ಎಲ್ಲಾ ಮುಂಜಾಗರೂಕತಾ ಕ್ರಮಗಳನ್ನು ಕೈಗೊಳ್ಳಲಾಗಿದೆ : ಆರೋಗ್ಯ ಸಚಿವರ ಭರವಸೆ

ಕುವೈಟ್, ಸೆಪ್ಟೆಂಬರ್ 21: ನೆರೆದೇಶವಾದ ಇರಾಕಿನಲ್ಲಿ ಕಾಲರಾ ರೋಗ ತಲೆದೋರಿದ್ದು ಕುವೈಟಿಗೆ ಹರಡುವುದನ್ನು ತಡೆಗಟ್ಟಲು ಸಾಧ್ಯವಾದ ಕ್ರಮ ಕೈಗೊಳ್ಳಬೇಕೆಂದು ವಿಶ್ವ ಆರೋಗ್ಯ ಸಂಸ್ಥೆ ಸಲಹೆ ನೀಡಿದ್ದು ಆ ಸಲಹೆಯನ್ನು ಪಾಲಿಸಲಾಗಿದೆ ಎಂದು ಕುವೈಟ್ ಆರೋಗ್ಯ ಸಚಿವಾಲಯದ ಉಪಕಾರ್ಯದರ್ಶಿಗಳಾದ ಡಾ. ಅಲಿ ಅಲ್ ಸೈಫ್ ತಿಳಿಸಿದ್ದಾರೆ.

ಇರಾಕಿನಲ್ಲಿ ತಲೆದೋರಿರುವ ಕಾಲರಾ ರೋಗ ಕುವೈಟಿನಲ್ಲಿ ಹಬ್ಬದಂತೆ ಎಲ್ಲಾ ಮುಂಜಾಗರೂಕತಾ ಕ್ರಮಗಳನ್ನು ಕೈಗೊಳ್ಳಲಾಗಿದೆ. ಎಲ್ಲಾ ಮನೆಗಳಲ್ಲಿ ಅಂತರರಾಷ್ಟ್ರೀಯ ಗುಣಮಟ್ಟದ ಸಂಸ್ಥೆಗಳು ಒದಗಿಸಿರುವ ಸ್ವಚ್ಛ ಕುಡಿಯುವ ನೀರನ್ನು ಮಾತ್ರ ಬಳಸುವಂತೆ ಆಗ್ರಹಿಸಲಾಗಿದೆ.  ರಾಷ್ಟ್ರದ ಎಲ್ಲಾ ಆರೋಗ್ಯ ಸಂಸ್ಥೆಗಳಿಗೆ ಹೆಚ್ಚಿನ ಕಾಳಜಿ ವಹಿಸಲು ಎಚ್ಚರಿಕೆ ನೀಡಲಾಗಿದೆ. ಡಯೋರಿಯಾ ಹಾಗೂ ಇನ್ನಿತರ ಸಾಂಕ್ರಾಮಿಕ ರೋಗಗಳಿಂದ ಬಳಲುತ್ತಿರುವವರನ್ನು ಕೂಡಲೆ ಕೂಲಂಕುಶ ಪರಿಶೀಲನೆಗೊಳಪಡಿಸಿ ಕಾಲರಾ ಅಥವಾ ಮತ್ತಿತರ ರೋಗಗ್ರಸ್ತರಾಗದಿರುವುದನ್ನು ಖಚಿತಪಡಿಸಿಕೊಳ್ಳಲು ಆದೇಶ ನೀಡಲಾಗಿದೆ. ಒಂದು ವೇಳೆ ರೋಗದ ಲಕ್ಷಣಗಳು ಕಂಡುಬಂದಲ್ಲಿ ನಿರ್ವಹಣೆಗೆ ಸೂಕ್ತ ಔಷಧಿಗಳ ದಾಸ್ತಾನನ್ನೂ ಸಿದ್ಧವಾಗಿಡಲಾಗಿದೆ ಎಂದು ಡಾ. ಸೈಫ್ ತಿಳಿಸಿದ್ದಾರೆ.

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ಕೃಪೆ : ಗಲ್ಫ್ ಟೈಮ್ಸ್ ವರದಿಗಾರರು : ಅರ್ಶದ್ ಹುಸೇನ್ ಎಂ.ಹೆಚ್ ಪ್ರಕಟಿಸಿದ ದಿನಾಂಕ : 2008-09-21