ಕುವೈಟ್ ಹಾಗೂ ಮಂಗಳೂರಿನ ವಿಮಾನಯಾನ ಅಧಿಕಾರಿಗಳು ಕುವೈಟಿನಿಂದ ಮಂಗಳೂರಿಗೆ ನೇರ ವಿಮಾನಯಾನಕ್ಕೆ ಹಸಿರು ನಿಶಾನೆ ತೋರಿಸಿದ್ದಾರೆ.  ಶೀಘ್ರದಲ್ಲಿಯೇ ಏರ್ ಇಂಡಿಯಾ ಎಕ್ಸ್ ಪ್ರೆಸ್ ಕುವೈಟಿನಿಂದ ಮಂಗಳೂರಿಗೆ ನೇರ ವಾಯುಯಾನ ಸಂಚಾರ ಆರಂಭಿಸಲಿದೆ ಎಂದು ಮಂಗಳೂರಿನ ವಿಮಾನ ನಿಲ್ಧಾಣ ಅಧಿಕಾರಿಗಳು ಭರವಸೆ ನೀಡಿದ್ದಾರೆ.  ಈ ಯಾನವು ಕುವೈಟಿನಲ್ಲಿರುವ ಭಾರತೀಯರ ಅದರಲ್ಲೂ  ಅನಿವಾಸಿ ಕರಾವಳಿ ಕನ್ನಡಿಗರ ಬಹುದಿನದ ಕನಸಾಗಿದ್ದು ಕೆಲದಿನಗಳ ಹಿಂದೆ ದುಬೈ ಮಂಗಳೂರು ನೇರ ವಿಮಾನಯಾನ ಪ್ರಾರಂಭವಾದ ಮೇಲೆ ಈ ಕನಸಿಗೆ ಗರಿ ಮೂಡಿತ್ತು. 

ಕಳೆದ ದಿನಗಳಲ್ಲಿ  ಪ್ರಮುಖ ಮಂತ್ರಿಯೊಬ್ಬರನ್ನೊಳಗೊಂಡ ಕುವೈಟ್ ಕನ್ನಡಿಗರ ಬಳಗ  ಈ ವಿಮಾನಯಾನವನ್ನು  ಆದಷ್ಟು ಬೇಗನೇ  ಆರಂಭಿಸುವಂತೆ ವಿಮಾನಯಾನ ಪ್ರಾಧಿಕಾರಕ್ಕೆ ತನ್ನ ಬೇಡಿಕೆ ಸಲ್ಲಿಸಿತ್ತು.  ಇವರ ಮನವಿಯನ್ನು ಮನ್ನೈಸಿದ ಪ್ರಾಧಿಕಾರ ತನ್ನ ಸಮ್ಮತಿ ಸೂಚಿಸಿದೆ.  ಮಂಗಳೂರಿನ ಅಂತರ್ರಾಷ್ಟ್ರೀಯ ವಿಮಾನ ನಿಲ್ದಾಣದ ನಿರ್ದೇಶಕರಾದ ಶ್ರೀ ಎಮ್.ಆರ್. ವಾಸುದೇವ್ ಅವರು ಈ ಬಗ್ಗೆ ವಿವರ ನೀಡುತ್ತಾ ಅಕ್ಟೋಬರ್ 28ರ ನಂತರ ಯಾವುದೇ ದಿನದಲ್ಲಿ ಈ ಯಾನ ಪ್ರಾರಂಭವಾಗಬಹುದೆಂದು ತಿಳಿಸಿದ್ದಾರೆ.

ವಿಮಾನಯಾನದ ಸಂಭಾವ್ಯ ವೇಳಾಪಟ್ಟಿ ಇಂತಿದೆ (ಅಂತಿಮ ಕ್ಷಣಗಳ ಬದಲಾವಣೆಗೆ ಒಳಪಟ್ಟಿದೆ):   

ಪ್ರಯಾಣದ ದಿನಗಳು: ವಾರದಲ್ಲಿ ಮೂರು ದಿನಗಳು (ಮಂಗಳವಾರ, ಗುರುವಾರ, ಹಾಗೂ ಶನಿವಾರ)

ಕುವೈಟಿನಿಂದ ಹೊರಡುವ ಸಮಯ :  ರಾತ್ರಿ 11:20

ಮಂಗಳೂರಿಗ ಆಗಮಿಸುವ ಸಮಯ: ಮರುದಿನ ಬೆಳಿಗ್ಗೆ 6:10ಕ್ಕೆ

ಮಂಗಳೂರಿನಿಂದ ಹೊರಡುವ ಸಮಯ :  ರಾತ್ರಿ 10:10ಕ್ಕೆ

ಕುವೈಟಿಗೆ  ಆಗಮಿಸುವ ಸಮಯ: ರಾತ್ರಿ 11:10 (ಕುವೈಟ್ ಸಮಯ)

ಕಳೆದವರ್ಷ ಅಕ್ಟೋಬರ್ 6 ರಿಂದ ದುಬೈ ಮಂಗಳೂರಿಗೆ ನೇರ ಪ್ರಯಾಣ ಆರಂಭಿಸಿ ಮಂಗಳೂರು ಅಂತರ್ರಾಷ್ಟ್ರೀಯ ವಾಯುಯಾನಕ್ಕೆ ನಾಂದಿ ಹಾಡಿದ್ದನ್ನು ಇಲ್ಲಿ ಸ್ಮರಿಸಬಹುದು.  ಈಗ ಸಧ್ಯಕ್ಕೆ ಮಂಗಳೂರಿಗೆ ದೋಹಾ-ಬಹ್ರೈನ್, ದುಬೈ ಹಾಗೂ ಮಸ್ಕತ್ ನಗರಗಳಿಗೆ ನೇರ ಸಂಪರ್ಕ ಒದಗಿಸಿದ್ದು  ಕುವೈಟಿನ ಈ ಯಾನದೊಂದಿಗೆ ಜಿ.ಸಿ.ಸಿ ದೇಶಗಳ ಐದು ನಗರಗಳ ಸಂಪರ್ಕ ಹೊಂದಿದಂತಾಗ್ದೆ.  ಶೀಘ್ರದಲ್ಲಿ ಸೌದಿ ಅರೇಬಿಯಾಕ್ಕೂ ಈ ಸೇವೆ ವಿಸ್ತರಿಸಲಿದೆ.

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ಕೃಪೆ : ಕಾಮತ್, ಮಂಜೇಶ್ವರ ವರದಿಗಾರರು : ಅರ್ಶದ್ ಹುಸೇನ್ ಎಂ.ಹೆಚ್ ಪ್ರಕಟಿಸಿದ ದಿನಾಂಕ : 2007-10-15