ತುಳು ಕೂಟ ಕತರ್ ಪ್ರಸ್ತುತ ಪಡಿಸುತ್ತಿದೆ : ದೋಹಾ ಕಿ ಶಾಮ್-ರಫಿ ಕೆ ನಾಮ್

ದೋಹಾ, ಸೆಪ್ಟೆಂಬರ್ 28:  ದಕ್ಷಿಣದ ರಫಿ ಎಂದೇ ಪ್ರಸಿದ್ಧರಾಗಿರುವ ಮಂಗಳೂರಿನ ಟಾಗೋರ್ ದಾಸ್ ಅವರು ಸತತ ನಾಲ್ಕು ಘಂಟೆಗಳ ಕಾಲ ನೇರ ಸಂಗೀತ ಕಾರ್ಯಕ್ರಮವೊಂದನ್ನು ನೀಡಿ ಸಭಿಕರನ್ನು ರಂಜಿಸಲಿದ್ದಾರೆ.

ನವೆಂಬರ್ 7 ರಂದು ನಗರದ ದೋಹಾ ಸಿನೆಮಾ ಸಭಾಂಗಣದಲ್ಲಿ ಆಯೋಜಿತವಾಗಿರುವ ಕಾರ್ಯಕ್ರಮಕ್ಕೆ -ದೋಹಾ ಕಿ ಶಾಮ್ ರಫಿ ಕೆ ನಾಮ್- ಎಂಬ ಶಿರೋನಾಮೆಯನ್ನು ನೀಡಲಾಗಿದೆ.  ಈ ಕಾರ್ಯಕ್ರಮವನ್ನು ತುಳು ಕೂಟ ಕತರ್ ಆಯೋಜಿಸಿದ್ದು ಇತ್ತೀಚೆಗೆ ಉಡುಪಿಯಲ್ಲಿ ಸತತ ಹನ್ನೆರೆಡು ಘಂಟೆಗಳ ಕಾಲ ಯಶಸ್ವೀ ಪ್ರದರ್ಶನ ನೀಡಿದ್ದಾರೆ.  ಇದುವರೆಗೂ ದಾಸ್ ಅವರು ಸ್ವದೇಶ ಹಾಗೂ ವಿದೇಶಗಳಲ್ಲಿ ಸಾವಿರಕ್ಕೂ ಹೆಚ್ಚು ಪ್ರದರ್ಶನಗಳನ್ನು ನೀಡಿದ್ದಾರೆ. 

ದೋಹಾ ಕಿ ಶಾಮ್ ರಫಿ ಕೆ ನಾಮ್ ತುಳು ಕೂಟದ ಹತ್ತನೆಯ ವಾರ್ಷಿಕೋತ್ಸವದ ವಿಶೇಷ ಆಕರ್ಷಣೆಯಾಗಲಿದೆ.  ಗಾನಗಂಧರ್ವ ದಿವಂಗತ ಮೊಹಮ್ಮದ್ ರಫಿಯವರ ಧನಿಯನ್ನು ಯಥಾವತ್ತಾಗಿ ಅನುಸರಿಸುವ ದಾಸ್ ಅವರು ಹಿಂದಿ ಗಾನಪ್ರಿಯರ ನಡುವೆ ಜನಪ್ರಿಯರಾಗಿದ್ದಾರೆ.  ಅವರು ಸುಮಾರು ಆರುನೂರಕ್ಕೂ ಹೆಚ್ಚು ರಫಿಯವರ ಹಾಡುಗಳನ್ನು ಕಂಠಪಾಠದ ಮೂಲಕ ಹಾಡಿ ತೋರಿಸಬಲ್ಲವರಾಗಿದ್ದಾರೆ.

ಈ ಕಾರ್ಯಕ್ರಮವನ್ನು ಆಯೋಜಿಸಲು ಹಲವು ಕಾಲದಿಂದ ನಾವು ಕಾಯುತ್ತಿದ್ದು ಈಗ ಆ ಘಳಿಗೆ ಸನ್ನಿಹಿತವಾಗಿದೆ, ನವೆಂಬರ್ 7 ನಮ್ಮೆಲ್ಲರಿಗೂ ಒಂದು ಅವಿಸ್ಮರಣೀಯ ಅನುಭವ ನೀಡಲಿದೆ, ತುಳುನಾಡಿನ ಪ್ರತಿಭೆಗಳನ್ನು ಹೊರನಾಡಿಗೆ ಆಹ್ವಾನಿಸಿ ಅವರಿಗೆ ಪ್ರೋತ್ಸಾಹ ನೀಡುವುದು ಅವರ ಪ್ರತಿಭೆ ಬೆಳೆಯಲು ನಾವು ನೀಡಬಹುದಾದ ಪ್ರಯತ್ನವಾಗಿದೆ ಎಂದು ತುಳುಕೂಟ ಕತರ್ ಅಧ್ಯಕ್ಷರಾದ ಶ್ರೀ ರವಿಶೆಟ್ಟಿಯವರು ತಿಳಿಸಿದ್ದಾರೆ.

ಶ್ರೀ ಟಾಗೋರ್ ದಾಸ್ ಅವರು ಒಂಭತ್ತು ಸದಸ್ಯರ ತಂಡವನ್ನು ಹೊಂದಿದ್ದು ಅವರಲ್ಲಿ ಕೇರಳದ ಖ್ಯಾತ ಸಂಗೀತಕಾರರಾದ ಶ್ರೀ ಪಪ್ಪನ್ ಅವರೂ ಒಬ್ಬರಾಗಿದ್ದಾರೆ.  ಈ ಸಂಗೀತಸಂಜೆಯ ಟಿಕೇಟುಗಳು ಶೀಘ್ರದಲ್ಲಿಯೇ ನಗರದ ಖ್ಯಾತ ಸುಪರ್ ಮಾರ್ಕೆಟ್ ಹಾಗೂ ಹೋಟೆಲುಗಳಲ್ಲಿ ಲಭ್ಯವಾಗಲಿವೆ. ಅಪರೂಪದ ಈ ಅವಕಾಶವನ್ನು ಬಳಸಿಕೊಳ್ಳುವಂತೆ ಎಲ್ಲಾ ಮೊಹಮ್ಮದ್ ರಫಿ ಅಭಿಮಾನಿಗಳು ಹಾಗೂ ತುಳುನಾಡಿನ ಬಾಂಧವರಲ್ಲಿ ತುಳು ಕೂಟ ಕತರ್ ಅಧ್ಯಕ್ಷರಾದ ರವಿಶೆಟ್ಟಿಯವರು ಮನವಿ ಮಾಡಿಕೊಂಡಿದ್ದಾರೆ.

ಚಿತ್ರ, ವರದಿ: ಇಕ್ಬಾಲ್ ಮನ್ನಾ, ದೋಹಾ ಕತರ್. 

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ಕೃಪೆ : ಇಕ್ಬಾಲ್ ಮನ್ನಾ, ದೋಹಾ ಕತರ್ ವರದಿಗಾರರು : ಅರ್ಶದ್ ಹುಸೇನ್ ಎಂ.ಹೆಚ್ ಪ್ರಕಟಿಸಿದ ದಿನಾಂಕ : 2008-09-28