ಈ ವರ್ಷದ ಮುತ್ತು ತೆಗೆಯುವ ಸ್ಪರ್ಧೆಗೆ ಯು.ಎ.ಇ. ನೀಡಿದ ಉಡುಗೊರೆ : ಹಬ್ಬದ ವಾತಾವರಣ

ಕುವೈಟ್, ಜುಲೈ 12: ಕುವೈಟಿನಲ್ಲಿ ಪ್ರತಿವರ್ಷ ನಡೆಯುವ ಸಮುದ್ರದಾಳದಿಂದ ಮುತ್ತು ಹೆಕ್ಕುವ ಸಾಂಪ್ರಾದಾಯಿಕ ವಾರ್ಷಿಕೋತ್ಸವದ ಅಂಗವಾಗಿ ಯು.ಎಇ. ಸರ್ಕಾರ ಕುವೈಟ್ ಸರ್ಕಾರಕ್ಕೆ ಒಟ್ಟು ಐದು ದೋಣಿಗಳನ್ನು ಉಡುಗೊರೆಯಾಗಿ ನೀಡಿದ್ದು ಕಳೆದ ಗುರುವಾರ ಸಲ್ಮಿಯಾ ಬಂದರಿಗೆ ಬಂದು ತಲುಪಿವೆ.  ಈ ದೋಣಿಗಳಿಗೆ ಕುವೈಟಿನ ಕೆ.ಎಸ್.ಎಸ್.ಸಿ.(The Kuwait Sea Sports Club (KSSC) ಸಂಘದ ಸದಸ್ಯರು  ಸಾಂಪ್ರಾದಾಯಿಕ ಗೀತೆ ಮತ್ತು ನೃತ್ಯಗಳ ಸಹಿತ ಭವ್ಯ ಸ್ವಾಗತ ನೀಡಿದ್ದಾರೆ.

ಈ ದೋಣಿಗಳನ್ನು ಸರಲ ಸಮಾರಂಭವೊಂದರಲ್ಲಿ  ಕುವೈಟ್ ಅಮೀರ್ ಶೇಖ್ ಸಬಾಹ್ ಅಲ್ ಅಹ್ಮದ್ ಅಲ್ ಸಬಾಹ್ ಅವರು ಸ್ಪರ್ಧಾಳುಗಳಿಗೆ ಹಸ್ತಾಂತರಿಸಿದರು.  ಕೆ.ಎಸ್.ಎಸ್.ಸಿ ಅಧ್ಯಕ್ಷ ಫಹದ್ ಅಲ್ ಫಹದ್ ಹಾಗೂ ಪ್ರಧಾನ ಕಾರ್ಯದರ್ಶಿ ಜನರಲ್ ಅಹ್ಮದ್ ಅಲ್ ಕಬಾಂದಿಯವರು ಸ್ವೀಕರಿಸಿದರು.

ಸಂಘದ ಯುವ ಸದಸ್ಯರು ಈ ದೋಣಿಗಳನ್ನು ಸಾಂಪ್ರಾದಾಯಿಕ ಹಾಡು, ನೃತ್ಯಗಳ ಸಹಿತ ಬರಮಾಡಿಕೊಂಡರು.  ಈ ಸ್ಪರ್ಧೆಯಲ್ಲಿ ಕುವೈಟ್ ಅಮೀರ್ ರಿಗೆ ಅತೀವವಾದ ಆಸಕ್ತಿಯಿದ್ದು ಸಾಂಪ್ರಾದಾಯಿಕ ಕ್ರೀಡೆ ಹಾಗೂ ಆಚರಣೆಗಳನ್ನು ಮುಂದಿನ ಜನಾಂಗಕ್ಕೆ ಮುಂದುವರೆಸಿಕೊಂಡು ಹೋಗುವ ನಿಟ್ಟಿನಲ್ಲಿ ಪ್ರತಿವರ್ಷ ಉತ್ಸವವನ್ನೇರ್ಪಡಿಸಿ ಯಶಸ್ವಿಗೊಳಿಸುವಲ್ಲಿ ತಮ್ಮ ಪ್ರೋತ್ಸಾಹ ನೀಡುತ್ತಾ ಬಂದಿದ್ದಾರೆ.

ಈ ದೋಣಿಗಳು ಫೈಬರ್ ಗ್ಲಾಸ್ ನಿಂದ ರಚಿಸಲ್ಪಟ್ಟಿದ್ದು ಮೋಟಾರು ಇಂಜಿನ್ನುಗಳ ನೆರವಿನಿಂದ ಚಲಿಸುತ್ತವೆ.  ಸಾಂಪ್ರಾದಾಯಿಕ ದೋಣಿಗಳಿಗೆ ಸಮಾನವಾಗಿ ಇವನ್ನು ರಚಿಸಲಾಗಿದೆ. ಇವುಗಳ ಉದ್ದ 55 ಅಡಿ ಇದ್ದು ಹೆಚ್ಚಿನ ಕ್ಷಮತೆ ಹೊಂದಿವೆ ಎಂದು ಈ ಉತ್ಸವದ ನಿರ್ವಹಣಾ ಅಧಿಕಾರಿಯಾಗಿರುವ ಕ್ಯಾಪ್ಟನ್ ಯೂಸುಫ್ ನಜಾರ್ ತಿಳಿಸಿದ್ದಾರೆ.  ಈ ವರ್ಷದ ಮುತ್ತು ತೆಗೆಯುವ ಉತ್ಸವ ಜುಲೈ 23 ರಿಂದ 31ರ ವರೆಗೆ ಜರುಗಲಿದೆ.

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ಕೃಪೆ : ಕುವೈಟ್ ಟೈಮ್ಸ್ ವರದಿಗಾರರು : ಅರ್ಶದ್ ಹುಸೇನ್ ಎಂ.ಹೆಚ್ ಪ್ರಕಟಿಸಿದ ದಿನಾಂಕ : 2008-07-12