|
|
ಪ್ರಕಟಿಸಿದ ದಿನಾಂಕ : 2010-03-11  ಚೆನ್ನೈ, ಗುರುವಾರ, 11 ಮಾರ್ಚ್ 2010( ತಾನು ಮಾಡಿರುವುದು 'ಸ್ವಾಮಿ ಸೇವೆ', ಇದನ್ನು ಮಾಧ್ಯಮಗಳು ಅತಿರೇಕವಾಗಿ ಬಿಂಬಿಸಿ ಪ್ರಸಾರ ಮಾಡುತ್ತಿವೆ ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದ ಕಾಮಿಸ್ವಾಮಿ ಹಗರಣ ಖ್ಯಾತಿ ನಟಿ ರಂಜಿತಾ, ಪರಮಹಂಸ ನಿತ್ಯಾನಂದ ಸ್ವಾಮಿಗೆ ಮಸಾಜ್ ಮಾಡುತ್ತಿರುವ ಹೊಸ ಚಿತ್ರಗಳು ಬಹಿರಂಗಗೊಂಡಿದೆ. ನಿತ್ಯಾನಂದ ಸ್ವಾಮಿಗೆ ಮಸಾಜ್ ಮಾಡುತ್ತಿರುವ ಈ ಹೊಸ ದೃಶ್ಯಗಳನ್ನು ತಮಿಳು ಟೀವಿ ಮಾಧ್ಯಮಗಳು ಪ್ರಸಾರ ಮಾಡುತ್ತಿದ್ದು, ಹಲವು ಪತ್ರಿಕೆಗಳು ಕೂಡ ಚಿತ್ರಗಳನ್ನು ಪ್ರಕಟಿಸಿವೆ. ನಕ್ಕೀರನ್ ಪಾಕ್ಷಿಕದ ವೆಬ್ಸೈಟ್ ಮತ್ತು ಯೂಟ್ಯೂಬ್ಗಳಲ್ಲೂ ಹರಿದಾಡುತ್ತಿರುವ ಇದು ತಮಿಳುನಾಡಿನಾದ್ಯಂತ ಮತ್ತಷ್ಟು ಕೋಲಾಹಲ ಸೃಷ್ಟಿಗೆ ಕಾರಣವಾಗುತ್ತಿದೆ. ಇಲ್ಲಿ ರಂಜಿತಾ ಎಂದು ಹೇಳಲಾಗಿರುವ ಮಹಿಳೆ ಸ್ವಾಮಿಯ ಅಂಗಿಯನ್ನು ಅರ್ಧದಷ್ಟು ಬಿಚ್ಚಿ, ಎಣ್ಣೆ ಹಚ್ಚಿ ಮಸಾಜ್ ಮಾಡುವ ದೃಶ್ಯಗಳಿವೆ. ಆದರೆ ಇಲ್ಲಿ ಯಾವುದೇ ಅಶ್ಲೀಲ ಎಂದು ಹೇಳಬಹುದಾದ ದೃಶ್ಯಗಳಿಲ್ಲ. ಸ್ವಾಮಿಗೆ ಸಂಪೂರ್ಣ ಮಸಾಜ್ ಮಾಡಿದ ನಂತರ ರಂಜಿತಾ ಬ್ಯಾಗ್ ಹೆಗಲಿಗೇರಿಸಿಕೊಂಡು ವಾಪಸ್ ಹೋಗುವ ದೃಶ್ಯ ವೀಡಿಯೋದಲ್ಲಿದೆ. ಭಾರೀ ಸಾಧಕ ನಿತ್ಯಾನಂದ.... ಪೂರ್ವಾಶ್ರಮದಲ್ಲಿ ರಾಜಶೇಖರನ್ ಆಗಿದ್ದ ನಿತ್ಯಾನಂದ ಸ್ವಾಮಿಗೆ ಬಾಲ್ಯದಲ್ಲಿಯೇ ಆಧ್ಯಾತ್ಮದತ್ತ ವಿಪರೀತ ಒಲವಿತ್ತು. ಕೇವಲ 10 ವರ್ಷದವನಾಗಿದ್ದಾಗಲೇ ಜ್ಯೋತಿಷಿಯೊಬ್ಬರು, ಈತ ಮುಂದೊಂದು ದಿನ ಸನ್ಯಾಸಿಯಾಗುತ್ತಾನೆ ಎಂದು ಭವಿಷ್ಯ ನುಡಿದಾಗಲೂ ಹೆತ್ತವರು ತಲೆಕೆಡಿಸಿಕೊಂಡಿರಲಿಲ್ಲ ಎಂದು ಕುಮಾರಸ್ವಾಮಿ ವಿವರಣೆ ನೀಡುತ್ತಾರೆ. ಈಗ ಸ್ವಾಮಿಯಾಗಿರುವ ರಾಜಶೇಖರನ್ ತಂದೆ ಅರುಣಾಚಲಂ ತಿರುವಣ್ಣಾಮಲೈಯಲ್ಲೇ ಒಂದು ಸಣ್ಣ ಅಂಗಡಿ ಇಟ್ಟುಕೊಂಡು ವ್ಯಾಪಾರ ಮಾಡುತ್ತಿದ್ದರು. ಮಗ ಹತ್ತನೇ ತರಗತಿಯನ್ನು ಮುಗಿಸಿದ ಬಳಿಕ ಡಿಪ್ಲೋಮಾ ಓದಿಸುವ ಬಯಕೆ ಅವರದ್ದಾಗಿತ್ತು. ಆದರೆ ಶಿಕ್ಷಣದಲ್ಲಿ ಆಸಕ್ತಿ ಕಳೆದುಕೊಂಡಿದ್ದ ಈತ ಯಂತ್ರ-ಮಂತ್ರಗಳ ಮೊರೆ ಹೋಗಿದ್ದ. ಇದು ಅರುಣಾಚಲಂ ಅರಿವಿಗೆ ಬಂದಿರಲಿಲ್ಲ ಎನ್ನುವುದು ಸ್ವಾಮಿ ಚಿಕ್ಕಪ್ಪನ ಅನಿಸಿಕೆ. ಯೋಗದ ಬಗ್ಗೆ ಸಾಕಷ್ಟು ತಿಳಿದುಕೊಂಡಿದ್ದ ನಿತ್ಯಾನಂದ ದೇವಿ ಭಕ್ತರಾಗಿದ್ದರು. ಕುಪ್ಪುಮ್ಮಾಳ್ ಎಂಬ ಮಹಿಳೆಯಿಂದ ದೇವಿಯ ಉಪಾಸನಾ ದೀಕ್ಷೆಯನ್ನೂ ಪಡೆದಿದ್ದ ನಿತ್ಯಾನಂದ ಯೋಗಗುರು ರಘುಪತಿ ಎಂಬವರಿಂದ ಯೋಗ ಕಲಿತಿದ್ದ. 1995ರಲ್ಲಿ ಚೆನ್ನೈಗೆ ಬಂದ ಬಾಲಕ ರಾಜಶೇಖರನ್ ಆಟೋ ಕಂಪನಿಯೊಂದರಲ್ಲಿ ಕೆಲಸ ಮಾಡಿದ ಬಳಿಕ ಸನ್ಯಾಸತ್ವ ತೀವ್ರವಾಗಿ ರಾಮಕೃಷ್ಣಾಶ್ರಮಕ್ಕೆ ಸೆಳೆದಿತ್ತು. ಮನೆಯವರು ತೀವ್ರವಾಗಿ ವಿರೋಧಿಸಿದರೂ ವಿರಕ್ತಿಯ ಹಾದಿಗೆ ಹೋಗಿದ್ದ ರಾಜಶೇಖರನ್, ಹಿಮಾಲಯದಲ್ಲೂ ತಪಸ್ಸು ಮಾಡಿದ್ದ. ಬಳಿಕ ಬೆಂಗಳೂರಿಗೆ ವಾಪಸಾಗಿ ಆಶ್ರಮ ತೆರೆದು, ದೇಶ-ವಿದೇಶಗಳಲ್ಲಿ ಪ್ರಸಿದ್ಧಿ ಪಡೆದರು. ಸಾವಿರಾರು-ಲಕ್ಷಾಂತರ ಮಂದಿಗೆ ಸಹಾಯ ಮಾಡಿದ್ದ. ಈ ಹಂತದಲ್ಲಿ ವೈಭೋಗದಲ್ಲಿ ಮೆರೆದಾಡಿದ ಸ್ವಾಮಿಗೆ ಲೌಕಿಕ ಜೀವನದತ್ತ ಮನಸ್ಸು ವಾಲಿರಬಹುದು. ಆದರೂ ನಮಗೆ ಇದನ್ನು ನಂಬಲು ಸಾಧ್ಯವಾಗುತ್ತಿಲ್ಲ ಎಂದು ನಿತ್ಯಾನಂದನ ಚಿಕ್ಕಪ್ಪ ಕುಮಾರಸ್ವಾಮಿ ವಿವರಣೆ ನೀಡಿದ್ದಾರೆ. ಕುಂಭಮೇಳಕ್ಕೆ ಪ್ರವೇಶವಿಲ್ಲ... ಪರಮಹಂಸ ನಿತ್ಯಾನಂದ ಸ್ವಾಮಿಯವರಿಗೆ ನೀಡಲು ಉದ್ದೇಶಿಸಿದ್ದ ಸ್ಥಳವನ್ನು ನಿರಾಕರಿಸಲು ನಿರ್ಧರಿಸಲಾಗಿದೆ. ಹಾಗಾಗಿ ಅವರು ಇಲ್ಲಿ ಬಂದು ಧಾರ್ಮಿಕ ಕಾರ್ಯಗಳನ್ನು ನಡೆಸುವಂತಿಲ್ಲ ಎಂದು ಕುಂಭ ಮೇಳ ಆಡಳಿತ ಮಂಡಳಿ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ. ಕುಂಭಮೇಳದಲ್ಲಿದ್ದಾರೆ: ಸ್ವಾಮಿ ವಕೀಲ ಚೆನ್ನೈಯಲ್ಲೇ ಇದ್ದಾರೆ.... ತಮಿಳು ವಾರ್ತಾ ವಾಹಿನಿಯೊಂದು ನಟಿ ರಂಜಿತಾ ಜತೆ ಸ್ವಾಮಿ ಕಾಮಕೇಳಿಯಲ್ಲಿ ಪಾಲ್ಗೊಂಡ ವೀಡಿಯೋ ತುಣುಕನ್ನು ಪ್ರಸಾರ ಮಾಡಿದ ನಂತರ ತಮಿಳುನಾಡು ಮತ್ತು ಕರ್ನಾಟಕ ಸರಕಾರಗಳು ಅವರ ಹುಡುಕಾಟದಲ್ಲಿವೆ. ಅವರು ಅಡಗಿಕೊಂಡಿದ್ದಾರೆ ಎಂದು ಹೇಳಲಾಗುತ್ತಿರುವ ಮೈಸೂರು, ತಿರುವನಮಲೈ ಮುಂತಾದೆಡೆ ಸತತ ದಾಳಿಗಳನ್ನು ನಡೆಸಲಾಗುತ್ತಿದೆ. ಆದರೆ ಇನ್ನೂ ಪತ್ತೆಯಾಗಿಲ್ಲ.
ಪದೇ ಪದೇ ಪ್ರಸಾರ ಮಾಡೋದು ಕೀಳಭಿರುಚಿಯಂತೆ! ಸ್ವಾಮಿ ಪಾಲ್ಗೊಂಡಿದ್ದಾರೆ ಎಂದು ಆರೋಪಿಸಿರುವ ವೀಡಿಯೋ ತುಣುಕನ್ನು ಪದೇ ಪದೇ ಪ್ರಸಾರ ಮಾಡುವುದು ನಮ್ಮ ಸಂಸ್ಕೃತಿಗೆ ಹೊಂದಿಕೊಳ್ಳುವುದಿಲ್ಲ ಎಂದು ಯಡಿಯೂರಪ್ಪ ಹೇಳಿದ್ದಾರೆಂದು 'ಟೈಮ್ಸ್ ಆಫ್ ಇಂಡಿಯಾ' ತನ್ನ ವರದಿಯಲ್ಲಿ ಹೇಳಿದೆ. ಈ ಪ್ರಕರಣ ನಡೆದಿರುವುದು ಕರ್ನಾಟಕದಲ್ಲಿ ಎಂದು ತಮಿಳುನಾಡಿನ ಅಧಿಕಾರಿಗಳು ಹೇಳಿರುವುದನ್ನು ಕೇಳಿದ್ದೇನೆ. ಸ್ವಾಮಿ ಭೂಗತರಾಗಿದ್ದಾರೆ. ಈಗ ಹೇಳುತ್ತಿರುವ ಭೂಮಿ ಸರಕಾರಕ್ಕೆ ಸೇರಿಲ್ಲವಾಗಿರುವುದರಿಂದ ನಾವು ಅದನ್ನು ವಶಪಡಿಸಿಕೊಳ್ಳು ವಂತಿಲ್ಲ. ಈ ಸಂಬಂಧ ಯಾರಾದರೂ ದೂರು ನೀಡಿದಲ್ಲಿ, ನಾವು ಕ್ರಮ ಕೈಗೊಳ್ಳುತ್ತೇವೆ ಎಂದು ಮುಖ್ಯಮಂತ್ರಿ ತಿಳಿಸಿದ್ದಾರೆ ನಿತ್ಯಾನಂದನ ಮತ್ತೊಂದು ವೀಡಿಯೋ ಸಂದರ್ಶನ ಸ್ವಾಮಿ ನಿತ್ಯಾನಂದರ ಕಾಮಲೀಲೆಗಳು ಚಿತ್ರ ವಿಚಿತ್ರ ತಿರುವುಗಳನ್ನು ಪಡೆದುಕೊಳ್ಳುತ್ತಾ, ನಿತ್ಯಾನಂದ ಸ್ವಾಮಿ ಎಲ್ಲಿದ್ದಾರೆಂಬ ಕುರಿತು ಗೊಂದಲಗಳು ಮುಂದುವರಿದಿರುವಂತೆಯೇ, ಸಂದರ್ಶನವೊಂದರಲ್ಲಿ ನಿತ್ಯಾನಂದ ಸ್ವಾಮಿ ಅವರು, ತಮ್ಮ ಮೇಲಿನ ಆರೋಪಗಳೆಲ್ಲಾ 'ಕುತಂತ್ರ, ಸುಳ್ಳು ಸುದ್ದಿ, ಗಾಳಿ ಸುದ್ದಿ' ಎಂದು ತಳ್ಳಿ ಹಾಕಿದ್ದಾರೆ. ಸಂಶೋಧಕರೆಂದು ಹೇಳಿಕೊಂಡ ಅಮೆರಿಕ ನಿವಾಸಿ, ರಾಜೀವ್ ಮಲ್ಹೋತ್ರಾ ಎಂಬವರು ಕುಂಭಮೇಳಕ್ಕೆ ಹೋಗಿದ್ದಾರೆ ಎನ್ನಲಾಗತ್ತಿರುವ ನಿತ್ಯಾನಂದ ಸ್ವಾಮಿಯನ್ನು ಅಲ್ಲೇ ಸಂದರ್ಶಿಸಿರುವ ಕುರಿತಾದ ವೀಡಿಯೋ, ನಿತ್ಯಾನಂದ ಧ್ಯಾನಪೀಠದ ವೆಬ್ ಸೈಟಿನಲ್ಲಿ ಲಭ್ಯವಿದೆ. ಸಂದರ್ಶನದಲ್ಲಿ ಜಮೀನು ಅಕ್ರಮ, ಶ್ರೀಗಂಧ ಪತ್ತೆ, ಅತ್ಯಾಚಾರ ಆರೋಪ, ನಿಗೂಢ ಸಾವಿನ ಆರೋಪ ಮುಂತಾದ ಪ್ರಶ್ನೆಗಳನ್ನು ಕೇಳಲಾಗಿದ್ದರೂ, ಜನರಲ್ಲಿ ಕುತೂಹಲಕ್ಕೆ ಕಾರಣವಾಗಿರುವ ರಂಜಿತಾ ಜತೆಗಿನ ಕಾಮದಾಟದ ಬಗ್ಗೆ ಪ್ರಸ್ತಾಪವೇ ಇರಲಿಲ್ಲ ಎಂಬುದು ಗಮನಾರ್ಹ. ಮಾತ್ರವಲ್ಲದೆ, ಹೊರಗಿನವರ ಸಂದರ್ಶನಕ್ಕೂ ದೊರೆಯುವ ಈ ಸ್ವಾಮೀಜಿ, ಭಾರತೀಯ ಮಾಧ್ಯಮಗಳ ಕೈಗೆ ಅಥವಾ ಪೊಲೀಸರ ಕೈಗೆ ಸಿಗುತ್ತಿಲ್ಲವೇಕೆ ಎಂಬುದೂ ಕುತೂಹಲಕರವಾಗಿದೆ. ಜಮೀನು ಕಾನೂನುಬದ್ಧ ಸಾವು ಸಹಜ, ಕೊಲೆಯಲ್ಲ ಬಲವಂತವಿಲ್ಲ ಎಲ್ಲರೂ ಸ್ವಇಚ್ಛೆಯಿಂದ ಆಶ್ರಮದಲ್ಲಿದ್ದಾರೆ. ಹೋಗಲು ಬಯಸಿದರೆ ಯಾರು ಬೇಕಾದರೂ ಹೋಗಬಹುದು. ಆಶ್ರಮಕ್ಕೆ ಪೂರ್ಣ ಪ್ರಮಾಣದ ಗೇಟ್ ಕೂಡ ಇಲ್ಲ, ಯಾರು ಬೇಕಾದರೂ ಬಂದು-ಹೋಗಬಹುದು ಎಂದು ಹೇಳಿದರು. ಅತ್ಯಾಚಾರ ಆರೋಪ ಸುಳ್ಳು ಅಕ್ರಮ ಶ್ರೀಗಂಧ ಅಲ್ಲ ಆರ್ಥಿಕ ಅವ್ಯವಹಾರವಾಗಿಲ್ಲ ಪರಮಹಂಸ ನಿತ್ಯಾನಂದರನ್ನು ಸಂದರ್ಶಿಸಿದ್ದು ತಾವೊಬ್ಬ ಸಂಶೋಧಕ ಎಂದು ತಮ್ಮನ್ನು ಪರಿಚಯಿಸಿಕೊಂಡ ಅಮೆರಿಕದ ಪ್ರಿನ್ಸ್ಟನ್ ನಿವಾಸಿ ರಾಜೀವ್ ಮಲ್ಹೋತ್ರಾ. ತಾನು ಕೂಡ ಸ್ವಾಮೀಜಿಯಿಂದಜ ಪ್ರೇರಣೆ, ಬೋಧನೆ ಪಡೆದಿದ್ದು, ಸ್ವಾಮೀಜಿ ಬಗ್ಗೆ ಆರೋಪಗಳು ಕೇಳಿಬಂದ ಹಿನ್ನೆಲೆಯಲ್ಲಿ ಸತ್ಯಾಂಶ ಅರಿಯಲು ಭಾರತಕ್ಕೆ ಬಂದು, ಕುಂಭ ಮೇಳ ತಾಣದಲ್ಲಿ ಸಂದರ್ಶಿಸುತ್ತಿರುವುದಾಗಿಯೂ ಹೇಳಿಕೊಂಡಿದ್ದಾರೆ.
 |
|
