»ಹೆಚ್ಚಿನ ಚಿತ್ರಗಳು

ತೀರ್ಪುಗಾರರಾಗಿ ವಿಲ್ಫಿ ರೆಬಿಮಸ್, ಮೆಲ್ವಿನ್ ಪೆರಿಸ್ ಹಾಗೂ ಜೋಯೆಲ್ ಪೆರೀರಾ

ದುಬೈ, ಅಕ್ಟೋಬರ್ 4: ಕುವೈಟಿನ ಯೂಥ್ ರಿಕ್ರಿಯೇಶನ್ ಸೆಂಟರ್ ಮತ್ತು ರೈಸಿಂಗ್ ಸ್ಟಾರ್ಸ್ ಕುವೈಟ್ ಆಯೋಜಿಸಿರುವ ವಾಯ್ಸ್ ಆಫ್ ಮ್ಯಾಂಗಲೋರ್ ಕೊಂಕಣಿ ಗಾಯನ ಸ್ಪರ್ಧೆಯ ಸೆಮಿಫೈನಲ್ ಹಂತದ ಸ್ಪರ್ಧೆ ನಿನ್ನೆ ನಗರದ ಇಂಡಿಯನ್ ಕಾನ್ಸುಲೇಟ್ ಸಭಾಂಗಣದಲ್ಲಿ ನೆರವೇರಿತು.

ಎಲ್ಲರ ಕುತೂಹಲ ಕೆರಳಿಸಿರುವ ಸ್ಪರ್ಧೆಯನ್ನು ದುಬೈಯಲ್ಲಿ ಮಂಗಳೂರು ಕೊಂಕಣ್ಸ್ ಆಯೋಜಿಸಿದ್ದು ಈ ಹಿಂದೆ ಮಸ್ಕತ್ ನಗರದಲ್ಲಿ ಮೊದಲ ಹಂತದ ಸೆಮಿಫೈನಲ್ ಜರುಗಿತ್ತು. ಸ್ಪರ್ಧಾಕಣದಲ್ಲಿ ಒಟ್ಟು ಹದಿನಾಲ್ಕು ಸ್ಪರ್ಧಿಗಳಿದ್ದು ಎಲ್ಲರೂ ಉತ್ತಮ ಪ್ರದರ್ಶನ ನೀಡಿದರು. ತೀರ್ಪುಗಾರರಾಗಿ ಖ್ಯಾತ ಕೊಂಕಣಿ ಗಾಯಕರಾದ  ವಿಲ್ಫಿ ರೆಬಿಮಸ್, ಮೆಲ್ವಿನ್ ಪೆರಿಸ್ ಹಾಗೂ ಜೋಯೆಲ್ ಪೆರೀರಾ ಉಪಸ್ಥಿತರಿದ್ದರು.

ಅಂತಿಮವಾಗಿ ಗಾಯಕರಲ್ಲಿ ಡಾನಿ ಕೊರಿಯಾ ರವರು 124 ಅಂಕಗಳೊಂದಿಗೆ ಹಾಗೂ ಗಾಯಕಿಯರಲ್ಲಿ ಆಶಾ ಫೆರ್ನಾಂಡಿಸ್ ಅವರು 118ಅಂಕಗಳೊಂದಿಗೆ ಅಂತಿಮ ಸುತ್ತಿಗೆ ಆಯ್ಕೆಯಾದರು.  ಅಂತಿಮ ಪಂದ್ಯ ಅಕ್ಟೋಬರ್ 17 ರಂದು ಕುವೈಟಿನಲ್ಲಿ ಜರುಗಲಿದೆ.  

32 ವರ್ಷದ ಡಾನಿ ಕೇವಲ ಸಂಗೀತ ಮಾತ್ರವಲ್ಲದೇ ನಟನೆ, ನಿರೂಪಣೆ ಹಾಗೂ ಕ್ರೀಡೆಗಳಲ್ಲೂ ಉತ್ತಮ ಪ್ರತಿಭೆ ಹೊಂದಿದ್ದು ಪ್ರಥಮ ಸ್ಥಾನ ಪಡೆಯಲು ಎಲ್ಲಾ ಅರ್ಹತೆ ಹೊಂದಿದ್ದಾರೆ.  ಯು.ಎಇ. ಹಾಗೂ ಊರಿನಲ್ಲಿ ಹಲವು ಸಂಗೀತಸ್ಪರ್ಧೆಗಳಲ್ಲಿ ಅವರು ಬಹುಮಾನಗಳನ್ನು ಪಡೆದಿದ್ದಾರೆ.

31ವರ್ಷ ವಯಸ್ಸಿನ ಆಶಾ ಫೆರ್ನಾಂಡಿಸ್ ನೀ ಪಿಂಟೋರವರು ಓರ್ವ ಗೃಹಿಣಿಯಾಗಿದ್ದರೂ ಸತತ ಪರಿಶ್ರಮ ಹಾಗೂ ಶ್ರದ್ಧೆಯಿಂದ ಅಭ್ಯಸಿಸಿದ ಸಂಗೀತ ಅವರನ್ನು ಪ್ರಥಮ ಸ್ಥಾನ ಪಡೆಯುವ ಮೆಚ್ಚಿನ ಅಭ್ಯರ್ಥಿಯಾಗಿಸಿದೆ.  ಅವರ ಗಾಯನದಲ್ಲಿನ ಏರಿಳಿತ ಹಾಗೂ ಲಯ ಎಲ್ಲರ ಮೆಚ್ಚುಗೆಗೆ ಪಾತ್ರವಾಯಿತು. ತೀರ್ಪುಗಾರರಾದ ವಿಲ್ಫಿ ರೊಬಿಮಸ್ ಅವರು ಮುಕ್ತಕಂಠದಿಂದ ಅವರ ಮೆಚ್ಚುಗೆಯನ್ನು ಪ್ರಕಟಿಸಿದರು.

ಈ ಕಾರ್ಯಕ್ರಮ ಮಂಗಳೂರು ಕೊಂಕಣ್ಸ್ ಸಂಘಟನೆಯ 20ನೆಯ ವಾರ್ಷಿಕೋತ್ಸವವೂ ಆಗಿದ್ದು ಸ್ಪರ್ಧೆ ಹೆಚ್ಚಿನ ಕಳೆ ನೀಡಿತು. ವಿಜೇತರು ಮಾತ್ರವಲ್ಲದೇ ಉಳಿದ ಗಾಯಕ-ಗಾಯಕಿಯರೂ ಅಧ್ಬುತವಾಗಿ ಹಾಡಿ ನೆರೆದವರಿಗೆ ಅವಿಸ್ಮರಣೀಯ ಅನುಭವ ನೀಡಿದರು.

ಮೊಸಾಕೋ ಶಿಪ್ಪಿಂಗ್ ಸಂಸ್ಥೆಯ ಫ್ರಾಂಕ್ ಫೆರ್ನಾಂಡಿಸ್ ಹಾಗೂ ಇಂಟಿಗ್ರೇಟೆಡ್ ಶಿಪ್ಪಿಂಗ್ ಸಂಸ್ಥೆಯ ಲಾನ್ಸಿ ಮಾಡ್ತಾ ಅವರು ಪ್ರದರ್ಶನದ ಪ್ರಮುಖ ಪ್ರಾಯೋಜಕರಾಗಿದ್ದರು.  ಸ್ಟಾಂಡರ್ಡ್ ಫ್ಯಾಬ್ರಿಕೇಶನ್ ಎಲ್.ಎಲ್.ಸಿ. ಹಾಗೂ ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸಿಯಾ ಅವರು ಸಹಪ್ರಾಯೋಜಕರಾಗಿದ್ದರು.

ಆಲ್ವಿನ್ ಪಿಂಟೋ ಅವರು ಕಾರ್ಯಕ್ರಮದ ನಿರೂಪಕರಾಗಿ ಉತ್ತಮ ನಿರ್ವಹಣೆ ನೀಡಿದರು.  ಮಂಗಳೂರು ಕೊಂಕಣ್ಸ್ ಅಧ್ಯಕ್ಷರಾದ ಜೇಮ್ಸ್ ಮೆಂಡೋನ್ಸಾ ರವರು ಸ್ವಾಗತಿಸಿದರೆ ಉಪನಿರ್ವಾಹಕರಾದ ವಲೇರಿಯನ್ ಪೆರಿಸ್ ಅವರು ವಂದನಾರ್ಪಣೆ ಸಲ್ಲಿಸಿದರು.

ಕುವೈಟಿನ ಪ್ರಮುಖ ಪ್ರಾಯೋಜಕರಾದ ಲಾರೆನ್ಸ್ ಪಿಂಟೋ ಸಹಾ ಉಪಸ್ಥಿತರಿದ್ದು ಈ ಸ್ಪರ್ಧೆಯನ್ನು ಆಯೋಜಿಸುವಾಗ ತಮಗೆ ದೊರೆತ ಸಹಕಾರವನ್ನು ಶ್ಲಾಘಿಸಿದರು.  ಮಂಗಳೂರಿನ ಖ್ಯಾತ ನಿರೂಪಕರಾದ ಲೆಸ್ಲಿ ರೇಗೋರವರೂ ಉಪಸ್ಥಿತರಿದ್ದು ತಮ್ಮ ಎಂದಿನ ಲವಲವಿಕೆಯ ಶೈಲಿಯಿಂದ ನೆರೆದವರು ಪ್ರತಿಯೊಂದು ಕ್ಷಣವನ್ನೂ ಸಂತೋಷದಿಂದ ಕಳೆಯುವಲ್ಲಿ ತಮ್ಮ ಯೋಗದಾನ ನೀಡಿದರು.

ಚಿತ್ರ: ಸುಜಯ್ ಬೆಂದೂರ್

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ಕೃಪೆ : ದೈಜಿ ವರದಿಗಾರರು : ಅರ್ಶದ್ ಹುಸೇನ್ ಎಂ.ಹೆಚ್ ಪ್ರಕಟಿಸಿದ ದಿನಾಂಕ : 2008-10-04