Gulf Kannadiga - a reflection of Karnataka in the Gulf

2003 ಕೊಲ್ಲಿರಾಷ್ಟ್ರದ ದುಬಾಯಿಯಲ್ಲಿ ನೆಲೆಸಿರುವ ಕನ್ನಡಿಗರಿಗೆ ಅಂದಿನ ದಿನದಲ್ಲಿ ಸಂಭ್ರಮ, ಅತುರ ಕಾತರ... ದುಬಾಯಿಗೆ ವಿಷ್ಣುವರ್ಧನ ಬರುವ ಸುದ್ದಿ ಕನ್ನಡಿಗರ ಮನೆ ಮನೆಗೆ ತಲುಪಿತ್ತು. ಕರ್ನಾಟಕ ಸಂಘ ದುಬಾಯಿ ಅದ್ದೂರಿ ಯಾಗಿ "ಕರ್ನಾಟಕೋತ್ಸವ" ಕಾರ್ಯಕ್ರಮ ಅಯೋಜಿಸಿತ್ತು. ವಿಶೇಷ ಅಕರ್ಷಣೆ ವಿಷ್ಣುವರ್ದನ್ ಸಮಾರಂಭಕ್ಕೆ ಬರುವುದಾಗಿತ್ತು......

ಹಾಲಿಡೆ ಇನ್ ಕ್ರೌನ್ ಫ್ಲಾಜಾ ಸಭಾಂಗಣ ಅಭಿಮಾನಿಗಳು ಕಿಕ್ಕಿರಿದು ಸೇರಿ ಭರ್ತಿಯಾಗಿತ್ತು. ವೇದಿಕೆಯ ಮೇಲೆ ಮೈಸೂರು ಅರಮನೆಯ ಬೃಹತ್ ಸೆಟ್ಟಿಂಗ್ಸ್ ಆಕರ್ಷಣೀಯವಾಗಿತ್ತು. ಬಾರಿಗಾತ್ರದ ಕನ್ನಡದ ಅಕ್ಷರಗಳು ಕಂಗೊಳಿಸುತಿದ್ದವು. ಒಂದು ಬದಿಯಲ್ಲಿ ವಿಷ್ಣುವರ್ಧನ್ ರವರ ಬಾರಿ ಗಾತ್ರದ ಕಟ್ ಔಟ್ ನಿಲ್ಲಿಸಲಾಗಿತ್ತು.

ಸಂಗೀತ ಸಂಜೆ ಪ್ರಾರಂಭವಾಗಿ ಮಂಜುಳಾ ಗುರುರಾಜ್ ತಂಡದವರಿಂದ ಸುಮಧುರ ಕನ್ನಡ ಗೀತೆಗಳು ಸುಶ್ರಾವ್ಯವಾಗಿ ಕೇಳಿಬರುತ್ತಿತ್ತು. ಒಂದು ಕ್ಷಣದಲ್ಲಿ ಸಂಗೀತ ಸ್ಥಬ್ದವಾಗಿ ಸಭಾಂಗಣದ ದೀಪಗಳು ಮಂಕಾಗಿ, ಪ್ರಕಾಶಮಾನವಾದ ಬೆಳಕು ಮಹಾಧ್ವಾರದ ಕಡೆಗೆ ಕೇಂದ್ರಿಕೃತ ವಾಯಿತು. ನೋಡುತಿದ್ದಂತೆ ವಿಷ್ಣುವರ್ಧನ್ ಪ್ರತ್ಯಕ್ಷರಾದರು.

ಜೈಕಾರದೊಂದಿಗೆ ಅಭಿಮಾನಿಗಳ ಗುಂಪು ಅವರನ್ನು ವೇದಿಕೆಯತ್ತ ಕರೆದುಕೊಂಡು ಬಂದರು. ವಾಧ್ಯವೃಂದದವರು ಅವರ ಪ್ರಸಿದ್ದ ಗೀತೆಗಳ ತುಣುಕುಗಳನ್ನು ಪ್ರತಿಧ್ವನಿಸುತ್ತಿದ್ದಂತೆ, ಸಭಾಂಗಣದ ಎಲ್ಲಾ ಅಭಿಮಾನಿಗಳ ಚಪ್ಪಳೆ ಹರ್ಷೋದ್ಘಾರದೊಂದಿಗೆ ವೇದಿಕೆಯ ಮೇಲೆ ಏರಿದರು. ಆ ಸಂದರ್ಭದಲ್ಲಿ ಕೆಲವು ಕ್ಷಣ ಮೂಕವಿಸ್ಮಿತರಾದರು. ಭಾವುಕರಾದರು. ಒಮ್ಮೆ ಹಿಂದೆ ತಿರುಗಿ, ಗಣೇಶ್ ರೈ ನಿರ್ಮಿಸಿದ್ದ ಮೈಸೂರು ಅರಮನೆಯನ್ನು ನೋಡಿದರು. ಇನ್ನೊಂದು ಬದಿಯಲ್ಲಿ ತಮ್ಮ ಕಟ್ ಔಟ್ ನೋಡಿದರು. ವಿದೇಶದ ನೆಲದಲ್ಲಿ ಕನ್ನಡದ ಅಕ್ಷರಗಳನ್ನು ಕಂದರು, ಹರ್ಷಿತರಾದರು. ಜೊತೆಯಲ್ಲಿ ಶ್ರೀಮತಿ ಭಾರತಿಯವರು ಸಹ ಇದ್ದರು.

ಸಮಾರಂಭದ ವೇದಿಕೆಯಲ್ಲಿ ಅಂದಿನ ಕರ್ನಾಟಕ ಸಂಘದ ಅಧ್ಯಕ್ಷರಾಗಿದ್ದ ಡಾ. ಬಿ. ಕೆ. ಯೂಸುಫ್ ರವರು ಅರಬ್ ಸಂಯುಕ್ತ ಸಂಸ್ಥಾನದಲ್ಲಿ ನೆಲೆಸಿರುವ ಸಮಸ್ತ ಕನ್ನಡಿಗರ ಪರವಾಗಿ, ಕನ್ನಡದ ಸೂಪರ್ ಸ್ಟಾರ್, ಅಭಿನವ ಭಾರ್ಗವ, ಸಾಹಸ ಸಿಂಹನಿಗೆ ಸಾಂಪ್ರದಾಯಿಕವಾಗಿ ಸ್ವಾಗತಿಸಿದರು. ಸಮಾರಂಭದಲ್ಲಿ ಗಣ್ಯರುಗಳಾದ ಡಾ. ಬಿ. ಆರ್. ಶೆಟ್ಟಿಯವರು, ಶ್ರೀ ಜಫ್ರುಲ್ಲಾ ಖಾನ್, ಶ್ರೀ ಟಿ.ಎಸ್.ಶೆಟ್ಟಿಗಾರ್, ಶ್ರೀ ಅಬ್ದುಲ್ ಲತಿಪ್ ಮತ್ತು ಕಾರ್ಯದರ್ಶಿ ಕೆ.ಜಿ.ಶೇಕರ್ ರವರು ಮತ್ತು ಅತಿಥಿಗಳಾಗಿ ಆಗಮಿಸಿದ್ದ ಕರ್ನಾಟಕ ಸರ್ಕಾರದ ಸಚಿವರಾಗಿದ್ದ ಶ್ರೀ ಡಿ. ಕೆ. ಶಿವಕುಮಾರ್, ಶ್ರೀಮತಿ ರಾಣಿ ಸತೀಶ್ ರವರ್ ಸಮುಖದಲ್ಲಿ ವಿಷ್ಣುವರ್ಧನ್ ರವರನ್ನು ಮೈಸೂರು ಪೇಟ ತೊಡಿಸಿ ಸನ್ಮಾನಿಸಿ ಗೌರವಿಸಲಾಯಿತು.

ಪೂರ್ವ ಅದ್ಯಕ್ಷ ಶ್ರೀ ಬಿ.ಜಿ.ಮೋಹನ್ ದಾಸ್ ಕಾರ್ಯಕ್ರಮವನ್ನು ತಮ್ಮದೆ ಆದ ವಿಶಿಷ್ಟ ಶೈಲಿಯಲ್ಲಿ ನೆಡೆಸಿಕೊಟ್ಟರು. ಉಪಾದ್ಯಕ್ಷ ಶ್ರೀ ಸತೀಶ್ ಶೆಟ್ಟಿ, ಶ್ರೀ ಮೋಹನ್ ಅತ್ತಾವರ್, ಶ್ರೀ ಬೋನಿಫೇಸ್ ಕಾರ್ಲೋ, ಶ್ರೀಮತಿ ಗೋಪಿಕ ಮಯ್ಯ, ಶ್ರೀ ಜಯರಾಮ ಸೋಮಯಾಜಿ, ಶ್ರೀ ದಯಾ ಕಿರೋಡಿಯನ್ ಮತ್ತಿತ್ತರು ಉಪಸ್ತಿತರಿದ್ದರು.

ಕೊಲ್ಲಿ ರಾಷ್ಟ್ರದ ಕನ್ನಡಿಗರ ಅಭಿಮಾನವನ್ನು ಕಂಡು, ಹೊರನಾಡಿನಲ್ಲಿ ಕನ್ನಡ ಭಾಷೆ, ಕಲೆ ಸಂಸ್ಕೃತಿಯನ್ನು ಜೀವಂತವಾಗಿ ಉಳಿಸಿಕೊಂಡು, ಜೊತೆಗೆ ತನ್ನನ್ನು ವಿಶೇಷ ರೀತಿಯಲ್ಲಿ ಸ್ವಾಗತಿಸಿ ಸತ್ಕರಿಸಿದಕ್ಕೆ ಕೃತಜ್ಞತೆಯನ್ನು ಮೆಚ್ಚುಗೆಯನ್ನು ವ್ಯಕ್ತ ಪಡಿಸಿದರು. ವೈವಿಧ್ಯಮಯ ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು "ಕರ್ನಾಟಕೋತ್ಸವ" ವನ್ನು ಸದಾ ನೆನಪಿನಲ್ಲಿ ಉಳಿಯುವಂತೆ ಮಾಡಿದರು.

ಕೆಲವು ಸಮಯದ ಹಿಂದೆ ವಿಷ್ಣುವರ್ಧನ್ ರವರ ಚಲನಚಿತ್ರ ’ವೀರಪ್ಪ ನಾಯಕ’ ದುಬಾಯಿಯ ಚಿತ್ರಮಂದಿರದಲ್ಲಿ ಪ್ರದರ್ಶನವಾದ ವಿಚಾರ ಕೇಳಿ ತುಂಬಾ ಸಂತೋಷಪಟ್ಟರು.

ಆಗಲಿದ ಜನನಾಯಕನಿಗೆ ಕೊಲ್ಲಿ ರಾಷ್ಟ್ರದ ಕನ್ನಡಿಗರ ಭಾವ ಪೂರ್ಣ ಶೃದ್ಧಾಂಜಲಿ...

ಕನ್ನಡ ಚಲನ ಚಿತ್ರರಂಗ ಕಳೆದ ಮೂವತ್ತೇಳು ವರ್ಷಗಳಿಂದ ಚಲನಚಿತ್ರದಲ್ಲಿ ನಾಯಕ ನಟನಾಗಿ ಮಾತ್ರವಲ್ಲದೆ, ಜನಮಾನಸದಲ್ಲಿ ಜನನಾಯಕನಾಗಿದ್ದ ಅಭಿನವ ಭಾರ್ಗವನನ್ನು ಕಳೆದುಕೊಂಡಿದೆ.

ಹೊಯ್ಸಳ ದೊರೆ ವಿಷ್ಣುವರ್ಧನ ಕನ್ನಡ ಕಲೆ ಸಂಸ್ಕೃತಿಯನ್ನು ಶಿಲ್ಪದಲ್ಲಿ ಅರಳಿಸಿ ಅಜರಾಮರಾಗಿದ್ದರೆ, ಪುಟ್ಟಣ್ಣ ನವರಿಂದ ನಾಮಕರಣಗೊಂಡ ವಿಷ್ಣುವರ್ಧನ್ ಬೆಳ್ಳಿ ತೆರೆಯ ಮೇಲೆ 200 ಚಿತ್ರಗಳನ್ನು ಮೂಡಿಸಿ ದಾಖಲೆ ಸೃಷ್ಠಿಸಿದ್ದಾರೆ.

ಕನ್ನಡ, ತಮಿಳು, ತೆಲುಗು, ಮಲಯಾಳಂ, ಹಿಂದಿ ಪಂಚ ಭಾಷೆಯ ಚಲನಚಿತ್ರ ನಟನಾಗಿ, ರಾಷ್ಟ್ರೀಯ ದೂರದರ್ಶನ ವಾಹಿನಿಯಲ್ಲಿ ಶಂಕರ್ ನಾಗ್ ರವರ ’ಮಾಲ್ಗುಡಿ ಡೇಸ್’ ನಲ್ಲಿ ೧೮ ನೇ ಸಿರಿಯಲ್ ನಲ್ಲಿ ’ಫಾರ್ಟಿಫಿಫ್ತ್ ಎ ಮಂತ್’ ನಲ್ಲಿ ಅಭಿನಯಿಸಿ ರಾಷ್ಟ್ರವ್ಯಾಪಿ ಪ್ರಸಿದ್ದಿಯನ್ನು ಪಡೆದಿದ್ದರು.

ಪ್ರಥಮಬಾರಿಗೆ ವಿದೇಶದಲ್ಲಿ ಚಿತ್ರಿಕರಣವಾದ ಕನ್ನಡ ಚಲನ ಚಿತ್ರ ದ್ವಾರಕೀಶ್ ರವರ ಸಿಂಗಪೂರದಲ್ಲಿ ರಾಜಾ ಕುಳ್ಳ, ಕನ್ನಡದ ಪ್ರಥಮ ಸಿನೆಮಾ ಸ್ಕೋಪ್ ಚಿತ್ರ ಸೊಸೆ ತಂದ ಸೌಭಾಗ್ಯದಲ್ಲಿ ನಟಿಸಿದ ಯಾವುದೇ ರಾಜಕೀಯ, ಅಪವಾದಗಳಿಂದ ದೂರವಾಗಿದ್ದ ಅಧ್ಯಾತ್ಮಿಕವಾಗಿ, ಶಿಸ್ತಿನಿಂದ ಕನ್ನಡ ಚಿತ್ರರಂಗದ ಗೌರವವನ್ನು ಭಾರತೀಯರು ಉನ್ನತ ಸ್ಥಾನದಲ್ಲಿ ನೋಡುವಂತೆ ಮಾಡಿದ ಯಜಮಾನನಿಲ್ಲದೆ ಕನ್ನಡ ಚಿತ್ರರಂಗ ಭಣಗುಡುತಿದೆ. ಸಾಹಸ ಸಿಂಹನ ಹೆಜ್ಜೆಯ ಗುರುತು ಮಾಸಿದೆ.

"ವಿಷ್ಣು" ಮತ್ತೊಮ್ಮೆ ಹುಟ್ಟಿ ಬಾ...

"ಸಿರಿಗನ್ನಡಂ ಗೆಲ್ಗೆ ಸಿರಿಗನ್ನಡಂ ಬಾಳ್ಗೆ"

ಬಿ. ಕೆ. ಗಣೇಶ್ ರೈ
ಪೂರ್ವ ಅಧ್ಯಕ್ಷರು
ಕರ್ನಾಟಕ ಸಂಘ ಶಾರ್ಜಾ