Gulf Kannadiga - a reflection of Karnataka in the Gulf

ಡಿಸೆಂಬರ್ ತಿಂಗಳು ಪ್ರಾರಂಭವಾದಷ್ಟೇ ಗೊತ್ತಾಗುವುದು. ನಂತರದ ದಿನಗಳೆಲ್ಲಾ ಕ್ರಿಸ್ಮಸ್ ಸಂಭ್ರಮದಲ್ಲೇ ಕಳೆದು ಹೋಗುತ್ತದೆ. ಕ್ರಿಸ್ಮಸ್ ಸಂಬಂಧಿ ಶಾಪಿಂಗ್ ಡಿಸೆಂಬರ್‌ನಲ್ಲಿ ಗಡದ್ದಾಗಿ ನಡೆಯುತ್ತಿದೆ. ಶಾಪ್ - ಮಾಲ್‌ಗಳಿಗೆ ಅತೀ ಹೆಚ್ಚು ಲಾಭವಾಗುವುದು ಡಿಸೆಂಬರ್‌ನಲ್ಲಿ. ಇದು ಪ್ರಪಂಚದಾದ್ಯಂತ ಮಾರಾಟಗಾರರು ಕಂಡುಕೊಂಡ ಸತ್ಯ. ಡಿಸೆಂಬರ್ ತಿಂಗಳ ಚುಮ್ ಚುಮ್ ಚಳಿಯೊಡನೆ ಬಾಲ ಯೇಸುವಿನ ಜನನದ ಸಂತೋಷವನ್ನು ಬರಿಯ ಕ್ರೈಸ್ತ ಸಮುದಾಯವಲ್ಲದೇ ಎಲ್ಲರೂ ಆಚರಿಸುತ್ತಾರೆ. ದೀಪಾವಳಿ ಸಂದರ್ಭದಲ್ಲಿ ಉಳಿದ ಧರ್ಮದವರು ಪಟಾಕಿ ಸುಟ್ಟು ಸಂಭ್ರಮಿಸಿದಂತೆ ಕ್ರಿಸ್ಮಸ್ ದಿನಗಳಲ್ಲಿ ಸಂತಕ್ಲಾಸ್ ಎಂಬ ಕ್ರಿಸ್ಮಸ್ ಅಜ್ಜನೊಡನೆ ಮನೆ ಮನೆಗೆ ತೆರಳಿ ಸಿಹಿ ತಿನಿಸು, ಉಡುಗೊರೆಗಳನ್ನು ಹಂಚಿ - ಸ್ವೀಕರಿಸಿ ಸಂಭ್ರಮಿಸುತ್ತಾರೆ. ಕ್ರಿಸ್ಮಸ್ ಕ್ಯಾರಲ್ಸ್ (ಕ್ರಿಸ್ಮಸ್ ಆಚರಣೆಗಾಗಿನ ವಿಶೇಷ ಹಾಡುಗಳು)ಗೆ ಹೆಚ್ಚೆ ಹಾಕುತ್ತಾರೆ.
ಕ್ರಿಸ್ಮಸ್ ಆಚರಣೆಯಷ್ಟೇ ಉಲ್ಲಾಸದಿಂದ ಕ್ರಿಸ್ಮಸ್‌ಗಾಗಿನ ತಯಾರಿಯನ್ನು ಪ್ರಪಂಚದಲ್ಲೆಡೆ ಮಾಡುತ್ತಾರೆ. ಯೇಸು ದನದ ಕೊಟ್ಟಿಗೆಯಲ್ಲಿ ಹುಟ್ಟಿದುದರ ಪ್ರತೀಕವಾಗಿ ಗೋದಲಿಯನ್ನು ತಯಾರಿಸುವುದು ವಾಡಿಕೆ. ಗೋದಲಿ ತಯಾರಿಸುವುದು ಸುಲಭದ ಕೆಲಸವಲ್ಲ. ಗೋದಲಿಯೊಳಗೆ ಮರುಭೂಮಿ, ಬಾವಿ, ರಾಯರ ಮನೆ, ಗದ್ದೆ, ತೋಟ, ರಸ್ತೆ, ಬೆಟ್ಟ ವನ್ನೆಲ್ಲಾ ಮಾಡಿ ಕುರಿ, ಮೇಕೆ, ದನ, ರೈತ, ಮೂರು ರಾಯರು, ಕುರಿಕಾಯುವವನು, ಕೋಳಿ, ಎತ್ತು ಮುಂತಾದ ಮಣ್ಣಿನಿಂದ ಮಾಡಿದ ಪ್ರತೀತಿಗಳಲ್ಲದೆ ಯೇಸುವಿನ ಕುಟುಂಬ, ನಕ್ಷತ್ರ, ದೇವದೂತರ ಪ್ರತೀಕಗಳನ್ನು ಇಡಲಾಗುತ್ತದೆ. ಎಲ್ಲಾ ಅವಶ್ಯಕ ವಸ್ತುಗಳನ್ನು ಮೊದಲೇ ಗೊದಲಿಯಲ್ಲಿ ಇಟ್ಟರೂ ಯೇಸು ಹಾಗೂ ಮರಿಯಮ್ಮನ ಪ್ರತೀಕವನ್ನು ಡಿಸೆಂಬರ್ ೨೪ರ ಮಧ್ಯರಾತ್ರಿ ಇಟ್ಟು ಸಂಭ್ರಮ ಪಡುತ್ತಾರೆ.

ಕ್ರಿಸ್ಮಸ್ ನಕ್ಷತ್ರಗಳಿಗೂ ವಿಶೇಷ ಮಹತ್ವವನ್ನು ನೀಡಲಾಗುತ್ತದೆ. ಮೂರು ರೀತಿಯ ಉಡುಗೊರೆಗಳನ್ನು ತಂದು ಬರುವ ಮೂವರು ರಾಜರುಗಳಿಗೆ ಯೇಸು ಜನಿಸಿದ ಸ್ಥಳದ ಕುರಿತಾಗಿ ನಕ್ಷತ್ರವೊಂದರಿಂದ ತಿಳಿಯುತ್ತದೆ. ಅದರ ಸವಿನೆನಪಿಗಾಗಿ ಮನೆಗಳಲ್ಲಿ ಅಂಗಡಿಗಳಲ್ಲಿ, ಮರಗಳಲ್ಲಿ ಎಲ್ಲಾ ಕ್ರಿಸ್ಮಸ್ ಸಂಭ್ರಮದ ಪ್ರತೀಕವಾಗಿ ನಕ್ಷತ್ರಗಳನ್ನು ನೇತುಹಾಕುತ್ತಾರೆ. ವಿವಿಧ ಶೈಲಿಯ ನಕ್ಷತ್ರಗಳು ಕ್ರಿಸ್ಮಸ್ ಸಂಭ್ರಮವನ್ನು ದುಪ್ಪಟ್ಟು ಮಾಡುತ್ತವೆ.

ಕ್ರಿಸ್ಮಸ್ ನಕ್ಷತ್ರ ಮತ್ತು ಗೋದಲಿಗೆ ಕೊಟ್ಟಷ್ಟೇ ಮಹತ್ವವನ್ನು ಕ್ರಿಸ್ಮಸ್ ಟ್ರೀಗೆ ಕೊಡಲಾಗುತ್ತದೆ. ಕ್ರಿಸ್ಮಸ್ ಟ್ರೀಯನ್ನು ಡಿಸೆಂಬರ್ ೨೩ಕ್ಕೆ ಮಾಡಲು ಪ್ರಾರಂಭಿಸಿಲಾಗುತ್ತದೆ. ಮೊದಲೇ ತಂದಿಟ್ಟ ಅಲಂಕಾರಿಕ ವರ್ಣರಂಚಿತ ವಸ್ತುಗಳನ್ನು, ಬೆಲೂನುಗಳನ್ನು ಕ್ರಿಸ್ಮಸ್ ಟ್ರೀಗೆ ಹಾಕಿ ಅಲಂಕರಿಸುತ್ತಾರೆ.

ಇನ್ನು, ಕ್ರಿಸ್ಮಸ್ ಸಂದೇಶಗಳನ್ನು ಗ್ರೀಟಿಂಗ್ಸ್ ಮುಖಾಂತರ ರವಾನಿಸುವುದು. ಕ್ರಿಸ್ಮಸ್ ತಿಂಡಿಗಳನ್ನು ತಯಾರಿಸುವುದು ಸಹ ಈ ಸಂಭ್ರದಲ್ಲಿ ಸೇರುತ್ತದೆ. ಕುಸ್ವಾರ್ ಎಂದೇ ಕರೆಯಲ್ಪಡುವ ಕ್ರಿಸ್ಮಸ್ ತಿಂಡಿಯಲ್ಲಿ ಕೇಕ್‌ಗೆ ಹೆಚ್ಚಿನ ಪ್ರಾಮುಖ್ಯತೆ ನೀಡಲಾಗುವುದು. ಉಳಿದಂತೆ ನಿವ್ರ್ಯೊ, ಲಾಡು, ಕೊಕ್ಕಿಸಾಂ, ಕಿಡಿಯೊ, ಗುಳಿಯೊ. ಚಿಪ್ಸ್, ಚಕ್ಕುಲಿ... ಮುಂತಾದ ಹತ್ತು ಹಲವು ತಿನಿಸುಗಳನ್ನು ಮಾಡಿ ನೆರೆಹೊರೆಯವರಿಗೆ ಹಂಚುತ್ತಾರೆ.
ಇವೆಲ್ಲದರ ಜೊತೆಗೆ ಡಿಸೆಂಬರ್ ೨೪ರ ಮಧ್ಯರಾತ್ರಿ ಚರ್ಚ್‌ಗಳಿಗೆ ತೆರಳಿ ಕ್ರಿಸ್ಮಸ್ ಸಂಭ್ರಮವನ್ನು ಪೂಜಾನಿಧಿಗಳೊಡನೆ ಮಾಡಲಾಗುತ್ತದೆ. ಪ್ರತೀ ವರ್ಷದಂತೆ ಈ ವರ್ಷವೂ ಕ್ರಿಸ್ಮಸ್ ಬಂದಿದೆ. ನಿಮಗೆಲ್ಲರಿಗೂ ಇದು ಹೊಸ ಹರುಷ, ನೆಮ್ಮದಿ ತರಲಿ ಎಂಬ ಹಾರೈಕೆ ನನ್ನದು.