನಲ್ಲಿ ರೀಡಿಂಗ್ ರೂಮ್, ಸ್ಟಡಿ ರೂಮ್, ಇಂಟರ್‌ನೆಟ್ ಕಾರ್ನರ್, ಪುಸ್ತಗಳನ್ನು ಇಡಲು ವ್ಯವಸ್ಥೆ ಕಲ್ಪಿಸಲಾಗುವುದು. ಮೊದಲ ಮಹಡಿ ಕಲ್ಚರಲ್ ಸೆಂಟರ್ ಆಗಿ ತಲೆ ಎತ್ತಲಿದೆ.

ಜೀರ್ಣಾವಸ್ಥೆಯಲ್ಲಿರುವ ಪುಸ್ತಕಗಳ ದುರಸ್ತಿ, ವರ್ಗೀಕರಣ, ಮತ್ತಿತರ ಕೆಲಸ ನಿರ್ವಹಣೆಗಾಗಿ ಸ್ಥಳೀಯರಿಗೆ ತರಬೇತಿ ನೀಡಲಾಗುತ್ತದೆ. ತರಬೇತಿ ನೀಡಲು ಫ್ರಾನ್ಸ್‌ನ ಸ್ವಯಂ ಸೇವಕರು ಸದ್ಯದಲ್ಲಿಯೇ ಗೋಕರ್ಣಕ್ಕೆ ಆಗಮಿಸಲಿದ್ದಾರೆ.

ಸಾಂಸ್ಕೃತಿಕ ಕೇಂದ್ರದಲ್ಲಿ ನಾಟಕಗಳ ಪ್ರದರ್ಶನ, ಸಾಂಪ್ರದಾಯಿಕ ಕಲೆಯಾದ ಭರತನಾಟ್ಯ, ಕಥಕ್ಕಳಿ, ಯಕ್ಷಗಾನ ಮೊದಲಾದ ಕಲೆಗೆ ಉತ್ತೇಜನ ನೀಡಲಾಗುವುದು. ಫ್ರೆಂಚ್ ಕೃತಿಗಳ ಕನ್ನಡ ಭಾಷಾಂತರ, ಕನ್ನಡ ಕೃತಿಗಳ ಫ್ರೆಂಚ್ ಭಾಷಾಂತರದ ಯೋಜನೆಯೂ ಇದೆ. ಭಾರತ ಮತ್ತು ಫ್ರಾನ್ಸ್ ನಡುವೆ ಇರುವ ಸಂಬಂಧವನ್ನು ಬಲಪಡಿಸುವ ಉದ್ದೇಶವೂ ಇದರ ಹಿಂದಿದೆ.
ಸ್ಟಡಿ ಸರ್ಕಲ್‌ನ ಸಂಸ್ಥಾಪಕ ಸದಸ್ಯ ಟೆಬೆಟ್ ಇಲಿಯಾಸ್ ಹಾಗೂ ಸಹ ಸದಸ್ಯ ಪಿಕೆಟ್ ಡಾಸನೆ ಎಂಬಾಕೆ ಹಲವು ಬಾರಿ ಗೋಕರ್ಣಕ್ಕೆ ಭೇಟಿ ನೀಡಿ ಈ ಯೋಜನೆ ತಯಾರಿಸಿದ್ದಾರೆ.

ನಮ್ಮಲ್ಲಿಯ ಗ್ರಾಮ ಪಂಚಾಯಿತಿ ವ್ಯವಸ್ಥೆಯಂತೆ ಫ್ರಾನ್ಸ್‌ದಲ್ಲಿರುವ ರೆಬಲ್ ಪ್ಯಾರೀಸ್ ಕೋ ಡೆವಲಪ್‌ಮೆಂಟ್ ಸಡ್- ೨೦೦೮ ಈ ಯೋಜನೆಗೆ ಹತ್ತು ಸಾವಿರ ಯುರೋ ನೀಡಿದೆ, ರೀಜನ್ ಇಲೇ ಡಿಫ್ರಾನ್ಸ್ ಹತ್ತು ಸಾವಿರ ಯುರೋ ಹಾಗೂ ಲಾ ಫೌಂಡೇಶನ್ ಟೋಟಲ್ ಎಂಬ ಕಂಪನಿಗಳು ಐದು ಸಾವಿರ ಯುರೋ ನೀಡಿದೆ.

ಭಾರತದ ಫ್ರಾನ್ಸ್ ರಾಯಭಾರಿ ಕಚೇರಿ ಹಾಗೂ ಬೆಂಗಳೂರಿನ ಅಲಾಯನ್ಸ್ ಫ್ರಾಂಕಾಯಿಸ್ ಎಂಬ ಸಂಸ್ಥೆ ಕೂಡ ಹಣಕಾಸು ಸಹಾಯ ನೀಡುತ್ತಿದೆ.