ಜೆಬೆಲ್ ಆಲಿಯ ಬಳಿಯ ನ್ಯೂ ದುಬೈ ನಗರದ ಪ್ರಮುಖ ಆಕರ್ಷಣೆ : ವಿಶ್ವದಾಖಲೆಗೆ ಸಜ್ಜು

ದುಬೈ, ಅಕ್ಟೋಬರ್ 6:  ಪ್ರಸ್ತುತ ನಿರ್ಮಾಣಹಂತದಲ್ಲಿರುವ ಬುರ್ಜ್ ದುಬೈ 800 ಮೀಟರುಗಳ ಎತ್ತರ ಪಡೆಯುತ್ತಿದ್ದಂತೆಯೇ ನಗರದ ಪ್ರಮುಖ ಕಟ್ಟಡ ನಿರ್ಮಾಣ ಸಂಸ್ಥೆಯಾದ ನಖೀಲ್ ಪ್ರಾಪರ್ಟೀಸ್ ಅದಕ್ಕಿಂತಲೂ ಎತ್ತರದ ಕಟ್ಟಡವೊಂದನ್ನು ನಿರ್ಮಿಸುವುದಾಗಿ ಪ್ರಕಟಿಸಿದೆ.  ಸಂಸ್ಥೆಯ ಮಹೋನ್ನತ ನಿರ್ಮಾಣವಾಗಿರುವ ನ್ಯೂ ದುಬೈ ನಗರ ಜೆಬೆಲ್ ಆಲಿ ಪ್ರದೇಶದಿಂದ ಅನತಿ ದೂರದಲ್ಲಿದ್ದು ಅಲ್ಲಿ ನಿರ್ಮಾಣವಾಗಲಿರುವ ಹೊಸ ಕಟ್ಟಡದ ಎತ್ತರ ಒಂದು ಕಿ.ಮೀ. ಇರುವುದೆಂದು ಪ್ರಕಟಿಸಿದೆ. 

ಒಟ್ಟು 140 ಬಿಲಿಯನ್ ದಿರ್ಹಾಂ ವೆಚ್ಚದಲ್ಲಿ ನಿರ್ಮಾಣವಾಗಲಿರುವ ಕಟ್ಟಡ ಒಟ್ಟು ಹತ್ತು ವರ್ಷಗಳಲ್ಲಿ ಸಂಪೂರ್ಣಗೊಳ್ಳಲಿದೆ.  ಆದರೆ ಈ ಕಟ್ಟಡದ ಅಂತಿಮ ಎತ್ತರ ಎಷ್ಟೆಂದು ಸಂಸ್ಥೆ ಗೋಪ್ಯವಾಗಿರಿಸಿದೆ. ಅದರಲ್ಲೂ ಸೌದಿ ಅರೇಬಿಯಾದ ಕಿಂಗ್ಡಂ ಹೋಲ್ಡಿಂಗ್ಸ್ ಸಂಸ್ಥೆ ಪ್ರಕಟಿಸಿರುವ ಒಂದು ಮೈಲು ಎತ್ತರದ ಕಟ್ಟಡ ಜೆದ್ದಾ ನಗರದಲ್ಲಿ ನಿರ್ಮಿಸಲಿರುವ ಹಿನ್ನೆಲೆಯಲ್ಲಿ ಈಗಲೇ ಈ ಕಟ್ಟಡದ ಅಂತಿಮ ಎತ್ತರವನ್ನು ಪ್ರಕಟಿಸದಿರುವುದು ಕುತೂಹಲಕ್ಕೆ ಎಡೆಮಾಡಿದೆ.

ಅಷ್ಟೇ ಅಲ್ಲದೇ ಈ ಕಟ್ಟಡದ ಸುತ್ತಮುತ್ತ ಇಪ್ಪತ್ತರಿಂದ ತೊಂಭತ್ತು ಮಹಡಿಗಳಿರುವ ಸುಮಾರು ನಲವತ್ತು ಕಟ್ಟಡಗಳು ನಿರ್ಮಾಣಗೊಳ್ಳಲಿದ್ದು 3,400 ಹೋಟೆಲ್ ಕೋಣೆ ಹಾಗೂ ಒಂದು ವೈಭವದ ಹೋಟೆಲನ್ನು ಒಳಗೊಂಡಿರುತ್ತದೆ.

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ಕೃಪೆ : ಖಲೀಜ್ ಟೈಮ್ಸ್ ವರದಿಗಾರರು : ಅರ್ಶದ್ ಹುಸೇನ್ ಎಂ.ಹೆಚ್ ಪ್ರಕಟಿಸಿದ ದಿನಾಂಕ : 2008-10-06