ಧಾರವಾಡ: ಧಾರವಾಡದ ಸಾಧನಕೇರಿಯಲ್ಲಿರುವ ದ.ರಾ. ಬೇಂದ್ರೆ ರಾಷ್ಟ್ರೀಯ ಟ್ರಸ್ಟ್, ನೀಡುವ ’ಅಂಬಿಕಾತನಯದತ್ತ’ ಪ್ರಶಸ್ತಿಯ ಮೊತ್ತವನ್ನು ಈ ವರ್ಷದಿಂದ 1 ಲಕ್ಷ ರು.ಗೆ ಏರಿಸಲಾಗಿದೆ ಎಂದು ಟ್ರಸ್ಟ್‌ನ ಅಧ್ಯಕ್ಷ ಡಾ. ಎಂ.ಎಂ. ಕಲಬುರ್ಗಿ ಹೇಳಿದರು.

ಪ್ರಶಸ್ತಿ ಮೊತ್ತ 10 ಸಾವಿರದಿಂದ ಆರಂಭವಾಗಿ 25 ಸಾವಿರ, 50 ಸಾವಿರ ರು.ವರೆಗೆ ನಿಗದಿ ಮಾಡಲಾಗಿತ್ತು. ಈಗ 1 ಲಕ್ಷಕ್ಕೆ ಏರಿಸಲಾಗಿದೆ.

ಸರ್ಕಾರದಿಂದ ವರ್ಷಕ್ಕೆ 11 ಲಕ್ಷ ಅನುದಾನ ಬರುತ್ತಿದೆ. ಈ ನಿಟ್ಟಿನಲ್ಲಿ ಪ್ರಶಸ್ತಿಯ ಮೊತ್ತವನ್ನು ಹೆಚ್ಚಿಸಿದೆ ಎಂದು ಮಂಗಳವಾರ ನಡೆದ ಸುದ್ದಿಗೋಷ್ಟಿಯಲ್ಲಿ ತಿಳಿಸಿದರು.

4 ನೇ ಬಾರಿ: ಈ ಅಂಬಿಕಾತನಯದತ್ತ ಪ್ರಶಸ್ತಿಯನ್ನು ಮೂರು ವರ್ಷ ರಾಜ್ಯದ ಸಾಹಿತಿಗಳಿಗೆ ಅವರ ಕಾವ್ಯ, ವಿಮರ್ಶೆ, ನಾಟಕ ಸಾಹಿತ್ಯದ ಮಾನದಂಡ ಪರಿಶೀಲಿಸಿ ನೀಡಲಾಗುವುದು.

ಹಾಗೂ 4 ನೇ ವರ್ಷ ಮಾತ್ರ ರಾಷ್ಟ್ರಮಟ್ಟದ ಕವಿಗೆ ಈ ಪ್ರಶಸ್ತಿ ನೀಡಲಾಗುವುದು. ಅಂತೆಯೇ ಈ ವರ್ಷ ರಾಷ್ಟ್ರಮಟ್ಟದ ಸಾಹಿತಿಗೆ ಅಂಬಿಕಾತನಯದತ್ತ ಪ್ರಶಸ್ತಿ ನೀಡಲು ನಿರ್ಧರಿಸಲಾಗಿದೆ ಎಂದರು.

8 ಸಾಹಿತ್ಯ ಪ್ರಕಾರಗಳಿಗೆ: ಪ್ರತಿ ವರ್ಷ ಬೇಂದ್ರೆ ರಾಷ್ಟ್ರೀಯ ಟ್ರಸ್ಟ್ ಇಬ್ಬರಿಗೆ 10 ಸಾವಿರ ರು. ಅಂತೆ ಶಿಷ್ಯ ವೇತನ ನೀಡುತ್ತಿತ್ತು. ಆದರೆ ಪ್ರಸಕ್ತ ವರ್ಷ ತಲಾ 5 ಸಾವಿರ ರು. ಮೊತ್ತದ 8 ಸಾಹಿತ್ಯ ಪ್ರಕಾರಗಳಿಗೆ ಅಂದರೆ ಕಾವ್ಯ, ನಾಟಕ, ವಿಮರ್ಶೆ, ಜೀವನ ಚರಿತ್ರೆ, ಆತ್ಮ ಚರಿತ್ರೆ, ಸಂಶೋಧನೆ, ಜನಪದ ಪ್ರಕಾರಗಳಿಗೆ ಆಯ್ಕೆಯಾದ 40 ವರ್ಷದ ಕೆಳಗಿನ ಸಾಹಿತಿಗಳಿಗೆ ನೀಡಲು ಚರ್ಚಿಸಲಾಗಿದೆ ಎಂದು ಕಲಬುರ್ಗಿ ಹೇಳಿದರು.

ಬೇಂದ್ರೆ ವೇದಿಕೆ: ರಾಜ್ಯದ ಹುನಗುಂದ ಸಿಂದಗಿ ಸೇರಿದಂತೆ ಅನೇಕ ಪ್ರದೇಶದಲ್ಲಿ ಬೇಂದ್ರೆ ವೇದಿಕೆಗಳು ಕಾರ್ಯ ನಿರ್ವಹಿಸುತ್ತಿವೆ.

ಆ ವೇದಿಕೆಗಳಿಗೆ ಪ್ರೇರಣೆ ನೀಡಲು ಬೇಂದ್ರೆ ರಾಷ್ಟ್ರೀಯ ಟ್ರಸ್ಟ್ ವರ್ಷಕ್ಕೆ ಒಂದು ಬಾರಿ ಇಲ್ಲಿ ಎಲ್ಲ ವೇದಿಕೆ ಸದಸ್ಯರನ್ನು ಒಗ್ಗೂಡಿಸಿ ಅವರ ಜೊತೆಯಲ್ಲಿ ಮುಕ್ತ ಚರ್ಚೆ ಮಾಡಲಾಗುವುದು ಎಂದರು. ಅಲ್ಲದೆ ಅವುಗಳ ಬೆಳವಣಿಗೆಗೆ ಬೇಕಾದ ಸೌಲಭ್ಯಗಳನ್ನು ಈಡೇರಿಸ ಲಾಗುವುದು ಎಂದು ತಿಳಿಸಿದರು.

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ವರದಿಗಾರರು : ಗ.ಕ.ವಿಶೇಷ ವರದಿಗಾರರು ಪ್ರಕಟಿಸಿದ ದಿನಾಂಕ : 2008-10-08