ಮೆಲ್ಬರ್ನ್, ಫೆ. ೧೨: ಹಣಕಾಸು ವಿಚಾರದಲ್ಲಿ ಏರ್ಪಟ್ಟ ವಿವಾದ ಭಾರತೀಯ ಸಹೋದರರಿಬ್ಬರ ಹತ್ಯೆಯಲ್ಲಿ ಅಂತ್ಯಗೊಂಡ ಘಟನೆ ಪಶ್ಚಿಮ ಆಸ್ಟ್ರೇಲಿಯಾದ ಪರ್ತ್‌ನಲ್ಲಿ ಶುಕ್ರವಾರ ನಡೆದಿದೆ.

ಮೊರ್ಲಿ ವ್ಯಾಪ್ತಿಯ ಕ್ರಿಮಿಯಾ ಬೀದಿಯ ಬಾಡಿಗೆ ಮನೆಯಲ್ಲಿ ಹಣಕಾಸು ಹಾಗೂ ವಾಸ್ತವ್ಯ ವಿಚಾರದಲ್ಲಿ ನಡೆದ ಹೊಡೆದಾಟದಲ್ಲಿ ಗಂಭೀರ ಗಾಯಗೊಂಡಿದ್ದ ೧೯ ಹಾಗೂ ೨೦ರ ಹರೆಯದ ಇಬ್ಬರು ಭಾರತೀಯ ಸಹೋದರರು ಸಾವನ್ನಪ್ಪಿದ್ದು, ಇವರನ್ನು ಇನ್ನಿಬ್ಬರು ವ್ಯಕ್ತಿಗಳು ಚೂರಿಯಿಂದ ಇರಿದು ಹತ್ಯೆಗೈದಿರುವ ಸಾಧ್ಯತೆಗಳಿವೆ ಎಂದು ‘ಪರ್ತ್‌ನೌ’ ವರದಿ ಮಾಡಿದೆ.

ಘಟನೆಗೆ ಸಂಬಂಧಿಸಿ ೨೨ರ ಹರೆಯದ ಭಾರತೀಯ ವಿದ್ಯಾರ್ಥಿಯ ಮೇಲೆ ಶಂಕೆ ವ್ಯಕ್ತಪಡಿಸಿರುವ ಪೊಲೀಸರು ವಿಚಾರಣೆಗಾಗಿ ಆತನನ್ನು ವಶಕ್ಕೆ ತೆಗೆದುಕೊಂಡಿದ್ದಾರೆ. ಬಂಧಿತ ವಿದ್ಯಾರ್ಥಿಯನ್ನು ಶನಿವಾರ ಪೂರ್ವ ಪರ್ತ್ ಮೆಜಿಸ್ಟ್ರೇಟ್ ಕೋರ್ಟ್‌ಗೆ ಹಾಜರುಪಡಿಸುವ ನಿರೀಕ್ಷೆಯಿದೆ.

ಆರೋಪಿಯನ್ನು ಪರ್ತ್‌ನ ಬಿಯೋಫೋರ್ಟ್ ಬೀದಿಯಲ್ಲಿರುವ ಪಶ್ಚಿಮ ಆಸ್ಟ್ರೇಲಿಯಾ ಪೊಲೀಸ್ ತನಿಖಾ ಮುಖ್ಯಕಚೇರಿಗೆ ಹೆಚ್ಚಿನ ವಿಚಾರಣೆಗಾಗಿ ಕರೆದೊಯ್ಯಲಾಗಿದ್ದು,ಆತನನ್ನು ಗಂಭೀರ ಅಪರಾಧಗಳ ತನಿಖಾ ತಂಡ ವಿಚಾರಣೆ ನಡೆಸುತ್ತಿದೆ. ಮೃತರು ಹಾಗೂ ಬಂಧಿತನ ಗುರುತನ್ನು ಪೊಲೀಸರು ಇನ್ನೂ ಬಹಿರಂಗಪಡಿಸಿಲ್ಲ.

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ವರದಿಗಾರರು : ಗಲ್ಫ್ ಕನ್ನಡಿಗ ವರದಿಗಾರರು ಪ್ರಕಟಿಸಿದ ದಿನಾಂಕ : 2010-02-13