- ಮಹಿಳೆಗೆ ಉತ್ತಮ ನಿರ್ದೇಶನ ಪುರಸ್ಕಾರ
- ಆಸ್ಕರ್ ಇತಿಹಾಸದಲ್ಲೇ ಇದು ಮೊದಲು
- ಭಾರತೀಯ ಕಥೆ ಆಧರಿತ ’ಕವಿ’ಗೆ ನಿರಾಶೆ

ಲಾಸ್ ಏಂಜಲೀಸ್: ಈ ಬಾರಿಯ ಆಸ್ಕರ್ ಅಕಾಡೆಮಿ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಸ್ತ್ರೀಶಕ್ತಿಯ ಪ್ರಾಬಲ್ಯ. ಆಸ್ಕರ್ ಇತಿಹಾಸದಲ್ಲೇ ಮೊದಲ ಬಾರಿಗೆ ಅತ್ಯುತ್ತಮ ನಿರ್ದೇಶನ ಪ್ರಶಸ್ತಿಯನ್ನು ಬಾಚಿಕೊಂಡ ಕ್ಯಾಥರೀನ್ ಬಿಜೆಲೋ. ಅವರದ್ದೇ ನಿರ್ದೇಶನದ ’ದಿ ಹರ್ಟ್ ಲಾಕರ್’ ಅತ್ಯುತ್ತಮ ಚಿತ್ರ. ಈ ಸಿನಿಮಾಕ್ಕೆ ಬರೋಬ್ಬರಿ ೬ ಪ್ರಶಸ್ತಿಗಳ ಗುಚ್ಛ. ಭಾರೀ ನಿರೀಕ್ಷೆಯಲ್ಲಿದ್ದ ’ಅವತಾರ್’, ಕಿರು ಚಿತ್ರ ’ಕವಿ’ಗೆ ನಿರಾಶೆ. ಆದರೂ ಅವತಾರ್‌ಗೆ ೩ ಪ್ರಶಸ್ತಿ. ಇವು ೮೨ನೇ ಆಸ್ಕರ್ ಅಕಾಡೆಮಿ ಪುರಸ್ಕಾರದ ಹೈಲೈಟ್ಸ್.

ಇತಿಹಾಸ ನಿರ್ಮಿಸಿದ ಬಿಜೆಲೋ: ವಿಶ್ವ ಮಹಿಳಾ ದಿನದಂದೇ ನಿರ್ದೇಶಕಿ ಕ್ಯಾಥರೀನ್ ಬಿಜೆಲೋ ಇತಿಹಾಸ ನಿರ್ಮಿಸಿದ್ದಾರೆ. ೮೨ ವರ್ಷಗಳ ಆಸ್ಕರ್ ಇತಿಹಾಸದಲ್ಲಿ ಮಹಿಳೆಯೊಬ್ಬರು ಇದೇ ಮೊದಲ ಬಾರಿಗೆ ಅತ್ಯುತ್ತಮ ನಿರ್ದೇಶನಕ್ಕಾಗಿ ಪ್ರಶಸ್ತಿ ಪಡೆದಿದ್ದಾರೆ.

ಆಸ್ಕರ್ ಪ್ರಶಸ್ತಿಯ ರೇಸ್‌ನಲ್ಲಿ ಇವರಿಗೆ ತೀವ್ರ ಪೈಪೋಟಿ ನೀಡಿದ್ದು ಅವತಾರ್ ನಿರ್ದೇಶಕ ಜೇಮ್ಸ್ ಕ್ಯಾಮೆರಾನ್. ವಿಶೇಷವೆಂದರೆ ಕ್ಯಾಮೆರಾನ್, ಕ್ಯಾಥರೀನ್‌ರ ಮಾಜಿ ಪತಿ.

ಕ್ಯಾಥರೀನ್ ನಿರ್ದೇಶನದ ’ದಿ ಹರ್ಟ್ ಲಾಕರ್’ ಮತ್ತು ಕ್ಯಾಮೆರಾನ್ ನಿರ್ದೇಶನದ ’ಅವತಾರ್’ ನಡುವೆ ಅತ್ಯುತ್ತಮ ಚಿತ್ರ ಪ್ರಶಸ್ತಿಗಾಗಿ ಪೈಪೋಟಿ ಏರ್ಪಟ್ಟಿತ್ತು. ಅಂತಿಮವಾಗಿ ಹರ್ಟ್ ಲಾಕರ್ ಅತ್ಯುತ್ತಮ ಸಿನಿಮಾ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡಿತು.

 ಅತ್ಯುತ್ತಮ ನಟ ಪ್ರಶಸ್ತಿಯನ್ನು ಜೆಫ್ ಬ್ರಿಡ್ಜಸ್ ಬಾಚಿಕೊಂಡರೆ, ಅತ್ಯುತ್ತಮ ನಟಿ ಪುರಸ್ಕಾರಕ್ಕೆ ಸಾಂದ್ರಾ ಬುಲ್ಲೋಕ್ ಪಾತ್ರರಾದರು. ಅತ್ಯುತ್ತಮ ವಿದೇಶಿ ಭಾಷಾ ಚಿತ್ರಕ್ಕೆ ಅರ್ಜೆಂಟೀನಾದ ’ದಿ ಸೀಕ್ರೆಟ್ ಇನ್ ದೇರ್ ಐಸ್’ ಪಾತ್ರವಾಯಿತು. ’ದಿ ಹರ್ಟ್ ಲಾಕರ್’ ಇರಾಕಿ ಯುದ್ಧ ನಾಟಕವನ್ನು ಆಧರಿಸಿದ ಕಥೆಯಾಗಿದೆ. ಅಷ್ಟೇ ಅಲ್ಲ, ಬಾಕ್ಸ್ ಆಫೀಸ್‌ನಲ್ಲಿ ಅತ್ಯಂತ ಕಡಿಮೆ ಹಣ ಗಳಿಸಿರುವ ಚಿತ್ರವೊಂದು ಆಸ್ಕರ್ ಪ್ರಶಸ್ತಿಗೆ ಪಾತ್ರವಾಗುತ್ತಿರುವುದೂ ಇದೇ ಮೊದಲು. ಹರ್ಟ್ ಲಾಕರ್ ಗಳಿಸಿದ್ದು- ೯೬ ಕೋಟಿ ರು. ಅವತಾರ್ ಗಳಿಕೆ ೯೧೦೫ ಕೋಟಿ ರು.

ಕವಿಗೆ ನಿರಾಶೆ: ಅತ್ಯುತ್ತಮ ಕಿರು ಚಿತ್ರ ಪ್ರಶಸ್ತಿಯನ್ನು ಪಡೆಯುತ್ತದೆ ಎಂದೇ ನಿರೀಕ್ಷಿಸಿದ್ದ ’ಕವಿ’ಗೆ ನಿರಾಶೆಯಾಗಿದೆ. ಭಾರತೀಯ ಬಾಲಕನೊಬ್ಬನ ಕಥೆಯನ್ನು ಹೊಂದಿರುವ ಈ ಕಿರು ಚಿತ್ರವನ್ನು ಅಮೆರಿಕದ ಗ್ರೆಗ್ ಹೆಲ್ವಿ ನಿರ್ದೇಶಿಸಿದ್ದರು. ಆಸ್ಕರ್ ಪ್ರಶಸ್ತಿಯ ರೇಸ್‌ನಲ್ಲಿ ಭಾರತೀಯ ನಂಟು ಹೊಂದಿದ್ದ ಏಕೈಕ ಚಿತ್ರ ಇದಾಗಿತ್ತು.

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ವರದಿಗಾರರು : ಗಲ್ಫ್ ಕನ್ನಡಿಗ ವರದಿಗಾರರು ಪ್ರಕಟಿಸಿದ ದಿನಾಂಕ : 2010-03-09