Gulf Kannadiga - a reflection of Karnataka in the Gulf

{ಚಿತ್ರ-ವರದಿ: ನಕ್ರೆ ಮನೋಜ್ ಶೆಟ್ಟಿ, ಮುಂಬೈ}

ಕಾರ್ಕಳ: ಇಲ್ಲಿನ ಸಮೀಪದ ನಕ್ರೆಯ ಸುಪ್ರಸಿದ್ಧ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಕಾಲಾವಧಿ ಉತ್ಸವವು ಕಳೆದ ಜ. 22 ರಿಂದ 26ರವರೆಗೆ ವಿವಿಧ ಧಾರ್ಮಿಕ ಪೂಜ ವಿಧಿಗಳೊಂದಿಗೆ ನೆರವೇರಿತು.

ಜ. 22 ರಂದು ಬೆಳಗ್ಗಿನ ಜಾವ ಮುಂಬೈಯ ಹೊಟೇಲು ಉದ್ಯಮಿ ನಕ್ರೆ ಚಂದ್ರಕಾಂತ ಶೆಟ್ಟಿಯವರು ಅರ್ಪಿಸಿದ ರಜತ ತ್ರಿಶೂಲವನ್ನು ಮೆರವಣಿಗೆಯ ಮೂಲಕ ಶ್ರೀಕ್ಷೇತ್ರಕ್ಕೆ ತರಲಾಯಿತು. ನಂತರ ಪುತ್ತೂರು ಹಯವದನ ತಂತ್ರಿಗಳು ಮತ್ತು ದೇವಳದ ಪ್ರಧಾನ ಅರ್ಚಕ ಅನಂತಪದ್ಮನಾಭ ಭಟ್‍ರವರ ನೇತ್ರತ್ವದಲ್ಲಿ ಹಾಗೂ ದೇವಳದ ಆಡಳಿತ ಮೊಕ್ತೆಸರರಾದ ವಿಶ್ವನಾಥ ನಾಇಕ್‍ರವರ ಉಸ್ತುವಾರಿಯಲ್ಲಿ ಧ್ವಜರೋಹಣಗೊಂಡು 4 ದಿನಗಳ ಉತ್ಸವಕ್ಕೆ ಚಾಲನೆ ದೊರಕಿತು.

4 ದಿನಗಳ ಕಾಲ ದೇವಳದಲ್ಲಿ ಮಹಾಪೂಜೆ, ದೇವರ ಬಲಿಉತ್ಸವ ಸೇರಿದಂತೆ ಹಲವಾರು ಪೂಜಾವಿಧಿಗಳು ಮತ್ತು ವಿವಿಧ ದಾನಿಗಳ ವತಿಯಿಂದ ಅನ್ನ-ಸಂತರ್ಪಣೆಗಳು ನೆರವೇರಿತು. 2ನೇ ದಿನದಂದು ಪ್ರಖ್ಯಾತ ಜಾದೂಗಾರ ಸುಧಾಮರವರು ತಮ್ಮ ಅಮೋಘ ಜಾದೂ ಪ್ರದರ್ಶನದಿಂದ ಪ್ರೆಕ್ಷಕರನ್ನು ಮೂಕ ವಿಸ್ಮಿತರಾಗಿಸಿದರು. 3ನೇ ದಿನದಂದು ನಕ್ರೆಯ ಅಯ್ಯಪ್ಪ ಭಜನಾ ಮಂಡಳಿಯವರು ಭಕ್ತಿ ರಸಮಂಜರಿ ಕಾರ್ಯಕ್ರಮವನ್ನು ನಡೆಸಿ ಕೊಟ್ಟರು.

4ನೇ ದಿನಂದು ರಾತ್ರಿ ದೇವಳದ ಆವರಣದಲ್ಲಿರುವ ಮಹಿಸಂದಾಯ, ಧೂಮವತಿ-ಬಂಟ ದೈವಗಳಿಗೆ ನೇಮೋತ್ಸವ ನಡೆಯಿತು. ಶ್ರೀ ಮಹಾಲಿಂಗೇಶ್ವರ ದೇವರ ಬಲಿಮೂರ್ತಿಯನ್ನು ನಕ್ರೆ ವರ್ಣಬೆಟ್ಟು ಬಳಿ ಕೆರೆಯಲ್ಲಿ ಜಳಕ ಮಾಡಿಸಿ ನಂತರ ನಕ್ರೆಯ ಹಲವೆಡೆ ಕಟ್ಟೆಪೂಜೆಗಳನ್ನು ನೆರವೇರಿಸಲಾಗಿ ಮಂಗಳವಾರ ಮುಂಜಾವು 4 ಘಂಟೆಯ ಹೊತ್ತಿಗೆ ದೇವಳಕ್ಕೆ ಮರಳಿ ಧ್ವಜವರೋಹಣಗೈಯುವ ಮೂಲಕ 4 ದಿನಗಳ ಕಾಲದ ಉತ್ಸವಕ್ಕೆ ತೆರೆ ಎಳೆಯಲಾಯಿತು.

ಆಡಳಿತ ಮಂಡಳಿ, ಅರ್ಚಕ ವೃಂದ ಮತ್ತು ನಕ್ರೆ ಗ್ರಾಮಸ್ತರು ಉತ್ಸವದ ಯಶಸ್ಸಿಗೆ ಶ್ರಮಿಸಿದರು.