ಪಣಜಿ: `ಸ್ಲಂ ಡಾಗ್ ಮಿಲಿಯನೇರ್' ನಾನು ನೋಡಿದ ಅತ್ಯಂತ ಕೆಟ್ಟ ಚಿತ್ರ.... ಹೀಗೆಂದು ಆಸ್ಕರ್ ಪ್ರಶಸ್ತಿ ವಿಜೇತ ಚಿತ್ರಕ್ಕೆ `ಗೌರವ' ನೀಡಿದವರು ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತ, ಪದ್ಮ ಭೂಷಣ ಗಿರೀಶ್ ಕಾರ್ನಾಡ್.

ರಂಗಭೂಮಿ, ಕಲೆ, ಸಿನಿಮಾ, ಬರಹ... ಹೀಗೆ ಹಲವು ಕ್ಷೇತ್ರಗಳಲ್ಲಿ ಸೈ ಎನಿಸಿಕೊಂಡಿರುವ ಕಾರ್ನಾಡ್, ಸ್ಲಂ ಡಾಗ್ ಚಿತ್ರಕ್ಕೆ ಮಂಗಳಾರತಿ ಮಾಡಿದ್ದಾರೆ. ಪಣಜಿಯಲ್ಲಿ ನಡೆದ `ವಸಾಹತು ಶಾಹಿ ಮತ್ತು ಸಂಸ್ಕೃತಿ' ಉಪನ್ಯಾಸ ಕಾರ್‍ಯಕ್ರಮದಲ್ಲಿ ಮಾತನಾಡಿದ ಕಾರ್ನಾಡ್, ಭಾರತೀ ಯ ಚಿತ್ರರಂಗದ ಬಗ್ಗೆ ಬೆಳಕು ಚೆಲ್ಲಿದರು.

ಭಾರತವನ್ನು ಅತ್ಯಂತ ಕೆಟ್ಟದಾಗಿ ಬಿಂಬಿಸಿರುವ ಸ್ಲಂ ಡಾಗ್‌ಗೆ ಅದು ಹೇಗೆ ಆಸ್ಕರ್ ಬಂತು ತಿಳಿಯದು. ಭಾರತದ ಕಥಾನಕ ಹೊಂದಿದ್ದರೂ ಈ ಚಿತ್ರ ಭಾರತದಲ್ಲೇ ಅತಿ ಕಡಿಮೆ ದಿನ ಪ್ರದರ್ಶನ ಕಂಡು ಎತ್ತಂಗಡಿಯಾಗಿದೆ. ಇದು ನಾ ನೋಡಿದ ಅತ್ಯಂತ ಕಳಪೆ ಚಿತ್ರ ಎಂದು ಕಾರ್ನಾಡ್ ಪ್ರಶ್ನೆಯೊಂದಕ್ಕೆ ಉತ್ತರಿಸಿದರು.

ಶ್ರೀಮಂತ ಸಂಸ್ಕೃತಿ ಹೊಂದಿರುವ ನಾವು (ಭಾರತೀಯರು) ಆಸ್ಕರ್, ಗ್ರ್ಯಾಮಿ ಪ್ರಶಸ್ತಿಗಳ ಮೋಹಕ್ಕೆ ಒಳಗಾಗಿರುವುದೇಕೆ ಎಂದು ತಿಳಿಯುತ್ತಿಲ್ಲ. ನಮ್ಮ ಚಿತ್ರರಂಗ ವಿಶ್ವದ ಯಾವುದೇ ಸ್ಪರ್ಧೆಗೂ ಸವಾಲೊಡ್ಡಬಲ್ಲ ಸಾಮರ್ಥ್ಯ ಹೊಂದಿದೆ ಎಂದು ಕಾರ್ನಾಡ್ ವಿವರಿಸಿದರು.

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ಕೃಪೆ : ವಿಕ ವರದಿಗಾರರು : ಸೀತಾ ಎ ಉಡುಪಿ ಪ್ರಕಟಿಸಿದ ದಿನಾಂಕ : 2010-02-09