ವಾಷಿಂಗ್ಟನ್: ಭಾರತದ ಜಲಗಡಿ ಮತ್ತು ಅದರಾಚೆಗೆ ರಕ್ಷಣೆ ನೀಡುವ ವಿಚಾರದಲ್ಲಿ ಭಾರತವೇ ಮುಂದೆ ಎಂದು ಅಮೆರಿಕ ಹೇಳಿದೆ. ಅಮೆರಿಕದ ರಕ್ಷಣಾ ಸಚಿವಾಲಯ ಬಿಡುಗಡೆ ಮಾಡಿದ ರಕ್ಷಣಾ ವಿಮರ್ಶೆಯ ವರದಿಯಲ್ಲಿ ಇದನ್ನು ಹೇಳಲಾಗಿದ್ದು, ಭಾರತದ ಆರ್ಥಿಕ ಶಕ್ತಿ, ಸಾಂಸ್ಕೃತಿಕ ಪ್ರಗತಿ ಮತ್ತು ರಾಜಕೀಯ ಪ್ರಭಾವ ಹೆಚ್ಚುತ್ತಿದ್ದಂತೆ ಜಾಗತಿಕ ವ್ಯವಹಾರಗಳಲ್ಲಿ ಹೆಚ್ಚು ಪ್ರಭಾವ ಶಾಲಿಯಾಗುತ್ತಿದೆ. ಭಾರತದ ಸೇನಾ ಶಕ್ತಿ ಕೂಡ ವ್ಯಾಪಕವಾಗಿ ಹೆಚ್ಚುತ್ತಿದೆ ಎಂದು ವರದಿ ಹೇಳಿದೆ.

ಪಾಕ್‌ಗೆ ಹೆಚ್ಚು ನೆರವು: ಈಗಾಗಲೇ ನೀಡಿರುವ ಆರ್ಥಿಕ ನೆರವನ್ನು ಸರಿಯಾಗಿ ಬಳಸಿಕೊಂ ಡಿಲ್ಲ ಎಂದು ಆರೋಪಿಸಿದರೂ ಅಮೆರಿಕ ಮತ್ತೆ ಪಾಕಿಸ್ತಾನಕ್ಕೆ ನೀಡುವ ನೆರವಿನ ಪ್ರಮಾಣವನ್ನು ಹೆಚ್ಚಿಸಿದೆ. ೨೦೧೧ನೇ ಸಾಲಿನಲ್ಲಿ ೧೪,೮೯೫ ಕೋಟಿ ರು. ನೆರವು ನೀಡುವ ಪ್ರಸ್ತಾಪವನ್ನು ಒಬಾ ಮಾ ಬಜೆಟ್‌ನಲ್ಲಿ ಮುಂದಿಟ್ಟಿದ್ದಾರೆ. ಕಳೆದ ಸಾಲಿನಲ್ಲಿ ೮೭೫೧ ಕೋಟಿ ರು. ನೆರವು ನೀಡಿತ್ತು. ಮಾತ್ರವಲ್ಲದೆ, ಟಿಬೆಟ್‌ಗೆ ೩೪.೪೪ ಕೋಟಿ ರು. ನೆರವು ನೀಡುವ ಪ್ರಸ್ತಾಪವನ್ನೂ ಒಬಾಮಾ ಸೂಚಿಸಿದ್ದಾರೆ.

ಸೂರ್ಯನ ೧೫ ಪಟ್ಟು ತೂಕದ ಕಪ್ಪುರಂಧ್ರ ಪತ್ತೆ

ವಾಷಿಂಗ್ಟನ್: ಭೂಮಿಯ ಹೊರಗೆ ಭೂಮಿಯಂಥದ್ದೇ ಗ್ರಹವೊಂದನ್ನು ಪತ್ತೆ ಮಾಡಿದ್ದಾಯ್ತು. ಈಗ, ಕಪ್ಪುರಂಧ್ರ ಪತ್ತೆ ಮಾಡಲಾಗಿದೆ. ಈ ಕಪ್ಪುರಂಧ್ರವು `ಎನ್‌ಜಿಸಿ ೩೦೦' ಎಂದು ನಾಮಕರಣ ಮಾಡಲ್ಪಟ್ಟಿರುವ ಸ್ಪೈರಲ್ ಗ್ಯಾಲಕ್ಸಿಯಲ್ಲಿ ಪತ್ತೆಯಾಗಿದ್ದು, ಇದು ನಮ್ಮ ಸೂರ್ಯನಿಗಿಂತ ೧೫ ಪಟ್ಟು ತೂಕವಿದೆ ಮತ್ತು ಭೂಮಿಯಿಂದ ೬೦ ಲಕ್ಷ ಜ್ಯೋತಿರ್ವರ್ಷ ದೂರದಲ್ಲಿದೆ.

ಕಂಪ್ಯೂಟರ್ ವೈರಸ್ ತಡೆಗೆ ಹೊಸ ಕೋಡ್

ವಾಷಿಂಗ್ಟನ್: ವೈರಸ್ ಕಾಟದಿಂದಾಗಿ ನಿಮ್ಮ ಕಂಪ್ಯೂಟರ್ ಪದೇ ಪದೇ ಸಮಸ್ಯೆಗೆ ಸಿಕ್ಕಿ ಹಾಕಿಕೊಳ್ಳುತ್ತಿದೆಯೆ? ಇದಕ್ಕಾಗಿ ಹೊಸ ರಕ್ಷಣಾ ವ್ಯವಸ್ಥೆಯೊಂದನ್ನು ಅಭಿವೃದ್ಧಿಪಡಿಸಲಾಗಿದೆ. ಪೆನ್ ಸ್ಟೇಟ್ ಕಾಲೇಜಿನ ಸಂಶೋಧಕರು ಈ ನೂತನ ಕೋಡ್ ಅನ್ನು ಅಭಿವೃದ್ಧಿಪಡಿಸಿದ್ದು, ಇದು ಅಂತರ್ಜಾಲದ ಮೂಲಕ ವೈರಸ್ ಹರಡುವುದನ್ನು ಸಂಪೂರ್ಣವಾಗಿ ತಡೆಗಟ್ಟುತ್ತದೆ ಎನ್ನಲಾಗಿದೆ.

ಸೈಬರ್ ಕ್ರೈಂ ಟ್ವಿಟ್ಟರ್, ಫೇಸ್‌ಬುಕ್ಕಲ್ಲಿ ಹೆಚ್ಚು

ನ್ಯೂಯಾರ್ಕ್: ಸೈಬರ್ ಅಪರಾಧಗಳು ದಿನೇ ದಿನೇ ಹೆಚ್ಚುತ್ತಿದ್ದು, ಹೆಚ್ಚಿನ ಅಪರಾಧಿಗಳು ಟ್ವಿಟ್ಟ ರ್, ಫೇಸ್‌ಬುಕ್ ಮತ್ತಿತರ ಸಾಮಾಜಿಕ ತಾಣಗಳ ಬಳಕೆದಾರರಾಗಿದ್ದಾರೆ ಎಂಬ ಆತಂಕಕಾರಿ ವಿಚಾರ ಬಯಲಾಗಿದೆ. ಕಳೆದ ೧ ವರ್ಷದಲ್ಲಿ ಸೈಬರ್ ಅಪರಾಧಿಗಳು ಸಾಮಾಜಿಕ ತಾಣಗಳ ಬಳಕೆದಾರರನ್ನೇ ಹೆಚ್ಚಾಗಿ ಗುರಿಯಾಗಿಸಿದ್ದಾರೆ. ಸಾಮಾಜಿಕ ತಾಣಗಳ ಶೇ.೫೭ಕ್ಕೂ ಅಧಿಕ ಬಳಕೆದಾರರಿಗೆ ಇದರಿಂದಾಗಿ ತೊಂದರೆಯಾಗಿದೆ ಎಂದು ಅಧ್ಯಯನ ವರದಿಯೊಂದು ತಿಳಿಸಿದೆ.

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ಕೃಪೆ : ಕನ್ನಡಪ್ರಭ ವರದಿಗಾರರು : ಸೀತಾ ಎ ಉಡುಪಿ ಪ್ರಕಟಿಸಿದ ದಿನಾಂಕ : 2010-02-03