ಈಜಿಪ್ಟ್ ಹಾಗೂ ಭಾರತೀಯ  ನಾಗರಿಕರನ್ನೊಳಗೊಂಡ ವ್ಯವಸ್ಥಿತ ತಂಡ : ವೈದ್ಯಕೀಯ ನಿರ್ದೇಶನಾಲಯದ ಸೀಲುಗಳ ನಕಲು ವಶ

ಕುವೈಟ್, ಜುಲೈ 26:  ಕುವೈಟಿನಲ್ಲಿ ಉದ್ಯೋಗ ನೋಂದಾವಣೆಗೆ ಅಗತ್ಯವಾಗಿ ಬೇಕಾದ ಆರೋಗ್ಯ ಪ್ರಮಾಣಪತ್ರವನ್ನು ನಕಲಿಸಿ ಮಾರಾಟ ಮಾಡುತ್ತಿದ್ದ ಈಜಿಪ್ಟ್ ಮತ್ತು ಭಾರತೀಯ ಅನಿವಾಸಿಗಳಿಂದ ಕೂಡಿದ ತಂಡವೊಂದನ್ನು ಕುವೈಟ್ ಪೋಲೀಸರು ಬಂಧಿಸಿದ್ದಾರೆ.

ಈ ಮೊದಲು ಹಲವಾರು ಪ್ರಮಾಣಪತ್ರಗಳು ನಕಲಿ ಎಂದು ಕಂಡುಬಂದ ಹಿನ್ನೆಲೆಯಲ್ಲಿ ಈ ವ್ಯವಸ್ಥೆಯನ್ನು ಕಂಡುಹಿಡಿಯಲು ಪೋಲೀಸರಿಗೆ ದೂರು ಸಲ್ಲಿಸಲಾಗಿತ್ತು.

ಈ ಪ್ರಮಾಣಪತ್ರಗಳು ಉದ್ಯೋಗಾಕಾಂಕ್ಷಿಯನ್ನು ಏಯ್ಡ್ಸ್, ಟ್ಯೂಬರ್ ಕ್ಯುಲೋಸಿಸ್, ಹೆಪಾಟಿಟಿಸ್ ಮೊದಲಾದ ಖಾಯಿಲೆಗಳಿಂದ ಮುಕ್ತ ಎಂದು ಘೋಷಿಸುತ್ತಿದ್ದವು. ಇವುಗಳಲ್ಲಿ ಧೃಢೀಕರಣ ಸೀಲ್ ಸಹಾ ಯಥಾವತ್ತಾಗಿ ನಕಲು ಮಾಡಲಾಗಿದ್ದು ನಕಲು ಎಂದು ಕಂಡುಹಿಡಿಯುವುದು ಕಷ್ಟಸಾಧ್ಯವಾಗಿತ್ತು.

ಆದರೆ ಇಂತಹ ಪ್ರಮಾಣಪತ್ರವನ್ನು ಹೊಂದಿದ್ದ ಉದ್ಯೋಗಾಕಾಂಕ್ಷಿಯೊಬ್ಬನಿಗೆ ಪ್ರಮುಖ ಖಾಯಿಲೆಯಿರುವುದು ಆ ಬಳಿಕ ಕಂಡುಬಂದಿದ್ದು ಆತನನ್ನು ವಿಚಾರಣೆಗೊಳಪಡಿಸಿದ ಬಳಿಕ ಈ ಪ್ರಮಾಣಪತ್ರ ನಕಲಿ ಎಂದು ಕಂಡುಬಂದಿದೆ.

ಶೀಘ್ರದಲ್ಲಿ ಕಾರ್ಯಪ್ರವೃತ್ತರಾದ ಪೋಲೀಸರು ಆತನ ಸುಳಿವಿನ ಮೇರೆಗೆ ನಕಲಿ ಪ್ರಮಾಣಪತ್ರ ಒದಗಿಸುತ್ತಿದ್ದ ತಂಡವನ್ನು ಬಂಧಿಸಿದ್ದಾರೆ. ಈ ತಂಡ ಪ್ರತಿ ನಕಲಿ ಪ್ರಮಾಣಪತ್ರಕ್ಕೆ 350 ಕುವೈತಿ ದಿನಾರ್ ವೆಚ್ಚ ನಿಗದಿಪಡಿಸಿತ್ತು. (ಸುಮಾರು ನಲವತ್ತು ಸಾವಿರ ರೂಪಾಯಿ)

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ಕೃಪೆ : ಕುವೈಟ್ ಟೈಮ್ಸ್ ವರದಿಗಾರರು : ಅರ್ಶದ್ ಹುಸೇನ್ ಎಂ.ಹೆಚ್ ಪ್ರಕಟಿಸಿದ ದಿನಾಂಕ : 2008-07-26