ಕುಂಬಳೆ, ಅ. ೧೨: ಸೋಮಾಲಿಯಾದ ಬಳಿ ಕಡಲು ಕಳ್ಳರಿಂದ ಅಪಹರಣಕ್ಕೊಳಗಾಗಿ ಶುಕ್ರವಾರ ಮಧ್ಯಾಹ್ನ ಬಿಡುಗಡೆಗೊಂಡ ಜೀವನ್ ಕಿರಣ್ ಡಿ’ಸೋಜ (28ವ.) ಅವರು ಶನಿವಾರ ರಾತ್ರಿ ಮನೆಗೆ ಕರೆ ಮಾಡಿ ಅ. ೧೨ರಂದು ರಾತ್ರಿ ಓಮಾನ್‌ಗೆ ತಲುಪುವುದಾಗಿ ತಿಳಿಸಿದ್ದಾರೆ.
ಹಡಗಿನಲ್ಲಿ ಆತ ಇತರರೊಂದಿಗೆ ಆಗಮಿಸುತ್ತಿದ್ದಾರೆ.

ಅಪಹರಣಕ್ಕೊಳಗಾದ 51 ದಿನಗಳಲ್ಲಿ ಸರಿಯಾದ ಆಹಾರವಿಲ್ಲದೆ ಬಳಲಿದ್ದ ಅವರಿಗೆ ಈಗ ಬೇರೆ ಹಡಗು ಗಳವರು ಆಹಾರ ವಸ್ತುಳನ್ನು ನೀಡುತ್ತಿದ್ದಾರೆಂದು ಆತ ತಿಳಿಸಿದ್ದಾರೆ.

ಓಮಾನ್‌ಗೆ ಆಗಮಿಸಿ ಹಡಗಿನ ಕಂಪೆನಿಯವರಲ್ಲಿ ಮಾತನಾಡಿದ ಬಳಿಕ ಟಿಕೆಟ್‌ಗೆ ಹಣ ಹೊಂದಿಸಿಕೊಂಡು ವಿಮಾನದಲ್ಲಿ ಊರಿಗೆ ಆಗಮಿಸುವು ದಾಗಿ ಆತ ತಿಳಿಸಿದ್ದಾರೆ. ಶುಕ್ರವಾರ ಅಥವಾ ಶನಿವಾರ ಆತ ಇಲ್ಲಿಗೆ ಆಗಮಿಸುವ ನಿರೀಕ್ಷೆ ಇದೆ.

ಸರಿಯಾಗಿ ಅನ್ನಾಹಾರ, ಸ್ನಾನ ಇತ್ಯಾದಿ ಅನುಕೂಲಗಳಿಲ್ಲದೆ ಆರೋಗ್ಯಲ್ಲಿ ಏರುಪೇರಾಗಿದ್ದು ಈಗ ಚೇತರಿಸಿಕೊಳ್ಳುತ್ತಿರುವುದಾಗಿ ಆತ ತಿಳಿಸಿದ್ದಾರೆ.

ಹಡಗಿನಲ್ಲಿ ಒಂದು ಗುಹೆಯಲ್ಲಿ ಕೂಡಿ ಹಾಕಿದಂತೆ ತಮ್ಮನ್ನು ಇರಿಸಿದ್ದು, ಕಡಲುಗಳ್ಳರು 18 ಮಂದಿ ತಮ್ಮನ್ನು ಯಾವಾಗಲೂ ಕಾಯುತ್ತಿದ್ದರು. ಹಡಗಿನ ಕಂಪೆನಿಯವರು ಅವರೊಂದಿಗೆ ಮಾತುಕತೆ ನಡೆಸಿ ಸಾಕಷ್ಟು ಮೊತ್ತ ನೀಡಿ ಬಿಡುಗಡೆಗೆ ವ್ಯವಸ್ಥೆ ಮಾಡಿದರೆಂದು ಜೀವನ್ ಕಿರಣ್ ಹೇಳಿದ್ದಾರೆ. ಅಪಹರಣಕಾರರು ತನ್ನ ಇತರ ಹಲವು ಸಹೋದ್ಯೋಗಿಗಳ ಮೊಬೈಲ್ ಫೋನುಗಳನ್ನು ಕೂಡ ಅಪಹರಿಸಿದ್ದರು.

ಆದರೆ ತನ್ನದನ್ನು ಉಳಿಸಿಕೊಳ್ಳುವಲ್ಲಿ ತಾನು ಯಶಸ್ವಿಯಾಗಿದ್ದೇನೆಂದು ಆತ ಮನೆಯವರಲ್ಲಿ ಹೇಳಿದ್ದಾರೆ.

ಆದರೆ ಸರಿಯಾಗಿ ಸಂಪರ್ಕ ಸಿಗದಿರುವ ಕಾರಣ ಮಾತುಕತೆ ಸಾಧ್ಯವಾಗುತ್ತಿಲ್ಲ . ಓಮಾನ್‌ಗೆ ಆಗಮಿಸಿದ ಬಳಿಕ ಮಾತುಕತೆ ಸಾಧ್ಯವಾಗಬಹುದೆಂದು ನಿರೀಕ್ಷಿಸಲಾಗಿದೆ.

ವಿದೇಶದಲ್ಲಿರುವ ಜೀವನ್ ಕಿರಣ್ ಸಹೋದರ ಕೂಡ ಜೀವನ್ ಆಗಮಿಸುತ್ತಿರುವ ವಿಷಯವನ್ನು  ತಿಳಿಸಿದ್ದಾರೆ.

ಅಪಹರಣವಾಗಿ ಸುಮಾರು ಒಂದು ವಾರದ ಬಳಿಕ ಮನೆಯವರಿಗೆ ವಿಷಯ ತಿಳಿದಿತ್ತು. ಅಲ್ಲಿಂದ ಸುಮಾರು 45 ದಿನಗಳ ಕಾಲ ಪ್ರತಿನಿತ್ಯ ಬಂಧು ಮಿತ್ರರು ಹಾಗೂ ಅದಿಕಾರಿಗಳ ಫೋನ್ ಕರೆಗಳು ಮನೆಯವರಿಗೆ ಕಿರಿಕಿರಿಯಾಗುವಷ್ಟು ಬರುತ್ತಿದ್ದವು. ಇದೀಗ ಬಿಡುಗಡೆಯ ಬಳಿಕ ಮನೆಗೆ ಫೋನ್ ಕರೆಗಳ ಮಹಾಪೂರವೇ ಹರಿದು ಬರುತ್ತಿದೆ. ಇದರಿಂದ ತಮಗೆ ಸಂತಸವಾಗಿದೆ ಎಂದು ಜೀವನ್ ಅವರ ಮನೆಯವರು ತಿಳಿಸಿದ್ದಾರೆ.

ಪುತ್ರನ ಬಿಡುಗಡೆಯ ಸಂತಸವನ್ನು ಮನೆಗೆ ಬಂದವರಿಗೆ ಸಿಹಿ ಹಂಚುವ ಮೂಲಕ ಅವರು ಆಚರಿಸುತ್ತಿದ್ದಾರೆ.

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ಕೃಪೆ : ಉದಯವಾಣಿ ವರದಿಗಾರರು : ಗ.ಕ.ವಿಶೇಷ ವರದಿಗಾರರು ಪ್ರಕಟಿಸಿದ ದಿನಾಂಕ : 2008-10-13